Кондак 1\n\nВозбранный святителю и чудотворче Гурие, приими от нас недостойных подобающую ти похвалу, яко первосвятителю, учителю и покровителю града Казани. И, яко имеяй дерзновение ко Господу, от всяких нас бед и скорбей избавляй, да с радостию зовем ти:\n\nРадуйся, Гурие, Казанский и Свияжский чудотворче.\n\nИкос 1\n\nАнгелов Творец и всея твари Содетель предъизбра, освяти и постави тя, святителю, просветителя, учителя и покровителя граду Казани. Нас же научи вопити тебе сице:\n\nРадуйся, предопределенный в предвечном совете Божием к просвещению неверных;\n\nРадуйся, предочищенный для сего служения сосуде благодати Божия.\n\nРадуйся, злато, искушенное в горниле долговременных страданий;\n\nРадуйся, с юности миром отверженный и мира отвергийся.\n\nРадуйся, в темницу невинно, яко Иосиф, заключенный;\n\nРадуйся, в той темнице небесней премудрости научивыйся.\n\nРадуйся, в темнице тойже свет, даровавший тебе свободу, узревый;\n\nРадуйся, из нея чудным образом изведенный.\n\nРадуйся, по получении свободы всего себе Богу поработивый;\n\nРадуйся, чистоты и девства хранителю.\n\nРадуйся, поста и молитвы ревностный блюстителю;\n\nРадуйся, добльственный Христа последователю.\n\nРадуйся, Гурие, Казанский и Свияжский чудотворче.\n\nКондак 2\n\nВидя себе невинно оклеветана, осужденна и в мрачной темнице пищею безсловесных питаема, глаголал еси, святителю, сам себе: аще не бы Господь Бог попустил сему быти со мною, не бы постигла мя напасть сия; темже пою Ему: Аллилуиа.\n\nИкос 2\n\nРазум Божественный имея, святителю, ты в тайну судеб Божиих о тебе углубился еси и в невинном заточении твоем благость их провидел еси. Темже приими от нас сицевая:\n\nРадуйся, в бедах и теснотах твоих благость Божию видевый;\n\nРадуйся, во всех злых своих Бога благословивый.\n\nРадуйся, за притеснителей своих Ему моливыйся;\n\nРадуйся, прощение им у Него испросивый.\n\nРадуйся, теплою молитвою к Богу себе успокоивый;\n\nРадуйся, ею довольство и утешение в тесноте твоей себе обретый.\n\nРадуйся, свободы чудным образом сподобивыйся;\n\nРадуйся, дивный в сем апостолу Петру наследниче.\n\nРадуйся, терпеливый учениче Христа Спасителя;\n\nРадуйся, вземший Его благое иго на себе.\n\nРадуйся, понесший Его легкое бремя;\n\nРадуйся, монахов украшение.\n\nРадуйся, Гурие, Казанский и Свияжский чудотворче.\n\nКондак 3\n\nСила Вышняго осени тя, святителю, егда с пострижением власов всего себе всецело Ему посвятил еси. Темже в чистоте, посте и молитве непрестанно воспевал еси Богу: Аллилуиа.\n\nИкос 3\n\nИмея истинное ведение о кознях мира, плоти и диавола, ты, святителю, крепко противу тех вооружился еси бдением, постом и молитвою. Темже вопием ти:\n\nРадуйся, неусыпный Христов воине;\n\nРадуйся, присно блюдый душу твою от скверн плоти и мира, и козней диавола.\n\nРадуйся, опасность от них благовременне предвидевый;\n\nРадуйся, постом плоть твою изнуривый.\n\nРадуйся, всецело духу твоему плоть поработивый;\n\nРадуйся, со страстьми и похотьми плоть распявый.\n\nРадуйся, молитвою дух твой окриливый;\n\nРадуйся, на крилех молитвы всегда в горняя паривый.\n\nРадуйся, и на землю благодать Божию молитвами твоими привлекавый;\n\nРадуйся, усердный о всех молитвенниче.\n\nРадуйся, земный ангеле и небесный человече;\n\nРадуйся, монахов мудрый и кроткий наставниче.\n\nРадуйся, Гурие, Казанский и Свияжский чудотворче.\n\nКондак 4\n\nБурю внутрь имел еси помышлений сумнительныx, егда во игумена поставлен был еси Иосифовой обители, во смирении помышляя о трудности сего служения и слабости сил твоих. Темже и служение игумена с себе сложил еси, и в покое духа Богу пел еси: Аллилуиа.\n\nИкос 4\n\nСлыша державный царь Иоанн о твоих святых подвигах в посте и молитве, повеле тя паки поставити во игумена Селижаровой обители. Ты же, приемый волю цареву за волю Божию, паки взял еси врученный тебе жезл правления и труды ко трудом прилагал еси. Темже приими от нас сицевая:\n\nРадуйся, светильниче, не таимый под спудом;\n\nРадуйся, свете, во тьме сияяй.\n\nРадуйся, волю Божию в воле царевой усмотревый;\n\nРадуйся, всецело себе оной предавый.\n\nРадуйся, исполнителю воли Божией усердный;\n\nРадуйся, чина церковнаго строгий блюстителю.\n\nРадуйся, благочиния монастырского верный хранителю;\n\nРадуйся, поборниче православныя веры.\n\nРадуйся, усердный хранителю отеческих преданий;\n\nРадуйся, сосуде благодати Божия.\n\nРадуйся, живый свитче закона Божия;\n\nРадуйся, апостоле Казанския области.\n\nРадуйся, Гурие, Казанский и Свияжский чудотворче.\n\nКондак 5\n\nБоготечному солнцу уподоби тя, святителю, Господь Бог, в дивном твоем избрании на святительский престол, егда тебе жребием указа быти первосвятителем Казанския Церкве. Мы же поем Богу, удивившему на тебе благодать и милость Свою: Аллилуиа.\n\nИкос 5\n\nВидевше державный царь Иоанн и вси православнии людие чудное Божие избрание тя по жребию в первосвятителя Казанския Церкве, радовахуся. Мы же со благоговением воспеваем ти сице:\n\nРадуйся, любимиче Божий, указанный жребием;\n\nРадуйся, служителю Господень, предопределенный для возделания новыя нивы.\n\nРадуйся, пастырю словеснаго стада Христова, блуждавшаго по вертепам неверия и нечестия;\n\nРадуйся, потаенный светильниче, дивно поставленный на высоту Церкве Божия.\n\nРадуйся, проповедниче Евангелия Христова в стране нечестия магометанскаго;\n\nРадуйся, принесый свет Христов в страну тьмы и заблуждений.\n\nРадуйся, крепкая надеждо Церкве Православныя;\n\nРадуйся, исполнителю благих желаний царя державнаго.\n\nРадуйся, обрадовавый его твоим ревностным служением;\n\nРадуйся, радосте и утешение всех градов, иже сподобишася тя видети и от тебе благословитися.\n\nРадуйся, сосуде благодати, просвещающей верных;\n\nРадуйся, первосвятителю Казанския области.\n\nРадуйся, Гурие, Казанский и Свияжский чудотворче.\n\nКондак 6\n\nПроповедником богоносным избран был еси для Казанския области, святителю; темже святолепно шествовал еси из царствующаго града Москвы в новопросвещенный град Казань, освящая шествием и благословением твоим грады и веси на пути и непрестанно воспевая Богу: Аллилуиа.\n\nИкос 6\n\nВозсиявый в богоспасаемом граде Казани свет истины Христос Бог наш, и прогнавый тьму магометанскаго и языческаго нечестия, избра тя, святителю, в перваго зде служителя и исполнителя святой воли Его. Темже освяти тя и прослави, нас же научи вопити тебе сице:\n\nРадуйся, света истины распространителю;\n\nРадуйся, диавольския тьмы прогнателю.\n\nРадуйся, первый сеятелю на новой ниве Божией;\n\nРадуйся, мудрый возрастителю на ней сторичных класов.\n\nРадуйся, неутомимый ея напоителю;\n\nРадуйся, друже царя земнаго, исполняющаго волю Царя Небеснаго.\n\nРадуйся, верный служителю Царя Небеснаго;\n\nРадуйся, апостоле Казанския Церкве.\n\nРадуйся, привлекаяй к вере неверующих чистою Христовою любовию;\n\nРадуйся, друже Христов, приводяй люди к благоговению пред Богом.\n\nРадуйся, притесняемых вдов и сирот защитниче;\n\nРадуйся, всех притекающих к тебе заступниче.\n\nРадуйся, Гурие, Казанский и Свияжский чудотворче.\n\nКондак 7\n\nХотяй устроити тайну спасения Казанских татар и язычников, Христос Бог наш избра тя, святителю, в апостола и просветителя страны сея. Ты же, уразумев тайну спасения, вопиял еси Богу: Аллилуиа.\n\nИкос 7\n\nНовое чудо показа Господь и Спас наш, Иисус Христос, избравый тя в первосвятителя Казанския Церкве, егда тя единаго из четырех жребием указа всей Своей Православной Церкви. Мы же, дивящеся, вопием ти сице:\n\nРадуйся, от вечности предопределенный просветителю Казанския области;\n\nРадуйся, сокровенный до времене сосуде благодати Божия.\n\nРадуйся, избранием твоим всю Церковь удививый и обрадовавый;\n\nРадуйся, темже избранием в преданности Богу укрепивыйся.\n\nРадуйся, дивное твое избрание служением твоим оправдавый;\n\nРадуйся, с благословения Божия грядый в Казань во имя Господне.\n\nРадуйся, в пути твоем непрестанно воспеваяй и благословляяй;\n\nРадуйся, весь путь твой молитвами освятивый.\n\nРадуйся, безбедно на паству твою пришедый;\n\nРадуйся, благодатный обновителю и освятителю града Казани.\n\nРадуйся, благолепнаго храма Пресвятыя Богородицы создателю;\n\nРадуйся, обрадовавый православных Казанских жителей твоим пришествием.\n\nРадуйся, Гурие, Казанский и Свияжский чудотворче.\n\nКондак 8\n\nСтранное избрание твое, святителю, помышляя и боголепное шествие твое на новую паству твою зная, с благоговением возводим умы и сердца свои к Богу, тако устроившему дивное твое прославление, поя Ему: Аллилуиа.\n\nИкос 8\n\nВесь ум твой, святителю, вперил еси к Богу и всего себя предал еси святой воле Его, егда вступил еси на престол Казанския паствы твоея, юже и не престая поучал еси словом и делом. Темже приими от нас похвалы сия:\n\nРадуйся, добрый пастырю, всегда готовый положити душу свою за овцы пажити твоея; Рaдyйcя, мудрый хранителю стада твоего от волков, хотящих губити е.\n\nРадуйся, неутомимый делателю в вертограде Христовом;\n\nРадуйся, наставниче пастырей и учителей твоея паствы.\n\nРадуйся, разумный вождю в житии по заповедем Божиим и преданием апостольским;\n\nРадуйся, отче, просветителю и попечителю всех новокрещенных.\n\nРадуйся, кроткий и добросердечный убедителю в истине и Божественности христианския веры неверующих;\n\nРадуйся, богомудрый вразумителю людей мыслящих. Рaдyйcя, мудрый руководителю твоих сотрудников;\n\nРадуйся, благопопечительный отче всех сиротствующих.\n\nРадуйся, притесняемых заступниче;\n\nРадуйся, ходатаю за неверных, познавших истину.\n\nРадуйся, Гурие, Казанский и Свияжский чудотворче.\n\nКондак 9\n\nВсякое естество ангельское удивися многотрудным твоим пастырским подвигам, показуемым во бдении, посте, молитве, и в неусыпном попечении о стаде твоем. Ты бо, святителю, денно и нощно беседуя с Богом молитвою, словом и делом непрестанно воспевал Ему: Аллилуиа.\n\nИкос 9\n\nВитии многовещанныя, яко рыбы безгласныя видим о тебе, святителю, недоумевают бо глаголати, еже како и отшельником деннонощною молитвою пример подаваеши, и паству твою примерно управляеши. Мы же, дивящеся, благоговейно вопием ти:\n\nРадуйся, пастырю, подаваяй пример монашествующим;\n\nРадуйся, собеседниче с Богом, научаяй всех последованию твоему примеру.\n\nРадуйся, тлетворнаго сна прогонителю;\n\nРадуйся, посту и бдению учителю.\n\nРадуйся, ленивых возбудителю;\n\nРадуйся, примерный Божий подвижниче.\n\nРадуйся, мудро привлекавый неверных к принятию православныя веры;\n\nРадуйся, неутомимый проповедниче слова Божия.\n\nРадуйся, слово сие здраво, немятежно и учительно преподававый;\n\nРадуйся, благоразумный вразумителю магометан в истине христианския веры.\n\nРадуйся, дивный указателю всем неверующим на величие и славу Иисуса Христа;\n\nРадуйся, мудро привлекаяй к Нему всех и вся.\n\nРадуйся, Гурие, Казанский и Свияжский чудотворче.\n\nКондак 10\n\nСпасти хотя магометан и язычников, в новой пастве твоей находящихся, ты, яко добрый пастырь, всю мудрость твою к сему употребил еси и непрестанно Бога в помощь призывал еси, воспевая Ему: Аллилуиа.\n\nИкос 10\n\nСтена еси верующим и к тебе прибегающим, ибо небесе и земли Творец устрои тя, святителю, веры укрепителя, неверия же обличителя, нас же научи взывати тебе сице:\n\nРадуйся, столпе православно верующих;\n\nРадуйся, отверзающий им дверь спасения.\n\nРадуйся, наставниче мудрости о Христе Спасителе;\n\nРадуйся, преподателю Божественныя благодати.\n\nРадуйся, обновителю растленнаго человечества в неверующих;\n\nРадуйся, наставителю мало смыслящих и не смыслящих.\n\nРадуйся, бесовския козни проразумеваяй;\n\nРадуйся, силу Христову проповедуяй.\n\nРадуйся, девство и чистоту храняй и проповедуяй;\n\nРадуйся, друже Жениха, радующийся о сочетании с Ним чистых и незлобивых душ.\n\nРадуйся, архитриклине брака, соединившаго безчисленное множество душ с небесным Женихом;\n\nРадуйся, ревнуяй Божиею ревностию о верности Христу душ христианских.\n\nРадуйся, Гурие, Казанский и Свияжский чудотворче.\n\nКондак 11\n\nПение всякое побеждается, спростретися тщащееся ко множеству многих твоих добродетелей, святителю. Никия бо песни могут быти равночисленны им. Темже, благоговея пред тобою, поем Богу: Аллилуиа.\n\nИкос 11\n\nСветоприемнаго светильника сущим во тьме неразумия видим в тебе, святителю, невещественный бо вжигающи огнь, разгоняеши тьму неверия и на всех обильно проливаеши свет Христов, просвещаяй всякаго человека, грядущаго в мир. Темже по долгу взываем ти сице:\n\nРадуйся, светильниче, возжженный огнем с престола Божия;\n\nРадуйся, причастниче славы Господней.\n\nРадуйся, прославляяй Прославльшаго тя;\n\nРадуйся, проносяй славу Его по безславной области нечестия.\n\nРадуйся, озаряяй умы и сердца людей, сидящих во тьме и сени смертной;\n\nРадуйся, источниче, обильно изливаяй воду благодати Божией.\n\nРадуйся, напаяяй ею умы и сердца жаждущих спасения;\n\nРадуйся, указателю небеснаго рая неведущим его.\n\nРадуйся, верный руководителю всех последующих тебе;\n\nРадуйся, отверзаяй двери Царствия Божия шествующим по тебе.\n\nРадуйся, представляяй их престолу Божию;\n\nРадуйся, сопричисляяй их к сонму святых Божиих.\n\nРадуйся, Гурие, Казанский и Свияжский чудотворче.\n\nКондак 12\n\nБлагодать, данную ти от Бога, обильно изливаеши на всех, притекающих с верою к раце святых мощей твоих, святителю. Темже мы, дивящеся множеству чудес, тобою совершаемых, поем Богу, прославляющему тя: Аллилуиа.\n\nИкос 12\n\nПоюще хвалебную песнь тебе, святителю, прославленный Богом на небеси и на земли, воспеваем ти сице:\n\nРадуйся, во свете предстояй престолу Вышняго;\n\nРадуйся, всегда воспеваяй славу Божию.\n\nРадуйся, непрестанно зряй Бога лицем к лицу;\n\nРадуйся, приникаяй в тайну Пресвятыя Троицы.\n\nРадуйся, усердный Ея поклонниче;\n\nРадуйся, последователю Агнцу Божию, вземшему грехи мира.\n\nРадуйся, предводителю всех спасенных и спасаемых тобою;\n\nРадуйся, и нас грешных в мире сем не оставляяй.\n\nРадуйся, не тесно в любви твоей всех вмещаяй;\n\nРадуйся, любвеобильный о всех нас молитвенниче.\n\nРадуйся, паствы твоея покровителю;\n\nРадуйся, граду Казани похвало и украшение.\n\nРадуйся, Гурие, Казанский и Свияжский чудотворче.\n\nКондак 13\n\nО, всеблаженный и святый святителю отче Гурие, присный наш наставниче, ходатаю и покровителю, моли о нас Христа Бога, да избавит паству твою и вся грады и веси христианския от враг видимых и невидимых, от нашествия иноплеменник, от недуга и глада, от всякия скорби и смертоносныя раны, и грядущия муки, вопиющих Ему: Аллилуиа.\n\n[Се́й конда́к глаго́лется три́жды.]\n[Далее повторяем 1‑е икос и кондак:]\n\nИкос 1\n\nАнгелов Творец и всея твари Содетель предъизбра, освяти и постави тя, святителю, просветителя, учителя и покровителя граду Казани. Нас же научи вопити тебе сице:\n\nРадуйся, предопределенный в предвечном совете Божием к просвещению неверных;\n\nРадуйся, предочищенный для сего служения сосуде благодати Божия.\n\nРадуйся, злато, искушенное в горниле долговременных страданий;\n\nРадуйся, с юности миром отверженный и мира отвергийся.\n\nРадуйся, в темницу невинно, яко Иосиф, заключенный;\n\nРадуйся, в той темнице небесней премудрости научивыйся.\n\nРадуйся, в темнице тойже свет, даровавший тебе свободу, узревый;\n\nРадуйся, из нея чудным образом изведенный.\n\nРадуйся, по получении свободы всего себе Богу поработивый;\n\nРадуйся, чистоты и девства хранителю.\n\nРадуйся, поста и молитвы ревностный блюстителю;\n\nРадуйся, добльственный Христа последователю.\n\nРадуйся, Гурие, Казанский и Свияжский чудотворче.\n\nКондак 1\n\nВозбранный святителю и чудотворче Гурие, приими от нас недостойных подобающую ти похвалу, яко первосвятителю, учителю и покровителю града Казани. И, яко имеяй дерзновение ко Господу, от всяких нас бед и скорбей избавляй, да с радостию зовем ти:\n\nРадуйся, Гурие, Казанский и Свияжский чудотворче.\n\nМолитва святителю Гурию, Казанскому и Свияжскому чудотворцу\n\nСвятителю отче Гурие, предстоя священной раке многоцелебных мощей твоих, молим тя усердно быти всегда и везде нашим ходатаем, заступником и покровителем. Исходатайствуй пастве твоей мир, тишину, благоденствие, здравие и спасение. Буди постоянным нашим заступником от всех врагов, видимых и невидимых: покрывай нас от нахождения всех бед, напастей и скорбей, паче же от искушений врага темнаго. Предстоящим же зде и молящимся испроси у Господа Бога вся, яже ко спасению своему они просят у Него в своих нуждах и скорбях, да все мы с тобою прославляем всесвятое имя Отца и Сына и Святаго Духа, ныне и присно, и во веки веков. Аминь.\n\nРекомендуем молитвы\n\nАкафист архангелу Божию Михаилу\n\nАкафист благоверному князю Андрею Боголюбскому\n\nАкафист благоверному князю Игорю Черниговскому и Киевскому\n\nАкафист Благовещению Пресвятой Богородицы\n\nАкафист благодарственный по святом Причащении\n\nVk·Tg·Max