Минея, 14 Мая.\nГлас 3\n\nПеснь 1\n\nИрмос: Су́шу глубороди́тельную зе́млю/ со́лнце наше́ствова иногда́:/ я́ко стена́ бо, огусте́ обапо́лы вода́/ лю́дем пешемореходя́щим/ и богоуго́дно пою́щим:/ пои́м Го́сподеви, сла́вно бо просла́вися.\n\nПрипев: Святи́телю о́тче Ники́то, моли́ Бо́га о на́с.\n\nА́гнче непоро́чный, Бо́жий Сло́ве,/ отве́рзи моя́ недосто́йная уста́,/ да возмогу́ воспе́ти святи́теля Ники́ту, Твоего́ уго́дника.\n\nПрипев: Святи́телю о́тче Ники́то, моли́ Бо́га о на́с.\n\nБоле́зньми по́стническими ду́шу просвети́в, преподо́бне,/ я́ко чи́сту же́ртву Христу́ предста́вил еси́, ра́дуяся, поя́:/ сла́вно бо просла́вися.\n\nСла́ва Отцу́ и Сы́ну и Свято́му Ду́ху.\n\nВоздержа́нием те́ло ду́ху порабо́тил еси́,/ ду́шу же равноа́нгельну сотвори́л еси́./ Помина́й ве́рою чту́щия тя, поя́ Бо́гу:/ сла́вно бо просла́вися.\n\nИ ны́не и при́сно и во ве́ки веко́в. Ами́нь.\n\nБогородичен: Господороди́тельнице Влады́чице Мари́е,/ моли́, Его́же родила́ еси́, Бо́га и Царя́ на́шего,/ да ми́лостив бу́дет нам в день Су́дный.\n\nПеснь 3\n\nИрмос: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ несть свят, несть пра́веден, па́че Тебе́, Го́споди.\n\nПрипев: Святи́телю о́тче Ники́то, моли́ Бо́га о на́с.\n\nДе́латель быв за́поведей Госпо́дних,/ непреста́нно в них поуча́яся, о́тче Ники́то,/ сего́ ра́ди вшел еси́ в Небе́сная, вопия́ ра́достно:/ несть свят и несть пра́веден, па́че Тебе́, Го́споди.\n\nПрипев: Святи́телю о́тче Ники́то, моли́ Бо́га о на́с.\n\nЕгда́, зави́дев тебе́, прелука́вый хотя́ше запя́ти от доброде́телей,/ сопротивоста́в, преподо́бне, без ве́сти того́ сотвори́л еси́, Христу́ вопия́:/ несть свят и несть пра́веден, па́че Тебе́, Го́споди.\n\nСла́ва Отцу́ и Сы́ну и Свято́му Ду́ху.\n\nЖитие́м доброде́тельным Бо́гу угоди́л еси́, велиа́ра посрами́в,/ и Христу́ возопи́л еси́:/ несть свят и несть пра́веден, па́че Тебе́, Го́споди.\n\nИ ны́не и при́сно и во ве́ки веко́в. Ами́нь.\n\nБогородичен: Зачала́ еси́ О́тчее Сло́во Ипоста́сное,/ Его́же моли́, Богоро́дице, изба́вити от бед рабы́ Твоя́,/ вои́стинну призыва́ющия Тя.\n\nСедален, глас 1\n\nЯ́ко сад присноцвету́щ, лю́ди твоя́ сотвори́л еси́,/ сия́ во благоче́стии возрасти́в, умно́жил еси́,/ и от сего́ ве́рен раб и де́латель виногра́да Христо́ва показа́лся еси́,/ и трудо́м возме́здие досто́йно восприя́л еси́, святи́телю,/ моли́ Христа́ Бо́га, да спасе́т ду́ши на́ша.\n\nСла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.\n\nБогородичен: Всех Творца́, Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х Твои́х заче́нши,/ без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и ми́ра заступле́ние.\n\nПеснь 4\n\nИрмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.\n\nПрипев: Святи́телю о́тче Ники́то, моли́ Бо́га о на́с.\n\nЗако́ном оте́ческим после́дуя и сих житие́ подража́я,/ непреста́нно Христу́ взыва́л еси́: сла́ва си́ле Твое́й.\n\nПрипев: Святи́телю о́тче Ники́то, моли́ Бо́га о на́с.\n\nИз мла́да Христа́ возлюби́л еси́,/ сего́ ра́ди я́ко рачи́теля Своего́ возлюби́ тя,/ к Нему́же вопие́ши:/ сла́ва си́ле Твое́й.\n\nСла́ва Отцу́ и Сы́ну и Свято́му Ду́ху.\n\nИсполня́я зако́ны Боже́ственныя,/ преиспо́лнился еси́ дарова́ний Боже́ственных, святи́телю Ники́то, ве́рно взыва́я:/ сла́ва си́ле Твое́й, Го́споди.\n\nИ ны́не и при́сно и во ве́ки веко́в. Ами́нь.\n\nБогородичен: Кади́льнице всезлата́я, Мари́е Всенепоро́чная,/ Христа́ моли́, Его́же родила́ еси́,/ изба́витися нам от бед и огня́ ве́чнующаго.\n\nПеснь 5\n\nИрмос: К Тебе́ у́тренюю, всех Творцу́,/ преиму́щему всяк ум ми́рови:/ зане́ свет повеле́ния Твоя́,/ в ни́хже наста́ви мя.\n\nПрипев: Святи́телю о́тче Ники́то, моли́ Бо́га о на́с.\n\nЛук врага́ сокруши́л еси́,/ и брань его́ до конца́ разори́л еси́,/ и соверше́ния доброде́телей, преподо́бне, дости́гл еси́.\n\nПрипев: Святи́телю о́тче Ники́то, моли́ Бо́га о на́с.\n\nМоли́твою возше́л еси́ на Небе́сная,/ иде́же с ли́ки оте́ц пребыва́я, весели́шися./ Помина́й, преподо́бне, па́мять твою́ све́тло торжеству́ющия.\n\nСла́ва Отцу́ и Сы́ну и Свято́му Ду́ху.\n\nНеизрече́нных та́ин Христо́вых служи́тель бы́ти сподо́бился еси́/ и, сия́ принося́ Бо́гу, за мир приле́жно моли́лся еси́.\n\nИ ны́не и при́сно и во ве́ки веко́в. Ами́нь.\n\nБогородичен: Упова́ние и наде́жда на́ша Ты еси́, Пречи́стая Влады́чице,/ спаси́ лю́ди Твоя́, моля́щияся и и́мя Твое́ призыва́ющия.\n\nПеснь 6\n\nИрмос: Бе́здна после́дняя грехо́в обы́де мя,/ и исчеза́ет дух мой,/ но простры́й, Влады́ко,/ высо́кую Твою́ мы́шцу,/ я́ко Петра́, мя, Упра́вителю, спаси́.\n\nПрипев: Святи́телю о́тче Ники́то, моли́ Бо́га о на́с.\n\nПредызбра́н быв Боже́ственною благода́тию, во е́же па́ствити ста́до христоимени́то,/ ты же, преподо́бне, я́ко па́стырь и́стинен,/ приле́жно о ста́де попече́ние име́л еси́.\n\nПрипев: Святи́телю о́тче Ники́то, моли́ Бо́га о на́с.\n\nРазу́мне разсужда́я, ча́да твоя́ ча́сто нака́зовал еси́ духо́вными словесы́,/ да пребу́дут тве́рдо соблюда́юще ве́ру правосла́вную.\n\nСла́ва Отцу́ и Сы́ну и Свято́му Ду́ху.\n\nСвяти́тельства че́стию почте́н, приле́жно моле́ние за лю́ди твоя́ приноси́л еси́:/ да ми́лостива Бо́га обря́щут в день Су́дный.\n\nИ ны́не и при́сно и во ве́ки веко́в. Ами́нь.\n\nБогородичен: Ты еси́, Пречи́стая Богоро́дице, прибе́жище на́ше и утвержде́ние,/ моли́ Сы́на Твоего́ и Бо́га на́шего пода́ти нам спасе́ние и грехо́в оставле́ние.\n\nКондак, глас 6\n\nАрхиере́йства са́ном почти́вся/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою све́л еси́,/ овогда́ же и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га/ спасти́ лю́ди твоя́ моля́щияся,/ да вси вопие́м ти:/ ра́дуйся, святи́телю о́тче предивный.\n\nИкос\n\nКто не почуди́тся, кто не просла́вит/ неизсле́димую и несказа́нную глубину́ милосе́рдия Твоего́, Христе́ Бо́же?/ Я́ко просла́вил еси́ в после́днем ро́де уго́дника Твоего́, святи́теля Ники́ту,/ его́же обрето́шася честны́я мо́щи це́лы и неразруши́мы./ Ему́же рече́м:/ егда́ во пло́ти был еси́, преподо́бне,/ де́лании Боже́ственными ду́шу предочи́стил еси́,/ святи́тельства па́ству восприи́м,/ сосу́д избра́н Боже́ственнаго Ду́ха показа́лся еси́/ и ста́до твое́ до конца́ в ве́ре утверди́л еси́./ Тем ра́дуйся, о́тче преди́вный.\n\nПеснь 7\n\nИрмос: Трие́ о́троцы в пещи́, Тро́ицу прообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших.\n\nПрипев: Святи́телю о́тче Ники́то, моли́ Бо́га о на́с.\n\nУясня́ют, воспева́юще, А́нгельстии чи́ни па́мять твою́, Ники́то святи́телю,/ и мы, земни́и, уми́льно вопие́м:/ испроси́ нам оставле́ние согреше́ний и благи́х наслажде́ние.\n\nПрипев: Святи́телю о́тче Ники́то, моли́ Бо́га о на́с.\n\nФарао́на мы́сленнаго победи́л еси́, от Христа́ дерзнове́ние прии́м,/ и ве́лие ра́дование святы́м А́нгелом сотвори́л еси́, поя́:/ оте́ц на́ших Бо́же, благослове́н еси́.\n\nСла́ва Отцу́ и Сы́ну и Свято́му Ду́ху.\n\nХеруви́му подо́бяся, легко́ на высоту́ возше́л еси́/ и ны́не со безпло́тными водворя́ешися, Христу́ вопия́:/ оте́ц на́ших Бо́же, благослове́н еси́.\n\nИ ны́не и при́сно и во ве́ки веко́в. Ами́нь.\n\nБогородичен: От утро́бы Твоея́ про́йде у́мное, Богоро́дице, Со́лнце,/ Сего́ моли́, я́ко Сы́на Твоего́ и Го́спода,/ пода́ти нам скорбе́й разреше́ние и боле́зней облегче́ние,/ да ра́достно от души́ вопие́м Христу́:/ отце́в на́ших Бо́же, благослове́н еси́.\n\nПеснь 8\n\nИрмос: Веще́ственнаго огня́ пла́мень/ невеще́ственным увяди́ша Богозри́мии о́троцы и поя́ху:/ благослови́те, вся дела́ Госпо́дня, Го́спода.\n\nПрипев: Святи́телю о́тче Ники́то, моли́ Бо́га о на́с.\n\nЛю́дем Росси́йским испроси́, Ники́то святи́телю, мир, здра́вие, спасе́ние и на враги́ одоле́ние,/ да в ра́дости душе́вней возопие́м:/ благослови́те, вся дела́ Госпо́дня, Го́спода.\n\nПрипев: Святи́телю о́тче Ники́то, моли́ Бо́га о на́с.\n\nЧу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́л еси́ и Бо́гу тем угоди́л еси́./ Ему́же вопие́м:/ благослови́те, вся дела́ Госпо́дня, Го́спода.\n\nБлагослови́м Отца́ и Сы́на и Свята́го Ду́ха, Го́спода.\n\nШум пра́зднующих слы́шати, святи́телю, сподо́бился еси́:/ шу́ияго стоя́ния изба́ви мя и страсте́й треволне́ния/ и к приста́нищу покая́ния наста́ви мя,/ да тя сла́влю во вся ве́ки.\n\nИ ны́не и при́сно и во ве́ки веко́в. Ами́нь.\n\nБогородичен: Ще́драго и человеколюби́ваго Бо́га роди́ти, Богоро́дице, сподо́билася еси́,/ Того́ моли́, Неискусобра́чная Отрокови́це,/ низпосла́ти нам, ве́рным, ве́лию ми́лость.\n\nПеснь 9\n\nИрмос: В зако́не се́ни и писа́ний/ о́браз ви́дим, ве́рнии:/ всяк му́жеский пол, ложесна́ разверза́я,/ свят Бо́гу./ Тем перворожде́нное Сло́во Отца́ Безнача́льна,/ Сы́на, первородя́щася Ма́терию неискусому́жно,/ велича́ем.\n\nПрипев: Святи́телю о́тче Ники́то, моли́ Бо́га о на́с.\n\nМо́ре жите́йское преплы́в воздержа́нием, дости́гл еси́ широты́ ра́йския,/ иде́же со А́нгелы при́сно весели́шися.\n\nПрипев: Святи́телю о́тче Ники́то, моли́ Бо́га о на́с.\n\nРа́ка моще́й твои́х, святи́телю, дража́йши сапфи́ра показа́ся,/ чудотвори́ва бо бе и исцеле́ния источа́ющи./ Е́яже облобыза́юще с ве́рою, приходя́щии ра́достно от души́ вопию́т:/ сон че́стен пред Го́сподем смерть преподо́бных Его́.\n\nСла́ва Отцу́ и Сы́ну и Свято́му Ду́ху.\n\nКрестоно́сно предстои́ши престо́лу Вседержи́теля, сла́вою осиява́емь Све́та Присносу́щнаго./ Моли́ся, Ники́то святи́телю, о чту́щих ве́рно па́мять твою́.\n\nИ ны́не и при́сно и во ве́ки веко́в. Ами́нь.\n\nБогородичен: Лук сокруши́ся лука́ваго одоле́нием Сы́на Твоего́ и Бо́га на́шего,/ чудна́ побе́да, Богоро́дице, и ди́вно одоле́ние соде́яся, Влады́чице,/ во спасе́ние душ на́ших.\n\nСветилен\n\nПлотска́я мудрова́ния ду́ху повину́л еси́/ и, я́ко зла́то, огне́м искуси́вся,/ прия́телище был еси́ Ду́ху Пресвято́му,/ о́тче Ники́то святи́телю.\n\nСла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.\n\nБогородичен: Тя пе́сньми ублажа́ем, Де́во,/ Бо́га бо роди́вши, на руку́ носи́ла еси́,/ Того́ моли́ за ду́ши на́ша.\n\nМолитва святителю Никите, затворнику Печерскому, епископу Новгородскому\n\nО архиере́ю Бо́жий, святи́телю Ники́то, услы́ши нас, гре́шных раб твои́х, сте́кшихся днесь в свяще́нный храм сей, моля́щихся тебе́ и к свяще́нной твое́й ра́це притека́ющих и умиле́нно вопию́щих: я́коже седя́ на престо́ле святи́тельства в Вели́ком Новегра́де сем, и еди́ною належа́щею бездо́ждию дождь моли́твами свел еси́ и па́ки гра́ду сему́, о́гненным пла́менем обше́дшему, моли́твою пла́мень о́гненный угаси́л еси́, и ны́не мо́лим тя, о святи́телю Христо́в Ники́то, моли́ся ко Го́споду, е́же изба́вити Вели́кий Но́вград сей и вся гра́ды и страны́ христиа́нския от тру́са, пото́па, гла́да, огня́, гра́да, меча́ и от всех враго́в, ви́димых и неви́димых. Я́ко да избра́нных моли́тв твои́х ра́ди спаса́еми, сла́вим Пресвяту́ю Тро́ицу, Отца́ и Сы́на и Свята́го Ду́ха, и твое́ ми́лостивное предста́тельство ны́не и при́сно и во ве́ки веко́в. Ами́нь.\n\nРекомендуем молитвы\n\nВеликий канон свт. Андрея Критского (с переводом на русский язык)\n\nИн канон Преполовения Пятидесятницы\n\nИн канон святителю Николаю, архиепископу Мир Ликийских, чудотворцу\n\nИн канон святому великомученику Феодору Тирону\n\nКанон Ангелу Хранителю Иоанна Мавропода, монаха\n\nVk·Tg·Max