Кондак 1\n\nВозбранный чудотворче и Духа Святаго исполненный, преподобный отче Моисее, дивный подвижниче и недугов душевных и телесных целебниче, яко имеяй дерзновение ко Господу, от всяких нас бед свободи да в радости сердца зовем ти:\n\nРадуйся, преподобне отче Моисее, дивный чудотворче и чистоты поборниче.\n\nИкос 1\n\nАнгелов Творец и Господь сил яви тя, досточудне, Ангела во плоти и верных предстателя. Прибегающе убо к заступлению твоему, сицевая радостная тебе приносим:\n\nРадуйся, ангельския чистоты ревнителю; радуйся, предобрый иноков наставниче.\n\nРадуйся, целомудрия дивное светило; радуйся, усердный исполнителю поста и воздержания.\n\nРадуйся, светлый образе кротости и смирения; радуйся, утешение верным являяй.\n\nРадуйся, обителей земных покровителю небесный; радуйся, ярем благий на ся вземший.\n\nРадуйся, преподобне отче Моисее, дивный чудотворче и чистоты поборниче.\n\nКондак 2\n\nВидя Господь чистоту сердца твоего, избра тя зрети славу небесную. Егда с двумя братиями твоими во град Киев преселился еси и святым страстотерпцем Борису и Глебу усердно поработал еси, тогда ты, блаженне, в молитвах потщался еси, елико бе мощно юноше святым подражати. Сего ради с веселием возопиял еси Богу: Аллилуиа.\n\nИкос 2\n\nРазум богодухновен имея, о преподобне отче Моисее, дивным смотрением Божиим, егда на реце Альте брата твоего Георгия вои Святополка погубиша вкупе со святыми страстотерпцами Борисом и Глебом, ты же един избавився убиения, пришел во град Киев к Предиславе сестре Ярославлей и был тамо моляся ко Господу прилежно, темже похваляюще Бога, спасшаго тя, глаголем ти сице:\n\nРадуйся, начало премудрости страх Божий правилом жизни себе предъизбравый; радуйся, яко Ангела хранителя николиже опечалил еси.\n\nРадуйся, лучу Божественного света; радуйся, благоуханный крине девства и нетления.\n\nРадуйся, яко благочестием твоим угодил еси Христу Богу; радуйся, к Богородице молитвенниче наш неусыпный.\n\nРадуйся, немощей наших изрядный целебниче.\n\nРадуйся, избранный сосуде Духа Святаго.\n\nРадуйся, преподобне отче Моисее, дивный чудотворче и чистоты поборниче.\n\nКондак 3\n\nСилою Вышняго, дарованною тебе, и долготерпением твоим был еси вельми преукрашен, егда же ведоша тя по руку и ногу железы тяжкими окована и твердо стрежаху, любовию к Богу выну пламенея, вопиял еси: Аллилуиа.\n\nИкос 3\n\nИмея благоприятную по благочестии ревность, был еси искушаем от некия жены младыя, имущей богатство многое, ея же муж с Болеславом идый не возвратися; та убо приемши во ум видения, доброту уязвися вожделением плотским к преподобному, он же вся терпя моляшеся. Сему убо благоговейно удивляющеся, с радостию вопием тебе:\n\nРадуйся, от млада возраста вдавый себя на служение Господу; радуйся, Того Единого паче всего возлюбивый.\n\nРадуйся, плоть духу покоривый; радуйся, вся по Бозе терпети изволивый.\n\nРадуйся, козни вдовы бодро отразивый; радуйся, тесным путем евангельским шествовавший.\n\nРадуйся, Киево-Печерския Лавры священное украшение; радуйся, яко тобою Господь прославляется.\n\nРадуйся, преподобне отче Моисее, дивный чудотворче и чистоты поборниче.\n\nКондак 4\n\nБурею одержима помышлений, восшуме нечестивая вдова на храм души твоея, преподобне, уведев же тя верного быти раба Христова, зело смятеся, темже и мы, зря житейское море воздвигаемое бурею страстей и напастей, притекаем к тихому пристанищу молитв твоих, вопия Христу Богу: Аллилуиа.\n\nИкос 4\n\nСлышавше и видевше святое житие твое, удивляхуся силе благодати, из уст твоих исходящей, и прославляху Бога, сего ради и мы радостно ублажаем тя:\n\nРадуйся, дивный избранниче Божий; радуйся, суетную славу мира сего во уметы вменивый; радуйся, за Сладчайшаго Иисуса душу твою положивый; радуйся, у престола Божия предстояй с горними силами; радуйся, на высоту безстрастия возшедый; радуйся, преподобне отче, в терпении неодоленный.\n\nРадуйся, Света Невечерняго причастниче.\n\nРадуйся, велию благодать от Господа стяжавый.\n\nРадуйся, преподобне отче Моисее, дивный чудотворче и чистоты поборниче.\n\nКондак 5\n\nБоготечною звездою яви тя миру житие твое, преподобне отче Моисее, яко всего паче возлюбил еси чистоту душевную и телесную и ради мук временных уповая избавлен быти вечных мук, воспевал еси благодарне Богу: Аллилуиа.\n\nИкос 5\n\nВидя враг рода человеческаго чистое и святое житие твое, паче распаляет вдову, яже облече тя во ризы многоценныя и сладкими брашны питаше, безстудно влачаше на дело непреподобное, ты же, отче святый, прилежаше паче посту и молитве. Сего ради воспеваем ти сице:\n\nРадуйся, добрый воине Христов; радуйся, Святыя Церкве похвало и радование.\n\nРадуйся, дарами благодатными преисполненный; радуйся, не словом точию, но множае паче делом нас поучаяй.\n\nРадуйся, различными напастьми и искушеньми отягченных скоро пособствующий; радуйся, избранниче Христов, чудесы свидетельствованный.\n\nРадуйся, в подвигах земное течение совершивый; радуйся, сподобившийся зрети славу Божию.\n\nРадуйся, преподобне отче Моисее, дивный чудотворче и чистоты поборниче.\n\nКондак 6\n\nПроповедуется во всем мире доблесть подвига твоего, блаженне, ибо ни во что же вменял еси житие мира сего. Гладом умысли злая жена уморити тя, вверженного в темницу. Друзии же увещаваху тя, глаголюще: кто не посмеется твоему безумию; уне ти есть покоритися жене сей. Ты же, блаженне, рече: вышняго ради Царства вся сия преобидех, поя Богу: Аллилуиа.\n\nИкос 6\n\nВозсиял еси в бренной плоти светом небесным, глаголя слова Евангельския: не оженивыйся печется о Господних, како угодити Господеви. Тем же вопием ти:\n\nРадуйся, отче, светом добродетелей твоих мир озаривый; радуйся, огнь любве Христовы в себе носивый.\n\nРадуйся, в бедах скорый помощниче; радуйся, ангельское житие являяй.\n\nРадуйся, не приложивый сердца к земному наслаждению; радуйся, молитвенниче о чтущих святую память твою.\n\nРадуйся, покоя вечного достигнувый.\n\nРадуйся, неизреченных благ наследниче.\n\nРадуйся, преподобне отче Моисее, дивный чудотворче и чистоты поборниче.\n\nКондак 7\n\nХотяй непрестанно житием и верою Господу благоугождати, был еси от черноризца святыя Афонския горы облечен во святый, ангельский, иноческий образ, тем же сиянием подвигов твоих просвещенни усердно величаем тя прославльшему тя Христу Богу вопием: Аллилуиа.\n\nИкос 7\n\nНовое показа зло оная лукавая жена егда в безумии своем оскопити тя повелела, ты же яко мертв лежал еси от течения крове, едва мало в себе дыхания имея. Благоговейне убо вспоминая долготерпение твое, блажим тя похвалами сими:\n\nРадуйся, яко огнь любве к Богу в сердце твоем непрестанно сохранивый; радуйся, бодрости и трезвения предобрый учителю.\n\nРадуйся, верных ко спасению наставляющий,\n\nРадуйся, твердее адаманта в терпении явивыйся, ибо кровию твоею, яко багряницею Церковь украсися.\n\nРадуйся, к преподобному Антонию работати Господеви пришедый.\n\nРадуйся, чудесы твоими обитель Печерскую прославивый.\n\nРадуйся, покоривый волю свою воле Отца Небесного.\n\nРадуйся, преподобне отче Моисее, дивный чудотворче и чистоты поборниче.\n\nКондак 8\n\nСтранное чудо является притекающим к тебе, блаженне Моисее, ибо дарова тебе Господь побеждати страсти. Таже подражая первому Моисею, творящему жезлом чудеса, жезлом страсть братнюю исцелил еси. Мы же, благодаря о сем Бога, даровавшему тебе таковую крепость, с любовию взываем: Аллилуиа.\n\nИкос 8\n\nВесь благодатных дарований исполненный, десятолетным безмолвием пещерным равноангельским просиял еси светом небесным и сподобился еси боговидец быти, обретеся бо достоин блаженства чистых сердцем, преподобне отче Моисее. Сего ради по долгу зовем ти:\n\nРадуйся, яко тобою Господь от страстей исцеление дарует; радуйся, блаженне, заповедь чистым сердцем быти верно исполнивый.\n\nРадуйся, яко свет Божественный зрети сподобился еси; радуйся, о душах наших непрестанный молитвенниче.\n\nРадуйся, древних, святых, богоносных отец нравы себе усвоивый; радуйся, высокая преподобных похвало.\n\nРадуйся, во смирении зело преуспевый; радуйся, яко успение твое прославляет Святая Церковь .\n\nРадуйся, преподобне отче Моисее, дивный чудотворче и чистоты поборниче.\n\nКондак 9\n\nВсе естество ангельское удивися высоте чистоты твоея, Церковь же паки прославляет тя, яко великий таинник Божия благодати был еси и зрети лицем к лицу Господа удостоился еси, да и мы с тобою выну вопием: Аллилуиа.\n\nИкос 9\n\nВитии многовещаннии не возмогут изрещи чистоту твою, блаженне, мы же любовию побеждаеми дерзаем воспети тебе похвалы таковая:\n\nРадуйся, немощных укрепление; радуйся, скорбных и печальных утешение; радуйся, добрых насадителю; радуйся, за девственную чистоту от Господа венчанный.\n\nРадуйся, Божия славы теплый рачителю, радуйся, талант врученный ти умноживый.\n\nРадуйся, Христа Бога всем сердцем возлюбивый; радуйся, светильниче, просвещающий сердца память твою чтущих.\n\nРадуйся, преподобне отче Моисее, дивный чудотворче и чистоты поборниче.\n\nКондак 10\n\nСпасти хотя твою душу, нерадил еси о твоей плоти и в Лавре Печерстей святаго Антония конец странствия земнаго совершил еси, почив о Господе кончиною праведною и святою, яко победитель не с человеки, но со Ангелы воспевал еси Богу: Аллилуиа.\n\nИкос 10\n\nСтеною терпения оградився, Царя Небеснаго Христа верный служитель был еси, житие твое тесною стезею прошел еси. Мы же чтуще любовию память твоего преставления и мощей твоих честных обретения, ублажаем тя, вопиюще таковая:\n\nРадуйся, преславный наш заступниче; радуйся, предваряющий прошения призывающих тя во искушениях; радуйся, многими скорбьми в радость Господа вшедый; радуйся, слез излияньми душу твою омывый; радуйся, слово апостольское: любы долготерпит, исполнивый.\n\nРадуйся, блаженство райское со святыми унаследовавый; радуйся, богоугодным житием веру утвердивый.\n\nРадуйся, ближним и дальним помощь свою подаваяй; радуйся, мира горняго блаженный обитателю.\n\nРадуйся, преподобне отче Моисее, дивный чудотворче и чистоты поборниче.\n\nКондак 11\n\nПением акафиста чествуем тя и величаем, преподобне отче Моисее, ревностно совершающе святую память твою. Ты же, милостиво приимше малое моление наше, буди нам поборником, предстателем и молитвенником ко Господу. Мы же, поминая житие твое богоугодное и подвиги твоя многотрудныя, воспеваем прославльшему тя Творцу: Аллилуиа.\n\nИкос 11\n\nСветоподательному светильнику подобны честныя и цельбоносныя мощи твоя, досточудне отче Моисее, свет бо невечерний возсиявает от них чрез чудесы обильныя, тем же от любве сердечныя восклицаем тебе радостно:\n\nРадуйся, смертию временной прешедый в живот вечный; радуйся, Иоанна Многострадального чудесно уврачевавый.\n\nРадуйся, крине возращенный на земли для райских селений; радуйся, делателю добрый винограда небеснаго.\n\nРадуйся, маслино многоплодная сада Иисусова; радуйся, преподобных Печерских отцев величание.\n\nРадуйся, тихое пристанище обуреваемых страстьми; радуйся, во всем мире Богом прославленный.\n\nРадуйся, преподобне отче Моисее, дивный чудотворче и чистоты поборниче.\n\nКондак 12\n\nБлагодать дана ти от Бога соблюдати от нечистыя страсти всякаго человека, с верою и любовию к заступлению твоему прибегающего. Мы же Господу, даровавшему нам тебе, скорого, милостиваго врачевателя, благодарственне воспеваем: Аллилуиа.\n\nИкос 12\n\nПоюще равноангельское житие твое, ублажаем тя, отче Моисее, яко молитвенника о нас пред Господем, заступника и наставника ко спасению, и со умилением возглашаем ти таковая:\n\nРадуйся, о мире молитвенниче преизрядне; радуйся, не точию иноком, но и миряном путь к небу озаряющий.\n\nРадуйся, всех сердца любовию твоею к себе привлекающий; радуйся множеством чудес от Бога прославленный.\n\nРадуйся, странниче, отечествия небеснаго достигнувый; радуйся, терпением скорбей древнему Иову подражавый.\n\nРадуйся, во искушениях присный помощниче; радуйся, миро целебное Божия благодати.\n\nРадуйся, о тебе бо радуются Ангели и Бога славят человецы.\n\nРадуйся, преподобне отче Моисее, дивный чудотворче и чистоты поборниче.\n\nКондак 13\n\nО, предивный угодниче и святый чудотворче, преподобне отче Моисее, малое сие песнословие, с любовию в похвалу тебе приносимое, от нас милостивно приемши, умоли всех Творца и Господа даровати нам душевное спасение и телесное здравие, верно воспевающих Богу: Аллилуиа.\n\n[Се́й конда́к глаго́лется три́жды.]\n[Далее повторяем 1‑е икос и кондак:]\n\nИкос 1\n\nАнгелов Творец и Господь сил яви тя, досточудне, Ангела во плоти и верных предстателя. Прибегающе убо к заступлению твоему, сицевая радостная тебе приносим:\n\nРадуйся, ангельския чистоты ревнителю; радуйся, предобрый иноков наставниче.\n\nРадуйся, целомудрия дивное светило; радуйся, усердный исполнителю поста и воздержания.\n\nРадуйся, светлый образе кротости и смирения; радуйся, утешение верным являяй.\n\nРадуйся, обителей земных покровителю небесный; радуйся, ярем благий на ся вземший.\n\nРадуйся, преподобне отче Моисее, дивный чудотворче и чистоты поборниче.\n\nКондак 1\n\nВозбранный чудотворче и Духа Святаго исполненный, преподобный отче Моисее, дивный подвижниче и недугов душевных и телесных целебниче, яко имеяй дерзновение ко Господу, от всяких нас бед свободи да в радости сердца зовем ти:\n\nРадуйся, преподобне отче Моисее, дивный чудотворче и чистоты поборниче.\n\nМолитва преподобному Моисею Угрину\n\nО, пречудный и богоносный отче Моисее, изрядный угодниче Христов и великий чудотворче, к тебе смиренно припадаем и молимся: даждь нам быти причастником любве твоея ко Богу и ближнему, помози нам творити волю Господню в простоте сердца и смирении, заповеди Господни совершати непогрешительно, призри благоутробно на всякую душу верных твоих чтителей, милости и помощи твоея ищущих. Ей, всеблагий угодниче Божий, услыши нас, молящихся тебе, и не презри нас, требующих твоего заступления и достойную песнь тебе приносящих, тебе ублажаем, отче Моисее, тя воспеваем, чистоты светильниче, прославляюще милостиваго Бога, во Святей Безначальней Троице славимаго Отца и Сына и Святаго Духа, ныне и присно и во веки веков. Аминь.\n\nРекомендуем молитвы\n\nАкафист архангелу Божию Михаилу\n\nАкафист благоверному князю Андрею Боголюбскому\n\nАкафист благоверному князю Игорю Черниговскому и Киевскому\n\nАкафист Благовещению Пресвятой Богородицы\n\nАкафист благодарственный по святом Причащении\n\nVk·Tg·Max