Кондак 1\n\nИзбранный от Воеводы и Господа воинств небесных, преподобне отче наш Савво, силою креста Господня победивый напасти, яже от диавола, мира и плоти, яко имея дерзновение ко Господу, от всяких искушений, бед и наветов вражиих молитвами твоими сохраняй нас, похвальная с любовию тебе воспевающих;\n\nРадуйся, отче наш Савво, чудотворче преславный.\n\nИкос 1\n\nАнгел во плоти явился еси на земли, преподобне Савво, от юности бо возлюбив Бога, равноангельному поревновал еси житию учителя твоего, преблаженнаго Сергия, и послужив Господеви в правде и преподобии во вся дни живота своего, по исходе нетлением телесе сияеши. Вси убо благоговейно чтуще тя, воспеваем сице:\n\nРадуйся, истинный святаго учителя твоего ревнителю;\n\nРадуйся, земный ангеле и небесный человече.\n\nРадуйся, верный слуго Господень;\n\nРадуйся, усердный чистоты и воздержания хранителю.\n\nРадуйся, зерцало веры благочестивыя;\n\nРадуйся, образе кротости духовныя.\n\nРадуйся, пустынножителей красото;\n\nРадуйся, иноков наставниче.\n\nРадуйся, многим ко спасению путеводителю;\n\nРадуйся, скорый помощниче притекающим к тебе с верою.\n\nРадуйся, отче наш Савво, чудотворче преславный.\n\nКондак 2\n\nВидя, яко в мире сем всяческая суета и тление, потщался еси тесным и прискорбным путем течение жизни сея совершити; вселився во обители преподобнаго Сергия, и от него прияв ангельский образ, поревновал еси богомудрому его смирению и трудолюбию, и купно с ним день и нощь воспевал еси Спасителю, всех Богу: Аллилуиа.\n\nИкос 2\n\nРазум и сердце покорив Христу Спасителю, глаголющу: «Иже хощет по Мне ити, да отвержется себе, и возмет крест свой, и по Мне грядет», — невозвратно отвратил еси лице свое от мира сего, яко от Вавилона греховнаго, и презрев вся красная и благая его, водворился еси в пустыни, чая Бога, спасающаго воителей Своих. Ныне же предстоиши Престолу Божию, наслаждаяся небесных благ, и велие дерзновение имея ко Господу, не забуди нас, к раце мощей твоих усердно притекающих и восхваляющих тя:\n\nРадуйся, житейских сует и мирских соблазнов избежавый;\n\nРадуйся, иноческое безстрастие и безмолвие стяжавый.\n\nРадуйся, вся благая земли, Небеснаго ради Царствия, за уметы вменивый;\n\nРадуйся, равноангельное житие до конца возлюбивый.\n\nРадуйся, возненавидевый мира сего греховную сладость;\n\nРадуйся, восприемый обетование непрестающия жизни.\n\nРадуйся, облеченный славою Небеснаго Царствия;\n\nРадуйся, сокровище некрадомое и нетленное обретый.\n\nРадуйся, о Церкви Христовой, на земли воинствующей, молитвенниче небесный;\n\nРадуйся, о всех верных, на поклонение к тебе притекающих, предстателю.\n\nРадуйся, отче наш Савво, чудотворче преславный.\n\nКондак 3\n\nСилою, излиянною на тя свыше, возшед на высоту добродетелей, постом и бдением, молитвами и целомудрием, яко многоценным венцем благоустроения иноческаго, повсюду просиял еси: сего ради вси велика и преславна тя почитаху. Ты же, бегая славы от человек, пребывал еси яко един от простых, труждаяся паче всех и поя хвалу единому, в Троице славимому, Богу: Аллилуиа.\n\nИкос 3\n\nИмеяй прозорливость духовную учитель твой, богомудрый Сергий, провиде тя быти подобна ему сподвижника и благоискуснаго споспешника хотящим спастися. Сего ради, прежде отшествия своего, вдаде попечению твоему обитель Пресвятыя Богородицы, на реце зовомей Дубенке: ты же, смиренномудрия исполнен, аще и устрашаяся бремени начальства, обаче не преслушав воли святаго старца, приял еси порученное тебе стадо Христово и добре в пасении его пребыл еси. Ныне же выну предстоя Престолу Божию, благоспоспешествуй молитвами твоими всем, взывающим к тебе:\n\nРадуйся, безпрекословный воли учителя твоего исполнителю;\n\nРадуйся, добрый стада Христова наставниче.\n\nРадуйся, возлюбленный паче многих избранником Божиим Сергием, от него же не утаися святыня твоя;\n\nРадуйся, благовонный крине вертограда церковнаго.\n\nРадуйся, светлый сосуде Божественныя благодати;\n\nРадуйся, светильниче, не сокрывыйся под спудом, но на свещнице поставленный.\n\nРадуйся, честное Святаго Духа селение;\n\nРадуйся, преподобных светлое украшение.\n\nРадуйся, иноков в подвигах постнических укрепляяй;\n\nРадуйся, заблуждшим путь спасения показуяй.\n\nРадуйся, отче наш Савво, чудотворче преславный.\n\nКондак 4\n\nБурю страстей и искушений вражиих, препобеждая постом, бдением и молитвами, утолил еси до конца. Ныне убо причащаяся славы небесныя со всеми святыми, предстоиши Царю славы и поеши купно с ними: Аллилуиа.\n\nИкос 4\n\nСлышаще ближнии и дальнии Богоугодное твое житие, стекахуся от окрестных стран к тебе, пользы ради: ты же всех любезно приемля, согревал еси сердца их Божественною любовию. К тебе убо и мы припадающе, молим: настави ны, яко отец чада своя, на стези спасения. И не забуди взывающих к тебе:\n\nРадуйся, всем прибегающим к тебе наставниче предобрый;\n\nРадуйся, ищущим успокоения совести собеседниче претихий.\n\nРадуйся, унывающих душ утешителю пресладкий;\n\nРадуйся, кающихся со умилением ходатаю преусердный.\n\nРадуйся, заблуждающих исправителю прекроткий;\n\nРадуйся, беззаконных обличителю незлобивый.\n\nРадуйся, к воздержанию и целомудрию путеводителю неослабный;\n\nРадуйся, борющимся со страстьми помощниче неутомимый.\n\nРадуйся, праваго пути веры и благочестия указателю неложный;\n\nРадуйся, молящимся тебе от гнева Божия защитниче неотступный.\n\nРадуйся, отче наш Савво, чудотворче преславный.\n\nКондак 5\n\nБоготечная звезда явился еси, преподобне отче Савво, от мрака греховнаго хотящим прейти к солнцу правды, ясно путь показующая. Темже молим тя: просвети и наша сердца, страстьми житейскими омраченныя, и способствуй нам достойно воспевати Богу: Аллилуиа.\n\nИкос 5\n\nВидя благоверный князь Георгий смиренномудрие твое, яко уклонился еси от начальственныя власти во обители учителя твоего, устремляяся к пустынному безмолвию, той умоли тя, да вселишися на горах, глаголемых Сторожи. Ты же, изволяя благое послушание явити благому желанию и обитель иноческую зде составити хотя, рекл еси со Пророком: «Се покой мой, зде вселюся, яко изволих и». И скоро на месте сем храм Пресвятыя Богородицы создася. В немже ныне нетлением мощей твоих благоухаеши и немолчно ко Господу вопиеши о возглашающих к тебе сицевая:\n\nРадуйся, горлице пустыннолюбная и добровидная;\n\nРадуйся, пустыни доброе прозябение, смиренномудрием и всякими добродетельми страну сию облагоухавшее.\n\nРадуйся, цвете присноцветущий;\n\nРадуйся, благополезно и мудро прошение князя совершивый.\n\nРадуйся, церковь прекрасну зде во славу Рождества Богородицы соорудивый;\n\nРадуйся, пустыню во обитель иночества претворивый.\n\nРадуйся, стаду твоему верный наставниче;\n\nРадуйся, о всех градех и весех Российских молитвенниче неусыпающий.\n\nРадуйся, всем притекающим к тебе мир и благословение от Господа молитвами твоими низводящий;\n\nРадуйся, отче наш Савво, чудотворче преславный.\n\nКондак 6\n\nПроповеди Евангельския послушав: «Не пецытеся душею вашею, что ясте, или что пиете; ни телом вашим, во что облечетеся», — упразднил еси сердце твое от житейских забот, питаяся былием пустынным и малоценныя ризы нося. Сего ради нетления одеждою одеялся еси по преставлении твоем, юже от Христа Бога получити и нам испроси, вопиющим Ему Аллилуиа.\n\nИкос 6\n\nВозсиял еси, яко Богосветлое светило, во стране Российской, всеблаженне отче Савво, озаряя нас лучами добродетелей и чудес твоих. Темже вопием ти:\n\nРадуйся, дарованиями Святаго Духа сияющий члене Церкве Христовы;\n\nРадуйся, преизобилующий истинным к Богу умилением.\n\nРадуйся, подражателю преподобных в совершенном терпении;\n\nРадуйся, подвигов иноческих ревнителю.\n\nРадуйся, страсти греховныя силою благодати в себе умертвивый;\n\nРадуйся, нищеты и нестяжания образ.\n\nРадуйся, светлое святыни зерцало;\n\nРадуйся, всех добродетелей рачителю.\n\nРадуйся, немощных целебниче;\n\nРадуйся, жезле, падающих подкрепляющий.\n\nРадуйся, отче наш Савво, чудотворче преславный.\n\nКондак 7\n\nХотящу благоверному князю Георгию воинствовати на супостаты, благословение преподал еси, отче, на одоление, глаголя пророчески: «Изыди, благоверный княже! Господь ти поможет, и врагов твоих одолееши, и благодатию Божиею здрав возвратишися в отечество твое!» Еже и бысть, по глаголу твоему. Он убо, возвратився от брани с победою и славою, и многими дарми снабдевая обитель твою, воспеваше благодарственно дивному во святых Своих Богу: Аллилуиа.\n\nИкос 7\n\nНовый подражатель древних ратоборцев на страсти плотския явился еси, отче Савво: от юности бо ум твой вперив к Богу, яко столп веры непоколебимый, даже до старости маститыя пребыл еси в распинании плоти своея со страстьми и похотьми. Сего ради не можаху силы бесовския запинати ногама твоима, ниже успеваху устрашати тя издалеча, от ихже наветов и напастей соблюди неврежденных и нас, торжественно, воспевающих тебе:\n\nРадуйся, чистоты и воздержания хранителю;\n\nРадуйся, лику древних постников сопричтенный.\n\nРадуйся, всенощными молитвами и бдением всю прелесть бесовскую посрамивый;\n\nРадуйся, обдержимым бесовскою силою надежный врачу.\n\nРадуйся, надменных мудрованием плоти к покорению глаголам Божиим приводяй;\n\nРадуйся, всем напаствуемым от духа льсти духовное зрение и трезвение подаваяй.\n\nРадуйся, духа вражды и любоначалия от притекающих к тебе прогоняяй;\n\nРадуйся, яко ходатайством твоим даров Святаго Духа, в воинствовании Христовом укрепляющих, сподобляемся.\n\nРадуйся, отче наш Савво, чудотворче преславный.\n\nКондак 8\n\nСтранное чудо сотворил еси, предивный отче Савво, егда нечестивии хотяху расхитити достояние церкви твоея. Они, яко татие, устремляхуся оконцем, еже бе у гроба твоего: ты ж зде, аки велия гора, показался еси им, на нюже взыти несть мощно. Со студом убо возвращшеся отсюду, последи же раскаявшеся воплем и слезами, грех свой исповедаша пред всеми, и скоро путь неправды оставльше, в покаянии прочее пожиша, с верою вопиюще Богу: Аллилуиа.\n\nИкос 8\n\nВесь был еси в Бозе, еще сый на земли, в подвизех иноческаго жития: предстоящу бо ти пред лицем Господним на Божественной службе, зримо бываше воспламенение чудное в лице твоем от молитвеннаго в духе горения к Богу. Овогда же в толиком бе умилении душа твоя, яко источатися потокам слезным от очес твоих неудержимо, ихже ради единонравна тя зряху быти со Пророком, глаголющим: «Быша слезы моя мне хлеб, день и нощь». Обаче, велие стяжав дерзновение к Богу, не забуди и нас, со слезами печали о гресех своих к твоему заступлению притекающих и вопиющих к тебе:\n\nРадуйся, огнем Божественныя любве ветхаго человека в себе попаливый;\n\nРадуйся, во плоти, аки безплотен, на земли поживый.\n\nРадуйся, живыми и спасительными слезами огнь похоти угасивый;\n\nРадуйся, горния радости и блаженства ангельскаго сопричастниче.\n\nРадуйся, за премногую любовь твою к Богу Отцу славою и честию препрославленный;\n\nРадуйся, за глубокое смирение твое от Христа Сына Божия венцем нетления увенчанный.\n\nРадуйся, за чистоту и безстрастие ангельское от Пресвятаго Духа осиянный;\n\nРадуйся, пречестная обитель Троицы.\n\nРадуйся, отче наш Савво, чудотворче преславный.\n\nКондак 9\n\nВсякия беды и скорби избави нас, преподобне отче Савво, твоими теплыми к Богу молитвами и испроси нам вся, ко временной и вечной жизни потребная. Да сподобимся горняго Иерусалима достигнути и купно с тобою воспевати Богу: Аллилуиа.\n\nИкос 9\n\nВития многовещанныя недоумеют достойно восхвалити тя, богомудре Савво: кто бо доволен разумети вся борения твоя с миродержители тьмы века сего; или кто изочтет труды, болезни и подвиги твоя, в них же пустыннолюбное житие совершал еси. Обаче мы, любовию твоею побеждаеми, благодарив тебе зовем:\n\nРадуйся, закона Божия исполнителю всеусердный;\n\nРадуйся, чистотою и целомудрием многоценнаго бисера честнейший.\n\nРадуйся, в терпении и борении противу плоти адаманта твердейший;\n\nРадуйся, смиренномудрием и кротостию паче славных земли прославленный.\n\nРадуйся, борющимся со страстьми и похотьми помощниче непобедимый;\n\nРадуйся, в трудех, бдении и воздержании великим постником подражателю ревностнейший.\n\nРадуйся, в духовной мудрости наставниче благоискуснейший;\n\nРадуйся, подвигов иноческих показателю рачительнейший.\n\nРадуйся, другу Божию преподобному Сергию единонравный и к лику другов Божиих на небеса преселивыйся;\n\nРадуйся, отче наш Савво, чудотворче преславный.\n\nКондак 10\n\nСпастися хотяще вернии от различных напастей и бед мира сего, тебе теплаго предстателя и молитвенника к Богу предлагаем. Не тщетну сотвори нашу надежду на молитвы твои, но ходатайством твоим избави нас от лютых бед, напастей, искушений и скорбей. Да несмущенно, от избытка сердца, глаголем всегда Богу: Аллилуиа.\n\nИкос 10\n\nСтену тя тверду и молитвенника изрядна стяжав, святая обитель твоя и вси страны Российстии заступлением твоим хвалятся. Темже и мы грешнии, ко гробу твоему притекше, яко чада отца, молим: заступи и сохрани нас от искушений и скорбей, бед и напастей молитвами твоими, да взываем ти радостно:\n\nРадуйся, благовонный крине райскаго вертограда;\n\nРадуйся, кипарисе, верных сердца благовонием исполняющий.\n\nРадуйся, древо благосеннолиственное, имже обитель твоя покрывается;\n\nРадуйся, неусыпный молитвенниче, желания верных во благих исполняяй.\n\nРадуйся, надежде и отишие в мори жития сего плавающих;\n\nРадуйся, твердое ограждение и прибежище усердно Богу работающих.\n\nРадуйся, неисчерпаемый источниче исцелений;\n\nРадуйся, струя, напаяющая и веселящая жаждущих правды.\n\nРадуйся, всех усердно притекающих к тебе от искушений и бед скорое избавление;\n\nРадуйся, отче наш Савво, чудотворче преславный.\n\nКондак 11\n\nПение всеумиленное приносим ти, преблаженне отче Савво, и со дерзновением молим: вознеси ко Господу о спасении душ наших твою святую молитву. Да сподобимся вечно в радости блаженней воспевати Богу: Аллилуиа.\n\nИкос 11\n\nСветоподательными лучами блистает житие твое, отче наш Савво: всякия бо добродетели Евангельския является в тебе исполнение. Темже и глаголем:\n\nРадуйся, сугубыя ради нищеты богатство небесное обретый;\n\nРадуйся, плачем и умиления слезами утешение вечное приявый.\n\nРадуйся, алкавый и жаждавый правды, ныне же насыщаяйся райским блаженством;\n\nРадуйся, милостивым обещанное воздаяние усвоивый.\n\nРадуйся, чистотою сердца твоего лицезрения Божия достигнувый;\n\nРадуйся, миротворениями многими в лике сынов Божиих быти сподобивыйся.\n\nРадуйся, терпением правды ради в Царство Небесное водворивыйся;\n\nРадуйся, образом кротости, тихости и незлобия поучение сущим в озлоблении подаваяй.\n\nРадуйся, примером братолюбия, ко исканию не своих си, но яже ближняго, и наши сердца утверждаяй;\n\nРадуйся, всех со страхом работающих Господеви радосте.\n\nРадуйся, отче наш Савво, чудотворче преславный.\n\nКондак 12\n\nБлагодать, данная ти от Бога, целити недуги душевныя и телесныя, созывает верных ко всечестным мощем твоим: при нихже и малое моление приносящим велия благодать от Бога подается. Юже приемлюще, друг со другом радостно Богу возглашаем: Аллилуиа.\n\nИкос 12\n\nПоюще велия твоя, досточудне отче, подвиги и труды, ублажаем приснопамятное успение твое, аще бо и преставился еси от нас, но жив сый и по смерти, не отступаеши от нас духом: обаче и мощей твоих рака пред очима нашима видима есть всегда. К тебе убо припадаем, тебе молимся и восхваляем тя сице:\n\nРадуйся, в вере и любви божественной благоговейно от юности и благочестно до маститыя старости поживый;\n\nРадуйся, многотрудныя и разнообразныя во иночестве подвиги добре совершивый.\n\nРадуйся, яко совершеннаго освящения от Духа Святаго исполнен еси;\n\nРадуйся, чудному учителю твоему уподобивыйся всецелою чистотою и святостию.\n\nРадуйся, яко во дворех небесных с ним купно ликуеши;\n\nРадуйся, яко с ним купно Бога о нас грешных умоляеши.\n\nРадуйся, яко нетлением мощей твоих, аки трубою, проповедуется будущее всех воскресение;\n\nРадуйся, стране сей и всему отечеству нашему многоценное украшение.\n\nРадуйся, яко тобою монахов множества в подвизех своих укрепление приемлют;\n\nРадуйся, яко ходатайством твоим вернии и в молвах житейских спасаются.\n\nРадуйся, отче наш Савво, чудотворче преславный.\n\nКондак 13\n\nО преславный чудотворче и скорый заступниче наш, блаженне отче Савво! Малое сие от нас приношение ныне приимши, испроси нам у Христа Бога утверждение в вере и братолюбии, еже быти неврежденным от всяких искушений, бед и напастей, и во грядущем веце мук вечных избавитися всем, вопиющим Ему: Аллилуиа.\n\n[Се́й конда́к глаго́лется три́жды.]\n[Далее повторяем 1‑е икос и кондак:]\n\nИкос 1\n\nАнгел во плоти явился еси на земли, преподобне Савво, от юности бо возлюбив Бога, равноангельному поревновал еси житию учителя твоего, преблаженнаго Сергия, и послужив Господеви в правде и преподобии во вся дни живота своего, по исходе нетлением телесе сияеши. Вси убо благоговейно чтуще тя, воспеваем сице:\n\nРадуйся, истинный святаго учителя твоего ревнителю;\n\nРадуйся, земный ангеле и небесный человече.\n\nРадуйся, верный слуго Господень;\n\nРадуйся, усердный чистоты и воздержания хранителю.\n\nРадуйся, зерцало веры благочестивыя;\n\nРадуйся, образе кротости духовныя.\n\nРадуйся, пустынножителей красото;\n\nРадуйся, иноков наставниче.\n\nРадуйся, многим ко спасению путеводителю;\n\nРадуйся, скорый помощниче притекающим к тебе с верою.\n\nРадуйся, отче наш Савво, чудотворче преславный.\n\nКондак 1\n\nИзбранный от Воеводы и Господа воинств небесных, преподобне отче наш Савво, силою креста Господня победивый напасти, яже от диавола, мира и плоти, яко имея дерзновение ко Господу, от всяких искушений, бед и наветов вражиих молитвами твоими сохраняй нас, похвальная с любовию тебе воспевающих;\n\nРадуйся, отче наш Савво, чудотворче преславный.\n\nМолитва преподобному Савве, игумену Сторожевскому, Звенигородскому чудотворцу\n\nО пречестная и священная главо! Небеснаго Иерусалима гражданине, Пресвятыя Троицы обиталище, преподобне отче Савво! Велие имея дерзновение ко Всемилостивому Владыце, молися о стаде ограды твоея и о всех по духу чадех твоих. Не премолчи за ны ко Господу и не презри верою и любовию чтущих тя. Испроси предстательством твоим у Царя царствующих мир Церкви, под знамением креста воинствующей, Архиереом святительства благолепие, монашествующим доброе в подвизех течение; святей обители сей, граду сему и всем градом и странам охранение; миру безмятежие и мир, глада и пагубы избавление; старым и немощным утешение и подкрепление, юным и младенцам благое в вере возрастание, в Евангельском учении твердое обучение, и в чистоте и целомудрии пребывание; вдовицам и сиротам милость и заступление, плененным отраду и возвращение, болящим исцеление, малодушным успокоение, заблуждшим исправление, согрешающим дух сокрушения, бедствующим благовременну помощь. Не посрами нас, к тебе с верою притекающих, споспешествуй, яко чадолюбивый отец чадам, и нам понести иго Христово во благодушии и терпении, и всех управи в мире и покаянии скончати живот свой непостыдно и преселитися со упованием во обители небесныя. Идеже ты, по трудех и подвизех, ныне водворяешися со Ангелы и Святыми, зря и прославляя Бога, в Троице славимаго, Отца и Сына и Святаго Духа. Аминь.\n\nРекомендуем молитвы\n\nАкафист архангелу Божию Михаилу\n\nАкафист благоверному князю Андрею Боголюбскому\n\nАкафист благоверному князю Игорю Черниговскому и Киевскому\n\nАкафист Благовещению Пресвятой Богородицы\n\nАкафист благодарственный по святом Причащении\n\nVk·Tg·Max