Кондак 1\n\nВозбранному святителю и чудотворцу Варсонофию составим похвалу, яко усердному молитвеннику нашему и скорому помощнику. Ты же, святителю, яко имеяй дерзновение ко Господу, умоли Его избавляти нас от всяких бед и скорбей, да с радостию зовем ти: Радуйся, Варсонофие, Казанский чудотворче!\n\nИкос 1\n\nАнгелов Творец и всея твари Содетель яви тя Церкви Своей святей новаго святителя и чудотворца, имущаго к Нему дерзновение молить об избавлении нас от всяких бед и скорбей. Сего ради восхваляем тя сице:\n\nРадуйся, благословенное чадо благочестиваго отца, сподобившагося благодати священства;\n\nРадуйся, благодатный воспитанниче благоговейнаго учителя.\n\nРадуйся, орошенный благодатию, лиявшеюся от его наставлений;\n\nРадуйся, отроче, приявший в сердце твое начало премудрости.\n\nРадуйся, яко тою вся буяя юности от сердца твоего отгнал еси;\n\nРадуйся, скоро и спешно навыкнувый наказанию закона Божия.\n\nРадуйся, разумом и добродетельным житием Пресвятое Имя Божие прославивый;\n\nРадуйся, радосте и утешение твоим родителем.\n\nРадуйся, крине, возращенный на земли для райских селений;\n\nРадуйся, молитвенниче наш усердный.\n\nРадуйся, крепкий наш заступниче;\n\nРадуйся, мудрый и кроткий наш наставниче.\n\nРадуйся, Варсонофие, Казанский чудотворче!\n\nКондак 2\n\nВидя суету мира и привременных благ его, ты, святителю Варсонофие, единаго Бога крепко от юности твоея возлюбил еси и слезами молитвенными радость небесную на земли сеял еси. Темже мы, радуяся, вопием с тобою Богу: Аллилуиа.\n\nИкос 2\n\nРазумно уразумев попущение премудраго Промысла, хотящаго предуготовати из тебе новаго проповедника веры Христовы для неверующих агарян, ты, святителю Христов, благодушно в юности твоей крест плена понесл еси и в стране пленения ведению языка агарянскаго научился еси. Сего ради приими от нас похвалы сия:\n\nРадуйся, предуготованный сосуде мира Христова, излияннаго на неверовавших;\n\nРадуйся, пастырю, воспитанный посреде волков.\n\nРадуйся, светильниче Церкве, предуготованный под спудом;\n\nРадуйся, столпе Церкве Православныя, укрепленный крестом.\n\nРадуйся, смирением, кротостию и послушанием пленивших тя удививый;\n\nРадуйся, теми любовь их к тебе приобретый.\n\nРадуйся, слезный сеятелю радости небесныя;\n\nРадуйся, всего себе воле Божией предавый.\n\nРадуйся, райский крине, посреде терний на земли произрастший;\n\nРадуйся, бисере многоценный, златом от плена искупленный.\n\nРадуйся, отца и матерь ради Христа оставивый;\n\nРадуйся, девства и чистоты хранителю.\n\nРадуйся, Варсонофие, Казанский чудотворче!\n\nКондак 3\n\nСилу Христа Спасителя, влекущую к Нему, уразумев, святителю, ты душею и телом сему влечению последовал еси, и яко Ангел, на крилех поста и молитвы к Нему воспарил еси, непрестанно воспевая Богу: Аллилуиа.\n\nИкос 3\n\nИмея во уме и сердце твоем единаго Бога, ты, святителю, вся красная мира сего презрел еси и уединение с нестяжанием крепко возлюбил еси, служа Богу постом и молитвою. Темже вопием ти:\n\nРадуйся, Господа Бога верный служителю;\n\nРадуйся, весь ум твой богомыслием освятивый.\n\nРадуйся, усердный и верный воли Христовой исполнителю;\n\nРадуйся, премудрый монахов наставниче.\n\nРадуйся, добрый о них попечителю;\n\nРадуйся, девства и чистоты хранителю.\n\nРадуйся, любимиче братии твоея;\n\nРадуйся, образе и подвижниче добродетелей.\n\nРадуйся, зерцало евангельскаго совершенства;\n\nРадуйся, живый свитче закона Божия.\n\nРадуйся, верный подражателю Христов;\n\nРадуйся, Варсонофие, Казанский чудотворче!\n\nКондак 4\n\nБуря внутренних скорбных помышлений обыде тя, святителю, егда внезапу в чуждую землю пленен был еси, идеже и горькия слезы проливал еси. Егдаже всецело воле Божией предался еси, тогда непрестанно дивному в судьбах Своих Богу вопиял еси: Аллилуиа.\n\nИкос 4\n\nСлышав о святом житии твоем, Царь Иоанн радовася, яко Российския имяше таковыя потаенныя угодники Божия, и не таяй светильника под спудом, устрои тебе быти игумена Песношския обители. Мы же, радуясь, вопием ти:\n\nРадуйся, светильниче, из под спуда на свещник поставленный;\n\nРадуйся, молитвенниче неусыпный.\n\nРадуйся, врачу ран сердечных прозорливый;\n\nРадуйся, целителю греховных недугов.\n\nРадуйся, великодушный строптивости препобедителю;\n\nРадуйся, сострадательный и терпеливый братии твоея любителю.\n\nРадуйся, невидимых врагов мудрый прогонителю;\n\nРадуйся, благоговейный Божий служителю.\n\nРадуйся, благочиния монастырского мудрый устроителю;\n\nРадуйся, обрадованный посещением твоей обители от Царя державнаго.\n\nРадуйся, обрадовавый его твоим благоговением и смирением;\n\nРадуйся, ангеле во образе человечестем.\n\nРадуйся, Варсонофие, Казанский чудотворче!\n\nКондак 5\n\nБоготечней звезде подобен был еси, святителю, в восхождении твоем на твердь церковную, и последуя, яко солнцу, святителю Гурию, по воле Царя державнаго шествовал еси в богоспасаемый град Казань, поя Богу: Аллилуиа.\n\nИкос 5\n\nВидеша тя, святителю, православнии жители града Казани устрояющаго в ней первую обитель во имя благолепнаго Спасова Преображения, и в благоговейной радости о Господе, творящем дивная дела Своя, вопияху тебе сице:\n\nРадуйся, нечестия ревностный искоренителю;\n\nРадуйся, благочестия усердный ревнителю.\n\nРадуйся, магомедовы тмы дивный прогонителю;\n\nРадуйся, света Христова ревностный распространителю.\n\nРадуйся, первыя обители в Казани устроителю;\n\nРадуйся, дивный избранниче Божий.\n\nРадуйся, благодать и милость Господню в братии твоей водворивый;\n\nРадуйся, число иноков умноживый.\n\nРадуйся, благочиния церковнаго блюстителю;\n\nРадуйся, пения Божественнаго искусный учителю.\n\nРадуйся, безчиния и нечестия мудрый обличителю;\n\nРадуйся, Варсонофие, Казанский чудотворче!\n\nКондак 6\n\nПроповедник богоносный явился еси, святителю, во граде Казани, обличая нечестивых поклонников лжепророка самем их языком, и не могущих ничтоже рещи противу тебе обращая к единому в Троице славимому Богу, поя Ему: Аллилуиа.\n\nИкос 6\n\nВозсия в Казани просвещение истины и отгна от нея тму нечестия Христос, истинный Бог наш, Емуже в сем усердно послужил еси, святителю. Темже взываем ти сице:\n\nРадуйся, насадителю нивы Христовы в стране нечестия;\n\nРадуйся, напоителю оной живыми водами Христова учения.\n\nРадуйся, ничтоже себе восписуяй, но вся к единому Богу относяй;\n\nРадуйся, вождю воинства Христова, посекающаго вся противныя силы нечестия.\n\nРадуйся, ангеле, посланный от Бога ко истреблению плевел на ниве Его;\n\nРадуйся, друже Божий, желающий всем спасения. Радуйся, благодатный врачу душ и телес;\n\nРадуйся, кроткий указателю лживости магометанския веры держащимся ея.\n\nРадуйся, мудрый удостоверителю в Божественности веры христианския;\n\nРадуйся, неверных учителю веры в Пресвятую Троицу.\n\nРадуйся, светило, сияющее на тверди Казанския области;\n\nРадуйся, теплото, согревающая всех, притекающих к тебе, любовию.\n\nРадуйся, Варсонофие, Казанский чудотворче!\n\nКондак 7\n\nХотяй устроити спасение Казанских татар, научи тя, святителю, врачебной хитрости, да будеши им врач душ и телес; ты же, имея любовь богоподобную, принимал еси вся недужныя, притекающия к тебе, указуя коемуждо на благопотребное врачевство, паче же на Всецелителя Господа Иисуса Христа, поя Ему: Аллилуиа.\n\nИкос 7\n\nНовое и дивное средство к обращению неверных показа Господь в твоем, святителю, врачевании телесных болезней, привлекая к тебе множество недужных всякаго рода, ихже купно с присными их ко Христу приводил еси. Темже, безмездный врачу, приими от нас таковая:\n\nРадуйся, безмездным врачем мудрый подражателю;\n\nРадуйся, яко познал еси благодатную силу их безмезднаго врачевания.\n\nРадуйся, врачевавый недужныя привлечения ради к вере неверующих;\n\nРадуйся, употреблявый врачевание телесное к славе Имене Божия и ко спасению ближних.\n\nРадуйся, ревностный сотрудниче святителя Гурия;\n\nРадуйся, искренний и верный его друже.\n\nРадуйся, успокоителю его на одре смертном;\n\nРадуйся, и по смерти с ним не разлучивыйся.\n\nРадуйся, молитвенниче наш усердный;\n\nРадуйся, хранителю обители твоея неусыпный.\n\nРадуйся, граду Казани похвало и утверждение;\n\nРадуйся, светило, сияющее на тверди Православныя Церкве.\n\nРадуйся, Варсонофие, Казанский чудотворче!\n\nКондак 8\n\nСтранное бе предсказание о тебе, святителю, прозорливаго святителя Акакия, иже еще во время твоего иеродиаконства предрече, яко будеши в богоспасаемом граде Тфери управляти людьми Божиими. Мы же, благоговея пред Богом, дивно устроившем твое Ему служение, поем Ему: Аллилуиа.\n\nИкос 8\n\nВесь был еси Божий, святителю, егда поставлен был еси во епископа богоспасаемому граду Тфери, служа Богу телом и душею: тело изнуряя постом и непрестанным трудом, душу же питая молитвою и словом Божиим. Темже приими от нас сицевая:\n\nРадуйся, светильниче Тферския Церкве;\n\nРадуйся, добрый ея пастырю.\n\nРадуйся, словесных овец мудрый питателю;\n\nРадуйся, верный Христов подражателю.\n\nРадуйся, Апостолов наследниче;\n\nРадуйся, неутомимый делателю нивы Божия.\n\nРадуйся, благовременный ея напоителю;\n\nРадуйся, отеческих преданий хранителю.\n\nРадуйся, веры Христовы православный учителю;\n\nРадуйся, строгий поста блюстителю. Радуйся, образ верующим в тебе самом написавый;\n\nРадуйся, неусыпный молитвенниче о стаде твоем.\n\nРадуйся, Варсонофие, Казанский чудотворче!\n\nКондак 9\n\nВси Ангели небеснии восхвалиша Бога, даровавшаго тебе, святителю, чудный дар врачевания телесных и душевных болезней, имже всех привлекал еси, поя Богу: Аллилуиа.\n\nИкос 9\n\nВитии многовещаннии риторскими своими языки не возмогут изрещи пастырских твоих подвигов, святителю: како бо мощно вся поведати о строгости поста твоего или о неусыпном препровождении нощей в молитве; мы же благоговейно взываем ти сице:\n\nРадуйся, пастырю, в строгом посте себе содержавый;\n\nРадуйся, подвижниче благочестия, нощи в молитве без сна препроводивый.\n\nРадуйся, собеседниче Божий;\n\nРадуйся, сеятелю небесныя радости твоими молитвенными слезами.\n\nРадуйся, плоть твою всецело духови поработивый;\n\nРадуйся, со страстьми и похотьми ю распявый.\n\nРадуйся, Тферскую паству твою от заразы молитвами сохранивый;\n\nРадуйся, сердобольный о верных попечителю.\n\nРадуйся, во всех скорбях их утешителю;\n\nРадуйся, пастырю милосердный ко всем бедствующим.\n\nРадуйся, участниче во всех скорбех и нуждах ближних твоих;\n\nРадуйся, сострадателю всем страждущим.\n\nРадуйся, Варсонофие, Казанский чудотворче!\n\nКондак 10\n\nСпасти хотя душу твою, святителю, ты, возжелев покоя духовнаго, Тферскую паству твою в старости оставил еси и переселился еси паки в устроенную тобою Казанскую обитель боголепнаго Спасова Преображения, поя в ней до конца земнаго жития твоего Богу: Аллилуиа.\n\nИкос 10\n\nСтена и крепкое ограждение был еси, святителю, Казанския твоея обители, отвращая от нея все беды и напасти святыми твоими молитвами, и примером своим утверждая в братии благочестие и святость. Темже по долгу вопием ти:\n\nРадуйся, столпе благочестия;\n\nРадуйся, трудолюбивый молитвенниче.\n\nРадуйся, поста и молитвы учителю;\n\nРадуйся, милостыни щедрый раздаятелю.\n\nРадуйся, благочиния церковного ревнителю;\n\nРадуйся, наставниче монахов предобрый.\n\nРадуйся, неопустительный посетителю ежедневныя службы Божия;\n\nРадуйся, земный ангеле и небесный человече.\n\nРадуйся, от земли на небо возлетевый;\n\nРадуйся, и по смерти твоей нас не оставляяй.\n\nРадуйся, присный наш благодетелю;\n\nРадуйся, всегдашний наш во Христе наставниче и попечителю.\n\nРадуйся, Варсонофие, Казанский чудотворче!\n\nКондак 11\n\nПение всеумиленное приносим ти, святителю, и молим тя умолити Христа Бога, да дарует всем нам благодать и силу ко спасению, да выну с тобою поем Ему: Аллилуиа.\n\nИкос 11\n\nСветоприемный светильник истиннаго света сущим на земли являешися, святителю Варсонофие, просвещаеши бо сердца верных и разуму Божественному вся наставляеши, поучая и нас радостно взывати тебе:\n\nРадуйся, святителю, предстояй Престолу Божию;\n\nРадуйся, Пресвятыя Троицы присноблаженный служителю.\n\nРадуйся, предстояй и последуяй Агнцу Божию;\n\nРадуйся, Матере Божия собеседниче.\n\nРадуйся, Херувимов и Серафимов сообщниче;\n\nРадуйся, Архангелов и Ангелов сослужителю.\n\nРадуйся, Предтечи Господня спредстоятелю;\n\nРадуйся, Апостолов подражателю.\n\nРадуйся, Мучеников соревнователю;\n\nРадуйся, Святителей равностоятелю.\n\nРадуйся, Преподобных украшение;\n\nРадуйся, всех святых сожителю.\n\nРадуйся, Варсонофие, Казанский чудотворче!\n\nКондак 12\n\nБлагодать, данную ти от Бога, ведуще, притекаем к раце мощей твоих, святителю Варсонофие, усердно умоляюще тя о неоставлении нас святыми твоими молитвами, да и мы по окончании нашего земнаго жительства с тобою воспоем Богу: Аллилуиа.\n\nИкос 12\n\nПоюще блаженную кончину твою, еюже, яко орел, в горняя воспарил еси, молим тя, святителю Варсонофие, быти нам во всем ко благу помощником и всегда слышати ны, усердно взывающих ти:\n\nРадуйся, Святителей похвало;\n\nРадуйся, скорый помощниче с верою к тебе притекающим.\n\nРадуйся, неусыпный хранителю иноков твоея обители;\n\nРадуйся, защитниче граду Казани.\n\nРадуйся, усердный молитвенниче о всех, к тебе притекающих;\n\nРадуйся, врачу недугующих.\n\nРадуйся, пастырю, соблюдаяй словесное стадо твое;\n\nРадуйся, помощниче и защитниче обидимых.\n\nРадуйся, дарователю радости плачущим;\n\nРадуйся, обуреваемых наставниче.\n\nРадуйся, скорбных утешение;\n\nРадуйся, спасаемых ободрителю и подкрепителю.\n\nРадуйся, Варсонофие, Казанский чудотворче!\n\nКондак 13\n\nО, всеблаженный и святый святителю отче Варсонофие, святыми твоими молитвами умоли Господа Бога, еже избавити всех нас, притекающих к тебе, от всякия скорби, от всяких бед и напастей, и от всякаго зла, душевнаго и телеснаго, да выну с тобою поем Ему: Аллилуиа.\n\n[Се́й конда́к глаго́лется три́жды.]\n[Далее повторяем 1‑е икос и кондак:]\n\nИкос 1\n\nАнгелов Творец и всея твари Содетель яви тя Церкви Своей святей новаго святителя и чудотворца, имущаго к Нему дерзновение молить об избавлении нас от всяких бед и скорбей. Сего ради восхваляем тя сице:\n\nРадуйся, благословенное чадо благочестиваго отца, сподобившагося благодати священства;\n\nРадуйся, благодатный воспитанниче благоговейнаго учителя.\n\nРадуйся, орошенный благодатию, лиявшеюся от его наставлений;\n\nРадуйся, отроче, приявший в сердце твое начало премудрости.\n\nРадуйся, яко тою вся буяя юности от сердца твоего отгнал еси;\n\nРадуйся, скоро и спешно навыкнувый наказанию закона Божия.\n\nРадуйся, разумом и добродетельным житием Пресвятое Имя Божие прославивый;\n\nРадуйся, радосте и утешение твоим родителем.\n\nРадуйся, крине, возращенный на земли для райских селений;\n\nРадуйся, молитвенниче наш усердный.\n\nРадуйся, крепкий наш заступниче;\n\nРадуйся, мудрый и кроткий наш наставниче.\n\nРадуйся, Варсонофие, Казанский чудотворче!\n\nКондак 1\n\nВозбранному святителю и чудотворцу Варсонофию составим похвалу, яко усердному молитвеннику нашему и скорому помощнику. Ты же, святителю, яко имеяй дерзновение ко Господу, умоли Его избавляти нас от всяких бед и скорбей, да с радостию зовем ти: Радуйся, Варсонофие, Казанский чудотворче!\n\nМолитва святителю Варсонофию, епископу Тверскому, Казанскому чудотворцу\n\nПриникни, святителю Варсонофие, с горних селений на притекающих к раце мощей твоих и вонми молению их: умоли Господа Бога даровати всем нам, еже ко спасению нашему мы просим у Него при святых мощах твоих. Буди всем нам заступник и ходатай в нуждах наших и прошениях. Умоли Господа Бога даровати крепкий и ненарушимый мир, благочиние, просвещение умов и сердец, и земли плодоносие, пастырем святыню, законам правду и силу, военачальником мудрость и непобедимое мужество, градоначальником суд, воинству преданность вере и Отечеству, и неодолимую храбрость, всем же православным христианом здравие и благочестие. Сохраняй обитель твою святую от всех наветов вражиих, да словом и делом прославляется в ней всесвятое Имя Отца и Сына и Святаго Духа, ныне и присно и во веки веков. Аминь.\n\nРекомендуем молитвы\n\nАкафист архангелу Божию Михаилу\n\nАкафист благоверному князю Андрею Боголюбскому\n\nАкафист благоверному князю Игорю Черниговскому и Киевскому\n\nАкафист Благовещению Пресвятой Богородицы\n\nАкафист благодарственный по святом Причащении\n\nVk·Tg·Max