Азбука веры » Календарь » Служба сщмч. Агафангелу исповеднику, митрополиту Ярославскому\nСлужба сщмч. Агафангелу исповеднику, митрополиту\nЯрославскому\nТекст службы утвержден на заседании Священного Синода 25 августа\n2022 года (журнал № 78).\nМесяца октября в 3-й день\nСвятителя Агафангела, исповедника, митрополита Ярославскаго\nНа велицей вечерни\nНа Господи, воззвах: стихиры, глас 8.\nПодобен: О, преславнаго чудесе:\nСвятителю Христов Агафангеле,/ исповедниче твердый Церкве Русския,/ ты,\nот утробы матере Богом избран быв,/ в день Воздвижения Креста Господня\nродился еси/ и, крест свой мужественне взем,/ усердно Христу последовал\nеси,/ души же своея отвергнувся,/ тесным житием и многими подвиги/\nсоблюл еси ю в живот вечный.\nБогомудре отче Агафангеле,/ ты, яко звезда пресветлая,/ от востока даже до\nзапада/ землю Русскую озарил еси,/ молитвами бо слезными и смирением,/\nслова Божия проповеданием/ многия люди ко Христу привел еси/ и отец\nчадолюбивый им явился еси./ Темже и велий в Царствии Небеснем\nнареклся еси.\nСвятителю отче Агафангеле,/ благовестниче неустрашимый,/ ты, мужество и\nмудрость сочетая,/ на всяк день душу свою за овцы полагал еси/ и, яко\nдобрый воин Христов,/ изгнания и темничная заточения,/ поношения и\nболезни лютыя/ мужественне претерпел еси/ и венца Небеснаго сподобился\nеси.\nСвятителю отче Агафангеле,/ ты, яко злато в горниле, огнем искусився\nстрадания,/ со дерзновением отверзл еси уста,/ во еже обличити отступники/\nпредания церковная попирающия/ и нововведения льстивая вводящия,/\nтемже небо благодарственно прият тя,/ идеже ныне древа жизни\nнаслаждаешися/ и прославляеши Христа, Бога нашего.\nСлава, глас тойже:\nЕгда Церковь Русская/ богоборческими гонении люте обуревашеся,/ тогда\nсвятитель Агафангел страж неусыпный тоя явися,/ по вся дни\nпроизволением за Христа умирая,/ темже, жизнь вечную наследовав,/ ныне\nв сонме новомученик Российских на Небеси ликует,/ прославляя Отца и\nСына и Святаго Духа,/ Троицу Единосущную и Нераздельную.\nИ ныне, Богородичен: Царь Небесный:\nВход. Прокимен дне. И чтения 3 исповедническая:\n1. Похваляему праведнику: (главы 4, 6, 7 и 2)\n\n2. Праведницы во веки живут: (главы 5 и 6)\n3. Праведник, аще постигнет скончатися: (глава 4)\nНа литии стихира храма и святаго стихиры, глас 1:\nПреподобен и незлобив,/ домоправитель верный и мудрый,/ пастырь\nдобрый, душу свою за овцы Христовы полагаяй,/ исповедник твердый и\nистинный хранитель церковных преданий/ явился еси, святителю\nАгафангеле,/ себе самаго во образ верным чадом Церкве Русския подавая.\nСупружницы и сына во единочасие лишився,/ Божие посещение уразумел\nеси,/ святителю Христов Агафангеле,/ и, призвание на путь иноческий,/\nтакожде и дар слова от Господа восприем,/ проповеданием и учением\nсторицею той преумножил еси/ и, светильник целомудрия елеем милости\nисполнив,/ с мудрыми девами в Чертог Небесный вшел еси.\nСлава, глас 6.\nПодобен: Все отложше:\nСтойте и держите предания церковная,/ неленостно поучал еси паству,/\nсвятителю отче Агафангеле,/ егда же в место обители Спасовы/ безбожными\nзаключен был еси,/ тогда вернии людие на дворе церковнем собирахуся,/ да\nпоне издалеча видением лика твоего утешатся./ Темже и ныне предстани в\nпомощь нам,/ празднующим любовию святую память твою.\nИ ныне, Богородичен, глас и подобен тойже:\nВеличаем Тя вси, Пренепорочную/ Матерь Бога нашего,/ Юже освяти Дух\nПресвятый./ Ты бо еси, Богородице,/ Оружие наше и Стена,/ и Святей Руси\nЗаступница,/ к Тебе ныне прибегаем,/ Тя на молитву призываем,/ да\nизбавиши нас/ от врагов наших.\nНа стиховне стихиры, глас 2:\nПриидите, празднолюбцы,/ воспоим святителя Агафангела\nдостоблаженнаго,/ учителей печать и страдальцев единонравна,/ Христа\nради вся во уметы вменившаго,/ велелепием исповедания Церковь Русскую\nукрасившаго,/ ныне же в Царствии Небеснем Бога воспевающаго.\nСтих: Ты иерей во век/ по чину Мелхиседекову.\nПриидите, архиереи и священницы,/ святителя Господня песньми почтим,/\nтой бо, подвиг страдания и исповедничества подъем/ и последи благочестно\nпожив,/ жертву безкровную благоговейне приношаше,/ паству свою Хлебом\nЖизни питая/ и Христа Бога усердно умоляя,/ да простится грех\nбогоборчества народа нашего.\nСтих: Исповемся Тебе, Господи,/ всем сердцем моим.\nПриидите, любострадальцы,/ прославим Агафангела освященнаго,/ той бо,\nяко раб благий и верный,/ данный ему талант благочестия/ исповеданием\nХриста преумножи,/ темже в радость Господа вниде/ и, велие дерзновение\nот Него восприем,/ молится о земли нашей/ и о верою чтущих память его.\n\nСлава, глас 6:\nВозлюбил еси Бога паче живота/ и ближняго своего, яко себе,/ во главу угла\nблаго Церкве Святыя поставляя/ и предания святых отец неизменно хранити\nповелевая,/ сквозе огнь и воду страданий по Христе прошел еси/ и ныне\nвечнаго покоя наслаждаешися,/ святителю Агафангеле, отче наш.\nИ ныне, Богородичен: Творец и Избавитель мой, Пречистая:\nНа благословении хлебов тропарь, глас 2:\nПо вся дни Бога ради умервщляемь,/ святителю и исповедниче Христов\nАгафангеле,/ во время безбожных гонений лютых/ попечение о Церкви\nРусской от святителя Тихона приял еси/ и, наветы диавольския разорив,/\nкорабль церковный мудре/ силою возлюбившаго тя Господа управил еси./\nЕгоже моли даровати нам мир и велию милость.\nНа утрени\nНа Бог Господь: тропарь святителя дважды. Слава, и ныне, Богородичен.\nПо 1-м стихословии седален, глас 7:\nВо плоти ходяй, не по плоти воинствовал еси, святителю Христов\nАгафангеле, и благодатию Божиею вся до конца претерпел еси, покры бо тя\nв тайне Лица Своего Господь, Егоже моли помиловати нас в День Судный.\nСлава, и ныне, Богородичен:\nТы Предстательница теплая и Заступница христиан еси, Богородице Дево,\nВсепетая Владычице, темже со всеми святыми земли Русския, моли Сына\nТвоего и Бога в День Судный обрести нам велию милость.\nПо 2-м стихословии седален, глас 2:\nВо дни брани и нестроений народных, святителю отче Агафангеле, ты\nименем Христовым воины русския увещал еси, еже Отечеству верно\nслужити, веру Православную незыблему хранити и живот свой за други своя\nполагати, да в житии сем плод вечный обрящут.\nСлава, и ныне, Богородичен:\nВоистину Богородицу Тя исповедуем, Владычице, Ты бо Бога неизреченно\nродила еси, Крестом смерть разоршаго и к Себе святых соборы\nпривлекшаго, с нимиже моли спасти землю Русскую, яко та есть удел Твой.\nВеличание:\nВеличаем тя,/ священноисповедниче Агафангеле,/ и чтим святую память\nтвою,/ ты бо молиши за нас/ Христа, Бога нашего.\nПсалом избранный:\n1. Священницы Твои облекутся правдою, и преподобнии Твои возрадуются.\n2. Повем имя Твое братии моей, посреде Церкве воспою Тя.\n1. Приидите, чада, послушайте мене, страху Господню научу вас.\n\n2. Возненавидех церковь лукавнующих, и с нечестивыми не сяду.\n1. Яко ревность дому Твоего снеде мя, и поношения поносящих Тя\nнападоша на мя.\n2. За словеса устен Твоих аз сохраних пути жестоки.\n1. Искусил мя еси, и не обретеся во мне неправда.\n2. Правдою Твоею избави мя и изми мя.\n1. Погна враг душу мою, посадил мя есть в темных.\n2. Изведи из темницы душу мою, исповедатися имени Твоему.\n1. Бог мой еси Ты, и исповемся Тебе всем сердцем моим.\n2. Глаголах о свидениих Твоих пред цари, и не стыдяхся.\n1. Благо есть исповедатися Господеви и пети имени Твоему, Вышний.\n2. Пойте Господеви, преподобнии Его, и исповедайте память святыни Его, во\nвсех людех чудеса Его.\nПо полиелеи седален, глас 2:\nОтверзошася ти врата правды, святителю Агафангеле всехвальне, и ныне,\nвшед в ня, Господеви исповедуешися, хвалу Ему в церкви преподобных\nвозсылая, и кадило молитв священных Престолу Его вознося. Темже помяни\nчада Церкве Русския, любовию чтущия Тя.\nСлава, и ныне, Богородичен:\nКо образу Толгския иконы Пресвятыя Богородицы с верою припадая,\nАгафангеле премудре, о спасении земли нашея Пречистую усердно умолял\nеси и тако верныя поучал еси: не имамы иныя надежды во обстояниих,\nразве предстательства Богоматере.\nСтепенна: 1-й антифон 4-го гласа. Прокимен, глас 4: Честна пред Господем/\nсмерть преподобных Его. Стих: Что воздам Господеви о всех, яже воздаде\nми? Евангелие от Луки, зачало 64.\nПо 50-м псалме стихира, глас 6:\nНашедшу на тя Духу Святому,/ святителю отче Агафангеле,/ во дни гонений\nлютых в земли Русской/, старец сый, телом немощный и притрудный,/ духом\nнеколеблен явился еси,/ заточения, изгнания и болезни,/ глад и мраз\nпретерпевая,/ яко истинный свидетель Христов./ Темже ныне, Престолу\nБожию предстоя,/ моли помиловатися душам нашим.\nКанон, глас 8, егоже краегранесие: Претерпевый до конца, той спасен будет.\nПеснь 1\nИрмос: Колесницегонителя фараоня погрузи,/ чудотворяй иногда/\nМоисейский жезл, крестообразно поразив/ и разделив море,/ Израиля же\nбеглеца, пешеходца спасе,/ песнь Богови воспевающа.\n\nПоложивый в сокровищницу Церкве Русския плод устен, исповедающих имя\nБожие, святителю отче Агафангеле, приими днесь, яко лепту, пение от души,\nблагих вдовствующия.\nРевностию по Бозе бездну гонений немокренно прешел еси, святе\nАгафангеле, и ныне молитвами твоими на неуклонное исповедание веры\nнас утверди, воспевающих и поющих в сердцах наших Господеви.\nЕгда дадеся ти благодать не точию во Христа веровати, но и по Нем\nпострадати, святителю славне, ты путем скорбным безбоязненно\nпешешествовал еси, верным образ быв. Темже и вниде во врата Небесная.\nБогородичен: Твоего чрева Плод, Богоневесто, земныя вся от клятвы\nизбавляет, темже благословенна Ты в родех, Пречистая Владычице.\nПеснь 3\nИрмос: Утверждей на камени веры,/ на сем созижду Мою Церковь, рекий,\nГосподи,/ спаси мя, вопиюща:/ Ты еси, Христе, Сын Бога Живаго,/ и в Тебе\nутвердися дух мой.\nЕгда восташа врази и отступницы на святыни земли Русския,/ тогда ты\nучаше неложно, богомудре Агафангеле,/ како подобает в Дому Божии жити,/\nяже есть Церковь Бога Жива,/ столп и утверждение истины.\nРечи безумныя слышав, яко несть Бог, приидите, и отставим вся праздники\nБожия, прещения гордых не убоялся еси, отче Агафангеле, чада церковная к\nединению веры призывая.\nПаству твою апостольски поучал еси, святителю Агафангеле, повелевая\nотлучатися всякаго брата, безчинно ходяща, в научения странна и различна\nне прилагатися, но благодатию сердца утверждати.\nБогородичен: Едина словом Слово плотию рождшая, Чистая, избави сетей\nвражиих души наша и утверди на камени Божественных хотений, яко на Тя\nупование возложихом.\nСедален, глас 4:\nВзирая на Начальника и Совершителя веры Иисуса, верою немощи\nпревозмогл еси, святителю Агафангеле, в темницах и изгнании\nтерпеливодушно пребывая, беды от гонителей, беды от лжебратии терпя.\nТемже и жизнь вечную восприял еси.\nСлава, и ныне, Богородичен:\nК Заступнице земли нашея, Приснодеве Богородице, ныне притецем и к\nпервописанней иконе Ея припадем, с верою зовуще из глубины души: о,\nМати Божия, спаси землю Русскую, исцели болезни ея и верныя люди\nутеши.\nПеснь 4\nИрмос: Ты моя Крепость, Господи,/ Ты моя и Сила,/ Ты мой Бог, Ты мое\nРадование,/ не оставль недра Отча/ и нашу нищету посетив./ Тем с\nпророком Аввакумом зову Ти:/ силе Твоей слава, Человеколюбче.\n\nВиждь враги моя, яко умножишася и туне возненавидеша мя, вопиял еси\nпсаломски, Агафангеле крепкодушне, сохрани душу мою и избави мя, яко\nТебе ради претерпех поношение, и прославлю силу Твою, Человеколюбче.\nИсповедал еси, отче Агафангеле, Христа пред отступники и гонители,\nмужественне воспевая: страха вашего не убоимся, ниже смутимся, яко с\nнами Бог, Господа же Бога нашего, Того освятим, и Той будет нам в страх.\nИмене Своего ради в скорбех сохрани тя Христос Бог мышцею Своею\nвысокою, тебе взывающу: яко аще не Господь бы был в нас, внегда востати\nчеловеком на ны, убо живых пожерли быша нас. Ныне же силу Его\nвоспеваем.\nБогородичен: Доброту Иаковлю, красную Тя, Всечистая, Едину обрет от века\nПребезначальное Слово, и вселився в Тя, обнови человеческое естество,\nЕгоже моли от всякия мне избавитися скорби.\nПеснь 5\nИрмос: Яко Бога иного, Блаже,/ паче Тебе, не знаем,/ к Тебе, Свету\nНезаходимому, от нощи утренююще,/ воспеваем Тя, Человеколюбче.\nОтлучен быв телом, но не душею, от паствы твоея, исповедниче Христов, по\nвся дни тую в сердце своем носил еси, последуя Господу Человеколюбцу.\nКую измену даст человек за душу свою? Сие слово Господне в сердце\nхраня, житие непорочное и исповедание чистое Спасителю в дар принесл\nеси.\nО всяцей скорби Бог не остави тебе, да возможеши сущия в скорбех\nутешати, и гонящия благословляти, словом, житием, любовию образ верным\nподавая.\nБогородичен: Направи стопы моя к покаянию, Путеводительнице\nхристианом, Богородице Чистая, яко да из тьмы греховныя исход обрящу.\nПеснь 6\nИрмос: Иону в ките, Господи,/ единаго вселил еси,/ мене же, связаннаго\nмрежами вражиями,/ яко от тли онаго спаси.\nЦеломудрием Христовым, святителю Агафангеле, во узах сый, лжемудрие\nгонителей обличил еси, яко слово Божие не вяжется.\nАще благая прияхом от руки Господни, злая ли не стерпим, взывал еси,\nсвятителю, да сынове Божии обретемся.\nТы, Господи, нам Прибежище и Сила, в тесноте темничней вопиял еси,\nбогомудре, егда бо немощствуем, тогда о Господе сильни есмы.\nБогородичен: Освяти ум мой и просвети сердце мое, Пресвятая Мати Божия,\nи одержащих мя зол измени, христиан Заступнице.\nКондак, глас 4:\nИсполняя во плоти твоей лишение скорбей/ за Тело Христово, еже есть\nЦерковь,/ страждующим чадом Ея милостию и смирением,/ преподанием\n\nмира и мудростию послужил еси,/ сего ради на свещнице архиерейстем,/\nяко светильник горяй и светяй, возсиял еси/ и мощи твоя граду Ярославлю/\nво утверждение даровал еси,/ святителю Агафангеле, отче наш.\nИкос:\nК Церкви и земли Русской любовию распалаяся, неверие и зловерие со\nдерзновением обличал еси, чада церковная повиноватися и покарятися\nзаконным пастырем поучая. Темже, страдания по Христе волею на рамо\nвзем, силу мучительскую силою Христовою препобедил еси. И ныне, во\nЦарствии Божии веселие вкушая за лета, в няже видяше злая, поминай\nлюбовию чтущих тя, святителю Агафангеле, отче наш.\nПеснь 7\nИрмос: Божия снисхождения/ огнь устыдеся в Вавилоне иногда./ Сего ради\nотроцы в пещи, радованною ногою,/ яко во цветнице, ликующе, пояху:/\nблагословен еси, Боже отец наших.\nИмея щит веры Христовы, стрелы разжженныя мучителей отразил еси,\nсвятителю, вопия: аще бо паки возможете и паки побеждени будете, аз же\nблагословлю Бога отец наших.\nСо беззаконными вменився, на путь нечестивых не ступил еси и,\nненавидимь Господа ради быв, любовию сердце утвердил еси, воспевая\nБогу отец наших.\nПаче силы гонительми отягощаемь, легкое иго Христово подъял еси, мудре,\nи посреде мятежа и браней земных покой обрел еси, воспевая Богу отец\nнаших.\nБогородичен: Агнца зрящи неправедне на Древе воздвизаема, Многопетая\nАгница плачущи восклицаше, матерски слезящи и долготерпение Того\nпояше.\nПеснь 8\nИрмос: Нечестия органы иную песнь,/ благочестия же благовещаннии\nпояху гусли:/ благословите, дела Господня, Христа во веки.\nСилою многою глаголы вечныя благовествовал еси, святителю: се, Господи,\nудаляющии себе от Тебе погибнут, людие же вернии исповедятся Тебе во\nвеки.\nЕдем мысленный в узилище обрет, исповедниче славный, реку учений\nБожественных из него извел еси, да омоется лице земли Русския от\nнечестия во веки.\nНаписуя верным благочестивно разум Божественный, Святаго Духа трость\nявился еси, Емуже со Отцем и Сыном исповедаешися во веки.\nБогородичен: Безсмертнаго Бога рождшая, течение смертное укротила еси,\nтемже умертви, Чистая, страсти телесе моего, да Тя славлю во веки.\nПеснь 9\n\nИрмос: Благословен Господь, Бог Израилев,/ воздвигнувый рог спасения\nнам/ в дому Давидове, отрока Своего,/ в нихже посети нас Восток с\nвысоты/ и направил ны есть на путь мира.\nУзы твоя поминающия и любовию чтущия память твою, вечных и\nнерешимых уз избавити молися Христу, святителю Агафангеле, яко ходатай\nеси теплый о чадех Церкве Русския.\nДар молитвы терпением в скорбех стяжав, о умирении Церкве Русския по\nвся дни Бога умолял еси, отче Агафангеле. И ныне благословящия о тебе\nГоспода помяни.\nЕдинаго Бога возлюбив, священное служение исповеданием запечатлел еси\nи, яко клас зрелый земли Русския, в Небесных житницех упокоился еси,\nславне Агафангеле.\nБогородичен: Тя верою поющия просвети, Всенепорочная, просвещением\nСына Божия, из Твоея прошедшаго утробы, и тьмы нас несветимыя изми\nТвоим предстательством.\nСветилен:\nПредставил еси себе жертву живу Богови, святу, благоугодну, в словеснем\nслужении и исповедании, святителю Агафангеле, и тако просветися свет\nтвой на Святей Руси, яко да славит выну о тебе Отца Небеснаго.\nСлава, и ныне, Богородичен:\nСвет от Света миру рождшая, Пречистая, светлости святых сподоби люди\nземли Русския, Тебе почитающия и молебное пение Тебе приносящия: не\nзабуди нас, рабов Твоих, Едина Благословенная.\nНа хвалитех стихиры, глас 4:\nДосточудне святителю Агафангеле,/ ты в годину гонений на Церковь\nРусскую/ столп Православия исповеданием Христа явился еси,/ узами и\nизгнанием, яко злато в горниле, искушаемь,/ в мире благочестне скончался\nеси/ и благоуханием святых мощей верныя возвеселил еси./ Ныне же с лики\nангельскими Бога величаеши. (Дважды).\nЕгда безбожие плени землю Русскую,/ премножество силы Божия\nпроповедал еси, Агафангеле всехвальне,/ гонимь, но не оставляемь,/\nнизлагаемь, но не погибаяй,/ в терпении мнозе, бдениих и пощениих,/ во\nблагости, любви нелицемерной и словеси истины/ спасение Руси на камени\nверы Православныя возвещая.\nПо слову Господню врази твоя возлюбил еси,/ образ страждущим людем\nРусским являя,/ святителю Агафангеле,/ кленущия тя благословляше,/\nненавидящим тя добро творяше/ и о гонящих тя моляшеся,/ яко да\nвсыновления сподобишися Отцу Небесному,/ Егоже ныне во славе\nвосхваляеши.\nСлава, глас 8:\n\nСвятителю и исповедниче Христов Агафангеле,/ ты первее паству\nЯрославскую/ от омофора святителя Тихона приял еси/ и добре сию упасл\nеси./ Последи же, волю Первосвятителя исполняя,/ попечение о всей Церкви\nРусской подъял еси/ и тому во дни гонений безбожных спострадал еси./\nТемже ныне купно с ним Престолу Божию предстоиши,/ моляся о душах\nнаших.\nИ ныне, Богородичен:\nВладычице, приими молитвы раб Твоих/ и избави нас/ от всякия нужды и\nпечали.\nСлавословие великое и отпуст.\nНа Литургии\nБлаженны от канона, песни 3-я и 6-я. Прокимен, глас 7: Изведи из темницы\nдушу мою/ исповедатися имени Твоему. Стих: Гласом моим ко Господу\nвоззвах. Апостол ко Евреем, зачало 334. Аллилуиа, глас 2: Праведнии\nисповедятся имени Твоему/ и вселятся правии с лицем Твоим. Стих:\nГосподи, Господи, сило спасения моего, осенил еси над главою моею в день\nбрани. Евангелие от Матфеа, зачало 38. Причастен: Пойте Господеви\nпреподобнии Его и исповедайте память святыни Его.\nМолитва\nО, Богомудре святителю и исповедниче Христов Агафангеле, измлада\nвозжелевый служити олтарю Господню! Ты, первее люди Сибирския и\nПрибалтийския в стране нашей архипастырским служением добре управив,\nпоследи Ярославстей пастве дарован был еси, во время же богоборческих\nгонений заветом первосвятителя Тихона попечение о Русской Церкви приял\nеси. Тогда, священное исповедание, яко забрало, восприим, уста\nбогохульная дерзновенно заградил еси и безплотныя враги посрамил еси,\nчада церковная поучая предания святых отец соблюдати, единство святыя\nверы в союзе братскаго мира хранити и пастырем законным повиноватися.\nТемже, заточения, изгнание и многая лишения за имя Христово претерпев,\nблаженства изгнанных правды ради сподобился еси и ныне с ликом\nновомученик и исповедник Российских Престолу Пренебесному предстоиши.\nТемже моли Всеблагаго Бога, да сохранит Церковь Русскую от ересей,\nрасколов, нестроений и гонений, да возродится земля наша святым\nпокаянием и да прославят вернии людие ея единым сердцем и едиными\nусты Дивнаго во святых Своих Бога, Отца и Сына и Святаго Духа во веки\nвеков. Аминь.\n 838  1 Ошибка в тексте? Выдели её мышкой! И нажми Ctrl+Enter