Минея, 30 Августа.\nГлас 4\n\nПеснь 1\n\nИрмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.\n\nПрипев: Преподо́бне о́тче Алекса́ндре, моли́ Бо́га о на́с.\n\nБоже́ственнаго и Пресвята́го Ду́ха блиста́яся благода́тию,/ светоно́сное, Алекса́ндре, и честно́е соверша́ющих твое́ успе́ние,/ све́тлою моли́твою твое́ю страсте́й мглу очи́сти.\n\nПрипев: Преподо́бне о́тче Алекса́ндре, моли́ Бо́га о на́с.\n\nОт ю́ности, преподо́бне, яре́м Госпо́день восприе́м,/ в бразда́х твоего́ се́рдца пшени́цу се́ял еси́ духо́вну/ и клас пожа́л еси́, утвержда́ющ ду́ши, Богоблаже́нне.\n\nСла́ва Отцу́ и Сы́ну и Свято́му Ду́ху.\n\nСветоно́сная па́мять твоя́ нам дне́сь возсия́,/ я́ко со́лнечная луча́, Алекса́ндре, исправле́ний твои́х, страсте́й на́ших отъе́млющи о́блак,/ ю́же сотворя́юще, ве́рою тя и любо́вию ублажа́ем.\n\nИ ны́не и при́сно и во ве́ки веко́в. Ами́нь.\n\nБогородичен: Зачала́ еси́, Пречи́стая,/ неизрече́нным сло́вом содержа́щаго земны́я концы́ и Сего́ родила́ еси́,/ Его́же моли́ приле́жно поми́ловати нас.\n\nПеснь 3\n\nИрмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.\n\nПрипев: Преподо́бне о́тче Алекса́ндре, моли́ Бо́га о на́с.\n\nЖезло́м воздержа́ния страстно́е мо́ре, о́тче, раздели́в, преше́л еси́ неистопле́н,/ и преде́л дости́гл еси́ и́стиннаго безстра́стия,/ и, Бо́гу предстоя́, бесе́довал еси́ ума́ чистото́ю.\n\nПрипев: Преподо́бне о́тче Алекса́ндре, моли́ Бо́га о на́с.\n\nКто твоя́ по́двиги, Алекса́ндре, по достоя́нию изрещи́ возмо́жет?/ Ты бо, пути́ жесто́кия в пусты́ни ше́ствуя, су́рово бы́лие ял еси́,/ вкуше́ние же отлага́л еси́ пи́щи боле́зньми воздержа́ния.\n\nСла́ва Отцу́ и Сы́ну и Свято́му Ду́ху.\n\nЯ́ко ма́слина плодови́та в дому́ Госпо́дни, прозя́бл еси́,/ ма́слом трудо́в твои́х, Алекса́ндре, умаща́я на́ша ли́ца;/ пою́щия тя, преподо́бне и Богоблаже́нне, вся ны посети́, моля́ся Человеколю́бцу.\n\nИ ны́не и при́сно и во ве́ки веко́в. Ами́нь.\n\nБогородичен: Из Тебе́, Чи́стая, Цвет неувяда́емый,/ благоуха́я все челове́чество Боже́ственным ми́ром естества́ Своего́,/ И́же Отцу́ Собезнача́льный, из Тебе́ быв под ле́том, Де́во Всенепоро́чная.\n\nСедален, глас 8\n\nОт ю́ности вся оста́вль жите́йская, кра́сная же и ле́потная,/ и в пусты́ню всели́вся, усе́рдно после́довал еси́ Зва́вшему тебе́, преподо́бне,/ в труде́х же и посте́х, о́тче, те́ло твое́ изнури́л еси́./ Отону́дуже тя па́стыря свои́м овца́м до́бре устроя́ет всебога́тый Госпо́дь, Алекса́ндре блаже́нне./ Моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.\n\nСла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.\n\nБогородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ о́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.\n\nПеснь 4\n\nИрмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.\n\nПрипев: Преподо́бне о́тче Алекса́ндре, моли́ Бо́га о на́с.\n\nВе́трилом, о́тче, Креста́, душе́вный твой кора́бль окорми́в,/ благоути́шно же и легко́ жите́йскаго лю́таго потопле́ния избе́гл еси́/ и к тишине́ Боже́ственных извле́кл еси́ приста́нищ, ра́дуяся.\n\nПрипев: Преподо́бне о́тче Алекса́ндре, моли́ Бо́га о на́с.\n\nОбрета́я, о́тче, сам себе́, всеблаже́нне,/ всю но́щь стоя́л еси́, я́ко безпло́тен,/ недрема́нно о́ко име́л еси́ и чи́сто, я́коже зерца́ло, духо́вною заре́ю/ и Боже́ственная явле́ния чи́стым по́мыслом прие́мля.\n\nСла́ва Отцу́ и Сы́ну и Свято́му Ду́ху.\n\nЯ́ко Боже́ственный зри́тся рай, прему́дре, храм, име́я в себе́ твои́х моще́й ра́ку,/ цве́ты принося́ чуде́сныя, и́миже сердца́ наслажда́ются/ ве́рою, Алекса́ндре, при́сно хва́лящих тя.\n\nИ ны́не и при́сно и во ве́ки веко́в. Ами́нь.\n\nБогородичен: Свята́я Богоро́дице, освяти́ нас,/ Я́же Пресвята́го Бо́га ро́ждши пло́тию,/ уподо́битися восхоте́вша челове́ком,/ и Небе́снаго жития́ вся покажи́, Пречи́стая, прича́стники моли́твами Твои́ми.\n\nПеснь 5\n\nИрмос: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.\n\nПрипев: Преподо́бне о́тче Алекса́ндре, моли́ Бо́га о на́с.\n\nПросвеща́емь заре́ю, о́тче, невече́рнею и Боже́ственным облиста́нием,/ бесо́вский мрак и страстну́ю мглу отгна́л еси́,/ и яви́лся еси́ столп светоза́рен,/ ле́ствица вои́стинну, к Бо́гу ве́рныя возводя́щи.\n\nПрипев: Преподо́бне о́тче Алекса́ндре, моли́ Бо́га о на́с.\n\nБодр ум всегда́ име́я, о́тче Богому́дре Алекса́ндре,/ стра́сти успи́л еси́ душетле́нныя,/ к Боже́ственному светозаре́нию хотя́ дости́гнути, к незаходи́маго Све́та све́тлости,/ иде́же есть веселя́щихся жили́ще.\n\nСла́ва Отцу́ и Сы́ну и Свято́му Ду́ху.\n\nЯ́ко очи́стившу помышле́ния, преподо́бне,/ благода́ть тебе́ даде́ся, я́ко проро́ку:/ я́ко настоя́щая, глаго́леши бу́дущая,/ зри́ши же да́льняя, я́ко бли́жняя, Алекса́ндре, Бо́жие оби́телище.\n\nИ ны́не и при́сно и во ве́ки веко́в. Ами́нь.\n\nБогородичен: Ро́ждши, Пренепоро́чная, Бо́га Емману́ила,/ и Челове́ка я́ве за милосе́рдие бы́вша,/ Его́же моли́, я́ко Человеколю́бца, Чи́стая, уще́дрити лю́ди согре́шшия.\n\nПеснь 6\n\nИрмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.\n\nПрипев: Преподо́бне о́тче Алекса́ндре, моли́ Бо́га о на́с.\n\nНеболе́зненную жи́знь в боле́знех восприя́л еси́/ и боле́зней лю́тых уставля́еши озлобле́ния/ ве́рою прося́щим прия́ти исцеле́ние, Алекса́ндре всече́стне./ Те́мже разреши́ боле́зни на́ша душе́вныя и теле́сныя.\n\nПрипев: Преподо́бне о́тче Алекса́ндре, моли́ Бо́га о на́с.\n\nК ра́це твое́й свяще́нней приступа́юще,/ благоуха́ния Боже́ственнаго ра́зума исполня́емся, преблаже́нне Алекса́ндре,/ смра́да избавля́ющеся страсте́й, любо́вию тя чту́щии, о́тче преподо́бне.\n\nСла́ва Отцу́ и Сы́ну и Свято́му Ду́ху.\n\nИсправля́еши, о́тче, хромы́х и о́чи просвеща́еши слепы́х,/ ходи́ти же твори́ши разсла́бленных о Христе́/ и отго́ниши ду́хи лука́выя, Алекса́ндре преподо́бне.\n\nИ ны́не и при́сно и во ве́ки веко́в. Ами́нь.\n\nБогородичен: На Тя, я́ко до́ждь на руно́, сшед, Богоро́дице, Спас/ изсуши́ я́ве пото́ки безбо́жия,/ ду́ши же на́ша напая́я всегда́, при́сно чту́щия Тя.\n\nКондак, глас 8\n\nЯ́ко многосве́тлая звезда́,/ дне́сь в страна́х росси́йских возсия́л еси́, о́тче,/ всели́вся в пусты́ню,/ Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем – Честны́й Крест,/ умертви́л еси́ труды́ по́двиг твои́х теле́сная взыгра́ния./ Те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся, преподо́бне Алекса́ндре, о́тче наш.\n\nИкос\n\nКа́ко восхвалю́ твоя́ по́двиги и боре́ния, преподо́бне Алекса́ндре?/ Я́ко невеще́ствен ра́зум стяжа́в смире́нием,/ житие́ твое́ препроводи́л еси́ зе́льным воздержа́нием трудо́в твои́х./ А́ще у́бо и челове́к был еси́ естество́м,/ но Вы́шняго Иерусали́ма яви́лся еси́ граждани́н:/ с пло́тию бо на земли́ пожи́л еси́,/ но а́нгельское пребыва́ние проше́д и был еси́ столп, страстьми́ непотрясо́м./ Тем вся Росси́йская земля́, тобо́ю обога́щшися, хва́лит тя/ и ве́рою велича́ет, взыва́ющи тебе́ такова́я:/ ра́дуйся, оте́честву твоему́ похвала́,/ Вели́кому же Нову́гра́ду и всей стране́ Росси́йстей пресве́тлый свети́льниче./ Ра́дуйся, и́же благочести́ва отца́ пресла́вная о́трасль/ и благогове́йны ма́тере ве́твь многопло́дна./ Ра́дуйся, целому́дрия непрекло́нный сто́лпе и мона́хов пресве́тлая сла́ва./ Ра́дуйся, па́стырю Христо́вы огра́ды слове́сных ове́ц,/ и́хже к Бо́жию приводя́ ра́зуму./ Ра́дуйся, ты бо многоча́дну пусты́ню возде́лал еси́ высото́ю смире́ния твоего́./ Ра́дуйся, мона́шествующих всех о́браз доброде́тели и единообра́зных ла́вры спасе́ние./ Ра́дуйся, кра́сное доброде́телей храни́лище и всем, в печа́ли уныва́ющим, утеше́ние./ Ра́дуйся, я́ко, вся ми́ра сего́ мудрова́ния презре́в, стра́сти плотски́я умертви́л еси́./ Ра́дуйся, я́ко А́нгелом собесе́дник бы́ти сподо́бился еси́/ и вся бесо́вския полки́ посрами́л еси́./ Ра́дуйся, ты бо во всех страна́х просла́влен был еси́,/ о Христе́ бо мно́га чудеса́ сотвори́л еси́./ Ра́дуйся, я́ко вои́стинну обре́л еси́ Бо́жию благода́ть/ и со А́нгелы при́сно зре́ти сподо́бился еси́ лице́м к лицу́ Святу́ю Тро́ицу./ Ра́дуйся, я́ко второ́е со́лнце, сия́я чудесы́, всем да́руеши благода́ть исцеле́ний./ Ра́дуйся, преподо́бне Алекса́ндре, о́тче наш.\n\nПеснь 7\n\nИрмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.\n\nПрипев: Преподо́бне о́тче Алекса́ндре, моли́ Бо́га о на́с.\n\nОсвя́щься от младе́нства доброгла́сною трубо́ю моли́твы твоея́,/ и непло́дныя утро́бы многопло́дны сотвори́л еси́,/ слепы́м подае́ши прозре́ние и хромы́м благотече́ние, Алекса́ндре преблаже́нне.\n\nПрипев: Преподо́бне о́тче Алекса́ндре, моли́ Бо́га о на́с.\n\nСле́зными излия́нии погаси́л еси́ страсте́й разжже́ния, Алекса́ндре блаже́нне,/ чуде́с источи́л еси́ струи́ присноживо́тны,/ и́миже омыва́ются душ же и теле́с неду́зи, пресла́вне.\n\nСла́ва Отцу́ и Сы́ну и Свято́му Ду́ху.\n\nТерпе́ние стяжа́в мно́гое, прему́дре, воздержа́ние, ве́ру и любо́вь и́стинну,/ яви́лся еси́ оте́ц си́рым,/ вдови́цам – засту́пник ми́лостив и смире́н, Алекса́ндре,/ мона́хом – сла́ва и похвала́.\n\nИ ны́не и при́сно и во ве́ки веко́в. Ами́нь.\n\nБогородичен: Ка́ко дои́ши млеко́м Сы́на, Чи́стая, без отца́,/ пита́ющаго вся́кое дыха́ние, Ма́ти Пречи́стая?/ Ка́ко на руку́ но́сиши вся содержа́щаго?/ Па́че ума́ чу́до Твое́./ Тем пое́м вели́чия Твоя́.\n\nПеснь 8\n\nИрмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.\n\nПрипев: Преподо́бне о́тче Алекса́ндре, моли́ Бо́га о на́с.\n\nУмо́м безстра́стия очище́н, бесе́довал еси́ Го́сподеви Вседержи́телю,/ от Него́же неизглаго́ланно, преподо́бне, науча́емь, проро́чески предглаго́лал еси́,/ просвеща́я ду́ши, я́ко вели́к, всеблаже́нне, проро́к./ Тем тя согла́сно, Алекса́ндре прему́дре, ве́рнии, похваля́ем, пою́ще:/ благослови́те, вся дела́ Госпо́дня, Го́спода.\n\nПрипев: Преподо́бне о́тче Алекса́ндре, моли́ Бо́га о на́с.\n\nПодава́я тебе́, я́же проти́ву любве́, Зижди́тель и от ю́ности соблюда́я тя десни́цею,/ ма́лым бы́лием, самовозра́стшим от земли́, пита́ет тя боголе́пно,/ я́ко от младе́нства вся́ко похоте́ние попра́вша и пою́ща:/ благослови́те, вся дела́ Госпо́дня, Го́спода.\n\nБлагослови́м Отца́ и Сы́на и Свята́го Ду́ха, Го́спода.\n\nЯ́ко струя́ боже́ственна исцеле́ний, происходя́щи от ра́ки твоея́, вся исцеля́ет,/ и омыва́ет скве́рны страсте́й, и гное́ние лю́тых очища́ет,/ и ве́рных напая́ет всех сердца́, Алекса́ндре прему́дре, любо́вию пою́щих:/ благослови́те, вся дела́ Госпо́дня, Го́спода.\n\nИ ны́не и при́сно и во ве́ки веко́в. Ами́нь.\n\nБогородичен: Вопло́щся Безпло́тный из Тебе́ боголе́пно,/ Его́же моли́, Пречи́стая, стра́сти пло́ти моея́ умертви́ти/ и оживи́ти мою́ умерщвле́нную ду́шу грехми́.\n\nПеснь 9\n\nИрмос: Ка́мень нерукосе́чный/ от несеко́мыя горы́́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.\n\nПрипев: Преподо́бне о́тче Алекса́ндре, моли́ Бо́га о на́с.\n\nТвоя́ свяще́нныя и святы́я мо́щи, во гро́бе лежа́ща,/ многоразли́чныя неду́ги исцеля́ют и попаля́ют полки́ бесо́вския всегда́, му́дре Алекса́ндре:/ Бо́жиею бо благода́тию то́чиши всем исцеле́ния, ве́рно тя при́сно блажа́щим.\n\nПрипев: Преподо́бне о́тче Алекса́ндре, моли́ Бо́га о на́с.\n\nСтруи́ нам исцеле́ний всегда́ честна́я твоя́ ра́ка яви́ся, о́тче,/ страсте́й излия́ние вся́ческих изсуша́ющи/ и вся напоя́ющи ду́ши ко благопло́дию Боже́ственному, прему́дре Алекса́ндре, Христо́в уго́дниче.\n\nСла́ва Отцу́ и Сы́ну и Свято́му Ду́ху.\n\nПа́мять твоя́ дне́сь, я́ко со́лнце, возсия́, Алекса́ндре преблаже́нне,/ благочести́вых сердца́ озаря́ющи боле́зней твои́х и чуде́с сия́нием,/ я́ко вои́стинну просвеща́ющи, о́тче,/ в то́же вся ны помяни́, ве́рно чту́щия тя.\n\nИ ны́не и при́сно и во ве́ки веко́в. Ами́нь.\n\nБогородичен: Глас прино́сим Ти Гаврии́лов, ра́дующеся:/ ра́дуйся, глаго́люще, ме́сто свяще́ния,/ ра́дуйся, преподо́бных сла́во и всех ве́рных спасе́ние,/ ея́же ра́ди обожи́хомся, Богоро́дице Присноде́во.\n\nСветилен\n\nБлагода́ть преизбы́сть Бо́жия в души́ твоея́, прему́дре Алекса́ндре,/ и, я́ко безпло́тен, на земли́ пожи́л еси́./ Тем почита́ющих тя страсте́й изба́ви те́мных о́блак, к ти́хому приста́нищу приводя́/ и отгоня́я ополче́ния бесо́вская Боже́ственною си́лою.\n\nСла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.\n\nБогородичен: Сотвори́ вои́стинну с Тобо́ю вели́чия Сын Преве́чный О́тчим сове́том:/ Жи́знь бо нетле́нную без стра́сти родила́ еси́/ и пребыла́ еси́, я́коже пре́жде рождества́, Де́ва, ма́терских избе́гши боле́зней/ и по рождестве́ Де́вою пребы́вши.\n\nМолитва\n\nО свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Алекса́ндре, изря́дный уго́дниче Пресвяты́я и Единосу́щныя Тро́ицы, явля́яй мно́гия ми́лости живу́щим во святе́й оби́тели твое́й и всем с ве́рою и любо́вию притека́ющим к тебе́! Испроси́ нам вся благопотре́бная к житию́ сему́ вре́менному и ну́жная к ве́чному спасе́нию на́шему. Посо́бствуй и предста́тельством твои́м, уго́дниче Бо́жий, на враги́ ви́димыя и неви́димыя, да в ми́ре глубо́це пребу́дет Свята́я Правосла́вная Це́рковь Христо́ва и благострое́нии зи́ждется, во вся́ком благоче́стии неруши́мо. Бу́ди всем нам, чудотво́рче святы́й, помо́щник ско́рый во вся́кой ско́рби и обстоя́нии. Наипа́че же в час кончи́ны на́шея яви́ся нам засту́пник благосе́рдый, да не пре́дани бу́дем на мыта́рствех возду́шных вла́сти зло́бнаго мироде́ржца, но да сподо́бимся непреткнове́ннаго восхо́да в Ца́рствие Небе́сное. Ей, о́тче, моли́твенниче наш при́сный! Не посрами́ упова́ния на́шего, не пре́зри смире́нная моле́ния на́ша и предста́тельствуй за нас пред Престо́лом Живонача́льныя Тро́ицы, да сподо́бимся вку́пе с тобо́ю и со все́ми святы́ми мы, недосто́йнии, в селе́ниих ра́йских сла́вити вели́чие, благода́ть и ми́лость Еди́наго в Тро́ице Бо́га, Отца́, и Сы́на, и Свята́го Ду́ха, во ве́ки веко́в. Ами́нь.\n\nРекомендуем молитвы\n\nВеликий канон свт. Андрея Критского (с переводом на русский язык)\n\nИн канон Преполовения Пятидесятницы\n\nИн канон святителю Николаю, архиепископу Мир Ликийских, чудотворцу\n\nИн канон святому великомученику Феодору Тирону\n\nКанон Ангелу Хранителю Иоанна Мавропода, монаха\n\nVk·Tg·Max