Минея, 18 Августа.\nГлас 1\n\nПеснь 1\n\nИрмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.\n\nПрипев: Преподо́бне о́тче Иоáнне, моли́ Бо́га о на́с.\n\nДа́ждь ми, блаже́нне, кре́пкую с высоты́ по́мощь и просвеще́ние ра́зума,/ я́ко да равноа́нгельное твое́ на земли́ житие́ восхвалю́,/ и́мже исто́чник чуде́с яви́лся еси́.\n\nПрипев: Преподо́бне о́тче Иоáнне, моли́ Бо́га о на́с.\n\nИ́же в Лива́не ке́дру уподо́бился еси́, доброде́тели боже́ственныя преумно́жив,/ и, я́ко дре́во насади́вся при исхо́дищих воды́ живы́я,/ осеня́еши ны́не неду́жных благода́тию.\n\nСла́ва Отцу́ и Сы́ну и Свято́му Ду́ху.\n\nВы́спрь житие́ на́ше я́ко слы́шав и на Небесе́х пребыва́ние,/ оста́вил еси́ зе́млю оте́чества твоего́, и ми́ра кра́сная презре́л еси́,/ и к Вы́шней жи́зни впери́лся еси́.\n\nИ ны́не и при́сно и во ве́ки веко́в. Ами́нь.\n\nБогородичен: Егда́ восхожда́ху Небе́снии у́ми ле́ствицу Иа́ковлю и низхожда́ху,/ Твое́ стра́шное тогда́ рождество́ та́йно яви́ша, Богоро́дице,/ и́мже у́бо Бог на зе́млю сни́де, да челове́ки на Не́бо вознесе́т.\n\nПеснь 3\n\nИрмос: Еди́не, ве́дый челове́ческаго существа́ не́мощь/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.\n\nПрипев: Преподо́бне о́тче Иоáнне, моли́ Бо́га о на́с.\n\nНе роди́вся от по́хоти плотски́я, я́ко безпло́тен пожи́л еси́ на земли́,/ и ча́до был еси́ Вы́шняго благода́тию,/ и я́ко жре́бий оте́ческий прия́л еси́ угото́ванное Ца́рство Того́ возлю́бльшим.\n\nПрипев: Преподо́бне о́тче Иоáнне, моли́ Бо́га о на́с.\n\nБлагода́тию Ду́ха исполня́я за́поведь изра́ильтяном Моисе́йскую,/ очи́стил еси́ те́ло и ду́шу де́ньми мно́жайшими,/ на го́ру возше́д, и я́ко безпло́тен пребыва́л еси́ та́мо,/ и боговиде́ния сподо́бился еси́.\n\nСла́ва Отцу́ и Сы́ну и Свято́му Ду́ху.\n\nОт ю́ности украси́вся ра́зумом, Соломо́нову му́дрость стяжа́л еси́/ и, всю ми́ра сего́ сла́стную пи́щу премину́в,/ а́лчбою и боле́знию потща́лся еси́ нетле́нную получи́ти, всеблаже́нне.\n\nИ ны́не и при́сно и во ве́ки веко́в. Ами́нь.\n\nБогородичен: Госпо́дь пе́рстом написа́ в Тебе́ Сло́во Безнача́льное,/ я́коже в глави́зне кни́жней, Всепе́тая;/ те́мже припа́даю Ти, моля́ся, в кни́зе живо́тней мя написа́ти,/ грехо́в рукописа́ние растерза́ющи.\n\nСедален, глас 6\n\nПо́стническия по́двиги поне́сл еси́ и страда́льческим венце́м увяза́лся еси́,/ с безпло́тными бо враги́ в телеси́ боря́ся и во́инства их низлага́я,/ удиви́л еси́ терпе́нием твои́м А́нгелы,/ и́хже житию́ во пло́ти поревнова́л еси́./ Но моли́ся Христу́ Бо́гу, о́тче Иоа́нне, спасти́ся нам.\n\nПеснь 4\n\nИрмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.\n\nПрипев: Преподо́бне о́тче Иоáнне, моли́ Бо́га о на́с.\n\nВиде́ние Дании́лово разсмотри́в,/ я́ко от горы́ отто́ржеся ка́мень несече́нный и в прах и́дольское сокруши́ мучи́тельство,/ обре́л еси́ на горе́ краеуго́льный Ка́мень, Христа́,/ зло́бу всю сокруша́юща.\n\nПрипев: Преподо́бне о́тче Иоáнне, моли́ Бо́га о на́с.\n\nОгне́м да не опа́лится содо́мским,/ А́нгел Ло́тови повелева́ше на горе́ спасти́ся,/ ты же, ра́вное тому́ рве́ние восприи́м и на го́ру возше́д,/ та́мо жи́ти изво́лил еси́ и пла́мене страстна́го избежа́л еси́.\n\nСла́ва Отцу́ и Сы́ну и Свято́му Ду́ху.\n\nСмире́нно после́довал еси́ жезло́м позва́вшему / и, я́ко овча́ незло́биво, зе́лием Го́рним пита́лся еси́;/ ны́не же на па́жити ра́йстей поко́ище обре́т,/ на вода́х пи́щных насыща́ешися.\n\nИ ны́не и при́сно и во ве́ки веко́в. Ами́нь.\n\nБогородичен: Вкуси́ Ада́м печа́ль плода́ дре́вняго, жену́ послу́шав,/ Ты же, Чи́стая, глас Арха́нгела восприи́мши;/ се Раба́ Госпо́дня! возопи́вши и Бо́га поро́ждши,/ ра́дость в мир ввела́ еси́.\n\nПеснь 5\n\nИрмос: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.\n\nПрипев: Преподо́бне о́тче Иоáнне, моли́ Бо́га о на́с.\n\nЯ́коже А́нгел на земли́ пребы́в,/ воздержа́нием Крести́телю уподо́бился еси́, пусты́нному воспита́нию, преподо́бне;/ ны́не же хле́бом а́нгельским пита́яся по пи́санному,/ насы́ти ду́ши на́ша благода́тию.\n\nПрипев: Преподо́бне о́тче Иоáнне, моли́ Бо́га о на́с.\n\nТвое́ дерзнове́ние, е́же к Бо́гу, неора́нно прозябы́й слану́ток пропове́дует, о́тче,/ и́мже сама́го себе́ ди́вно пита́л еси́, я́коже естество́м пло́ти обложе́ннаго,/ и и́же к тебе́ приходя́щия.\n\nСла́ва Отцу́ и Сы́ну и Свято́му Ду́ху.\n\nИ́стинная наде́жда не посрами́ тебе́, блаже́нне, уве́девша бу́дущую сла́ву,/ к не́йже недосто́йна вмени́л еси́, я́же на земли́ боре́ния/ и дерзнове́нно к по́стническим страсте́м устреми́лся еси́.\n\nИ ны́не и при́сно и во ве́ки веко́в. Ами́нь.\n\nБогородичен: Хи́тростию зми́я Ада́м боже́ственныя ри́зы совлече́ся и в ри́зу ко́жаную оде́яся;/ от Тебе́ же плоть прии́м, Зижди́тель мой дебельства́ пло́ти совлече́ мя/ и в пе́рвую мя па́ки оде́жду оде́я.\n\nПеснь 6\n\nИрмос: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.\n\nПрипев: Преподо́бне о́тче Иоáнне, моли́ Бо́га о на́с.\n\nСве́том пе́рвым облиста́вся, был еси́ свети́льник, блаже́нне, и А́нгелом подо́бник,/ безпреста́нно поя́ в моли́твах всено́щных Еди́наго Бо́га,/ Его́же и сын благода́тию яви́лся еси́.\n\nПрипев: Преподо́бне о́тче Иоáнне, моли́ Бо́га о на́с.\n\nВолну́ющееся бу́рею мо́ре жития́ оста́вил еси́,/ погружа́ющее нехотя́щих на Не́бо вознести́ся,/ и вся преше́л еси́ мирски́я прило́ги, наг бе́гая искуше́ний лука́ваго.\n\nСла́ва Отцу́ и Сы́ну и Свято́му Ду́ху.\n\nОбре́л еси́ Бо́га, все́льшася в тя,/ не дав поко́я скраниа́ма твои́ма, ни ве́ждома твои́ма дрема́ния,/ и, я́ко безпло́тен во пло́ти пожи́в,/ в Небе́сныя хра́мы всели́лся еси́.\n\nИ ны́не и при́сно и во ве́ки веко́в. Ами́нь.\n\nБогородичен: Иска́пай ка́пли щедро́т, о́блаче Небе́сный, Чи́стая Де́во,/ я́коже руно́ прии́мшая до́ждь и я́коже ка́плю Бо́га во чре́ве,/ и страсте́й мои́х пото́ки изсуши́.\n\nКондак, глас 2\n\nВ моли́твах бо́дренно не усыпа́я/ и в пе́ниих непреста́нных А́нгелом подо́бяся,/ в гроб вшел еси́, тле́нную жи́знь оста́вив,/ и к Небеси́ преше́л еси́/ на нетле́ние, Иоа́нне о́тче,/ от сме́рти бо к животу́ ве́чному/ тя пресели́ Христо́с Бог, я́ко Своего́ уго́дника.\n\nИкос\n\nИ́же па́че естества́ в телеси́ ме́ртвеннем а́нгельскому поревнова́вшаго житию́,/ прииди́те, воспои́м Иоа́нна преблаже́ннаго,/ той бо я́ко о́треби вмени́ мир и я́же в ми́ре,/ и, на го́ру возше́д, я́коже дре́вле вели́кий Моисе́й, посто́м очи́стися,/ и ви́дети сподо́бися Тро́ическую све́тлость не во мра́це, ни во ви́хре, но во све́те благода́ти./ Тем и чуде́с лучи́ облиста́ет,/ и ре́ки исцеле́ний ве́рным источа́ет от гро́ба своего́,/ от сме́рти бо к животу́ ве́чному пресели́ его́ Христо́с Бог, я́ко Своего́ уго́дника.\n\nПеснь 7\n\nИрмос: Тебе́, у́мную, Богоро́дице, пе́щь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.\n\nПрипев: Преподо́бне о́тче Иоáнне, моли́ Бо́га о на́с.\n\nХра́брый ревни́тель быв Илии́ проро́ку,/ на стра́сти устреми́лся еси́ ору́жием поста́/ и, на горе́ водворя́яся, а́лчбою па́че челове́к по́стнически умертви́л еси́ сра́мныя по́мыслы.\n\nПрипев: Преподо́бне о́тче Иоáнне, моли́ Бо́га о на́с.\n\nБо́жия пути́ пра́ваго восхоте́в, и мирска́го жела́ния отве́ргся,/ и на ка́мени разу́мнем стопы́ души́ твоея́ утверди́в,/ ка́мене собла́зна при стези́ всех избавля́еши и прило́гов искуше́ний.\n\nСла́ва Отцу́ и Сы́ну и Свято́му Ду́ху.\n\nО́крест ра́ки моще́й твои́х то́чатся чудеса́ исцеле́ний приходя́щим,/ Бо́гу бо коне́чне угоди́л еси́,/ ве́рующим обеща́вшему ре́ки из чре́ва источи́ти Боже́ственныя благода́ти.\n\nИ ны́не и при́сно и во ве́ки веко́в. Ами́нь.\n\nБогородичен: Глубину́ слы́шим прему́дрости, Пречи́стая,/ я́ко Созда́вшаго руко́ю Ада́ма и от ребра́ его́ жену́ Сотво́ршаго Сло́ва воплоти́ла еси́,/ И́же, в ре́бра на Кресте́ пробожде́н, род челове́ческий обнови́.\n\nПеснь 8\n\nИрмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.\n\nПрипев: Преподо́бне о́тче Иоáнне, моли́ Бо́га о на́с.\n\nИску́с врага́ доблему́дренно отрази́в во бра́ни кре́пцей/ и непобеди́м яви́вся бесо́вскими кова́рствы,/ побе́дными венцы́ увяза́лся еси́/ и, Го́сподеви ны́не предстоя́, мо́лишися о воспева́ющих тя.\n\nПрипев: Преподо́бне о́тче Иоáнне, моли́ Бо́га о на́с.\n\nСме́ртней кончи́не приспе́вшей вре́менней,/ оста́вил еси́ труды́ по́стническия,/ и, ве́чный поко́й восприи́м, Бо́гу предстои́ши,/ и, посреде́ луче́й неизрече́ннаго Божества́ сия́я, о нас мо́лишися.\n\nБлагослови́м Отца́ и Сы́на и Свята́го Ду́ха, Го́спода.\n\nРа́вне дре́внему патриа́рху Иа́кову вар дневны́й поне́с и сту́день нощну́ю претерпе́в,/ возше́л еси́ ле́ствицею доброде́телей на высоту́ боговиде́ния,/ о́тче Иоа́нне, чуде́с исто́чниче.\n\nИ ны́не и при́сно и во ве́ки веко́в. Ами́нь.\n\nБогородичен: А́гнице Пречи́стая, к Тебе́ прибега́ю:/ ду́шу мою́, страстьми́ оскверне́нную, вода́ми омы́й сле́зными,/ вода́ми благода́ти Ду́ха Бо́жия глубо́кий кал грех челове́ческих омы́вшая.\n\nПеснь 9\n\nИрмос: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти мо́лимся пе́щь,/ да Тя, Богоро́дице,/ непреста́нно велича́ем.\n\nПрипев: Преподо́бне о́тче Иоáнне, моли́ Бо́га о на́с.\n\nИзя́щныя по́чести по́двига твоего́ восприя́л еси́ терпе́нием твои́м,/ его́же ра́ди со А́нгелы водворя́ешися/ и за наготу́ теле́сную в Небе́сную ри́зу обле́клся еси́, в по́стницех всеизря́дне.\n\nПрипев: Преподо́бне о́тче Иоáнне, моли́ Бо́га о на́с.\n\nЛюбому́дрых собо́рище, ви́ждь,/ каковы́ми благода́тьми воздае́т Бог и́стинно Того́ добро́ты вожделе́вшим:/ ни естество́ бо, ни вре́мя телесе́ Иоа́нна пустыннолю́бнаго победи́,/ точа́щаго чудеса́ да́же доны́не.\n\nСла́ва Отцу́ и Сы́ну и Свято́му Ду́ху.\n\nЕли́ко си́ла скрижа́ли се́рдца моего́ распросте́р,/ вся написа́х мно́гия твоя́ благода́ти,/ но досто́йна ничесо́же принесо́х тебе́;/ те́мже молю́ тя:/ ве́ру приими́ и любо́вь, преблаже́нне.\n\nИ ны́не и при́сно и во ве́ки веко́в. Ами́нь.\n\nБогородичен: Вонми́ Дави́дских гу́слей провеща́нию, Дщи Царе́ва, и приклони́ у́хо Твое́./ Люде́й Твои́х не забу́ди, но уще́дри, Деви́це,/ и́же непреста́нно Тя сла́вящих.\n\nСветилен\n\nПустынножи́теля вси Иоа́нна ве́рно восхва́лим,/ А́нгела земна́го и челове́ка Небе́снаго,/ чуде́с мно́жество неиждива́емо нам точа́щаго.\n\nМолитва преподобному Иоанну Рыльскому\n\nЗемна́я звездо́ чуде́сная, облиста́вшая преде́лы гра́да Сре́дца, преди́вный по́стниче и уго́дниче Бо́жий, о́тче Иоа́нне, преподо́бных ра́дование, Це́ркве Бо́лгарския украше́ние, кре́пкий адама́нте ве́ры Правосла́вныя и живы́й све́щниче, всю зе́млю Бо́лгарскую све́том пра́вды Бо́жия осия́вый! Ты еси́ ско́рый помо́щник с ве́рою и любо́вию к тебе́ притека́ющим и вели́кий предста́тель пред Го́сподем о всех нас. Приими́, преблаже́нне, на́ша моле́ния и умоли́ Христа́ Бо́га на́шего, да вси тобо́ю наставля́емии лю́дие слове́нстии пребыва́ют сою́зом бра́тския любве́ связу́еми, в ми́ре и благоче́стии, и да изба́вит их Госпо́дь и вся гра́ды и страны́ христиа́нския от враг ви́димых и неви́димых и от наше́ствия иноплеме́нник, от неду́га и гла́да и вся́кия ско́рби, наипа́че же от искуше́ний врага́ те́мнаго. Предстоя́щим же зде и моля́щимся пред пречи́стым твои́м о́бразом испроси́, преподо́бне, у Го́спода Бо́га на́шего вся, я́же ко спасе́нию своему́ они́ про́сят, да вси с тобо́ю прославля́ем Всесвято́е И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.\n\nМолитва 2-я преподобному Иоанну Рыльскому\n\nО преподо́бне о́тче Иоа́нне, уго́дниче Госпо́день преизря́дный, те́плый наш засту́пниче и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́ и умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́ во всем житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ моея́ помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, и ны́не, и при́сно, и во ве́ки веко́в. Ами́нь.\n\nРекомендуем молитвы\n\nВеликий канон свт. Андрея Критского (с переводом на русский язык)\n\nИн канон Преполовения Пятидесятницы\n\nИн канон святителю Николаю, архиепископу Мир Ликийских, чудотворцу\n\nИн канон святому великомученику Феодору Тирону\n\nКанон Ангелу Хранителю Иоанна Мавропода, монаха\n\nVk·Tg·Max