Перейти к основному содержанию\n\nТексты\n\nДокументы\n\nГлавная\n\nО проекте\n\nОбратная связь\n\nТексты\n\nАкафисты\n\nСлужбы\n\nТропари, кондаки\n\nЧины\n\nСлужба священномученику Константину Богородскому\n\nТекст утвержден Священным Синодом\nРусской Православной Церкви\n17 июля 2020 года\n(журнал № 34)\n\nРаспечатать с сайта\nСкачать в гражданском начертании с ударениями (docx)\nСкачать в церковнославянском начертании (pdf)\n\nМе́сяца сентября́ в 19-й день\nСвященному́ченика Константи́на, пресви́тера Богоро́дскаго\n\nНА ВЕЛИ́ЦЕЙ ВЕЧЕ́РНИ\n\nНа Г о́споди, воззва́х: стихи́ры на 8, глас 5.\n\nПодо́бен: Р а́дуйся, Живоно́сный Кре́сте:\n\nО́ тче священному́чениче Константи́не,/ от ю́ности усе́рдно И́стину взыску́я,/ му́дрость духо́вную до́бре стяжа́л еси́./ Те́мже и Бог лю́дем заблу́ждшим тя яви́,/ па́стыря до́браго, благоче́стия побо́рника,/ ве́ры правосла́вныя защи́тника и раско́лов обличи́теля,/ пра́вды Бо́жия неустраши́маго пропове́дника./ Укрепи́ и нас, свя́те, во и́стине пра́во ходи́ти,// е́же спасти́ся душа́м на́шим.\n\nС вяще́нства дар прие́м/ и крест твой на ра́мо взем,/ до́брый па́стырю Константи́не,/ до́бле во благоче́стии потруди́лся еси́/ и, му́жественне да́же до сме́рти пострада́в,/ от Христа́ му́ченический вене́ц прия́л еси́./ Ны́не, в Небе́снем Ца́рствии Па́схи ве́чныя наслажда́яся,/ со все́ми святы́ми Бо́га прославля́еши,// Его́же моли́ дарова́ти нам ве́лию ми́лость.\n\nО́ тче священному́чениче Константи́не,/ Це́ркве Ру́сския благо́е украше́ние,/ вельми́ тя Христо́с просла́ви/ и сло́во и́стины тебе́ дарова́,/ и́мже, пле́велы раско́ла исторга́я,/ мно́гия лю́ди во огра́ду церко́вную возврати́л еси́/ и едине́ние ду́ха в сою́зе ми́ра храни́ти призыва́л еси́./ Те́мже в единомы́слии и нас утверди́,// во е́же спасти́ся душа́м на́шим.\n\nО́ тче священному́чениче Константи́не,/ све́том Христо́вы и́стины сияя́,/ зе́млю Моско́вскую просвети́л еси́/ и, тьму злове́рия отгоня́я,/ заблу́ждшия к Бо́гу обрати́л еси́,/ се́мена же благоче́стия насажда́я,/ ду́ши ве́рных, я́ко плод духо́вный, Христу́ прине́сл еси́./ Ны́не же, в Небе́сных селе́ниих пребыва́я,// моли́ спасти́ся душа́м на́шим.\n\nСла́ва, глас 8:\n\nП рииди́те, ве́рнии, лик соста́вльше,/ благода́рственную песнь принесе́м Триипоста́сному Бо́гу,/ дарова́вшему нам добропобе́днаго му́ченика Константи́на,/ и́стиннаго пропове́дника Боже́ственнаго Ева́нгелия,/ до́браго па́стыря слове́сных ове́ц,/ те́плаго моли́твенника и усе́рднаго хода́тая,/ и с любо́вию вси возопии́м:/ Го́споди, моли́твами и предста́тельством уго́дника Твоего́// поми́луй и спаси́ ду́ши на́ша.\n\nИ ны́не, пра́здника.\n\nВход. Проки́мен дне. И чте́ния 3 му́ченическая.\n\nНа лити́и стихи́ра, глас 6:\n\nЯ́ ко дар свяще́нный,/ страда́ния восприя́л еси́ Христа́ ра́ди,/ И́же тя, я́ко ве́рнаго раба́ Своего́,/ священному́чениче Константи́не,/ побе́дным венце́м украси́/ и ли́ку святы́х му́чеников сочета́./ Ему́же моли́ся, те́плый наш предста́телю,/ оте́честву на́шему в ми́ре пребы́вати// и лю́дем его́ во и́стинней ве́ре ходи́ти.\n\nСла́ва, глас 8:\n\nК а́ко беззако́ннии лю́дие на пра́веднаго ру́ки своя́ простро́ша?/ Ка́ко кро́ткаго гла́са не услы́шаша?/ Ка́ко иере́я Бо́жия уби́ти не устраши́шася/ и, лю́те зло́бствующе, в земли́ жива́го погребо́ша?/ О, безбо́жных тще́тнаго ликова́ния!/ И́хже безу́мную зло́бу Христо́с упраздни́./ Те́мже Це́рковь Небе́сная све́тло торжеству́ет/ и победоно́снаго Константи́на с ра́достию срета́ет,/ его́же Христо́с Бог, све́тлым венце́м венча́я,/ в ри́зы бе́лыя облека́ет/ и му́ченическому ли́ку совокупля́ет./ Мы же со умиле́нием зове́м:/ Го́споди, моли́твами Твоего́ уго́дника// в ве́ре и́стинней укрепи́ и поми́луй нас.\n\nИ ны́не, пра́здника.\n\nНа стихо́вне стихи́ры, глас 2.\n\nПодо́бен: Е гда́ от Дре́ва:\n\nЕ гда́ законопресту́пнии лю́дие,/ зло́бою неве́рия ослепле́ннии,/ в темни́цу мра́чную тя всади́ша/ и непра́ведно на смерть осуди́ша,/ тогда́, блаже́нне Константи́не,/ любо́вию ко Христу́ распала́емь,/ си́це глаго́лал еси́:/ Бо́же, в по́мощь мою́ вонми́,// Го́споди, помощи́ ми потщи́ся.\n\nСтих: С вяще́нницы Твои́ облеку́тся в пра́вду,// и преподо́бнии Твои́ возра́дуются.\n\nЕ гда́ безбо́жнии мучи́телие,/ беззако́нное веле́ние исполня́юще,/ ру́ки своя́ на тя возложи́ша/ и, я́ко злоде́я, на смерть ведо́ша,/ тогда́, свя́те испове́дниче,/ ве́рою в Сы́на Бо́жия укрепля́емь/ и у́мныма очи́ма на по́двиг Его́ взира́я,/ страда́ний лю́тых не убоя́лся еси́// и, я́ко же́ртва свяще́нная, Бо́гу прине́слся еси́.\n\nСтих: Б лаже́н муж, боя́йся Го́спода,// в за́поведех Его́ восхо́щет зело́.\n\nЕ гда́ нечести́вии уби́йцы,/ жесто́кою ра́ною тя уязви́вше,/ в ров жи́ва су́ща вверга́ху/ и неми́лостивно земле́ю погреба́ху,/ тогда́, страстоте́рпче сла́вный,/ страда́ния лю́тая претерпева́я,/ о́браз му́жества показа́л еси́/ и, те́лом в земли́ посе́явся,// душе́ю в Ца́рствии Небе́снем процве́л еси́.\n\nСла́ва, глас 8:\n\nО лю́дие, ве́ру оте́ческую презре́вшии!/ Ка́мо веде́те мя, я́ко разбо́йника?/ Почто́ ру́ки своя́ на мя простира́ете/ и ра́ною жесто́кою уязвля́ете?/ Почто́ мя, жи́ва су́ща, в ро́ве пола́гаете/ и земле́ю неми́лостивно покрыва́ете?/ Не ве́даете у́бо, что творите́,/ — си́це священному́ченик Константи́н кро́тко глаго́лаше,// ду́шу свою́ Го́сподеви предава́я.\n\nИ ны́не, пра́здника.\n\nТропа́рь, глас 4:\n\nС вяще́нником украше́ние и му́чеником похвала́/ яви́лся еси́, о́тче Константи́не,/ ты бо, мно́гия лю́ди во огра́ду Це́ркве возврати́л еси́/ и небоя́зненно страда́ния и смерть за Христа́ прия́л еси́./ Ны́не же моли́ Человеколю́бца Бо́га/ Це́рковь Ру́сскую от ересе́й и раско́лов сохрани́ти// и спасти́ся душа́м на́шим.\n\nНА У́ТРЕНИ\n\nПо 1-м стихосло́вии седа́лен, глас 3:\n\nВ есели́ся днесь, земле́ Моско́вская, име́ющи те́плыя моли́твенники, но́выя страда́льцы за ве́ру Христо́ву, по́двиги свои́ми преде́лы твоя́ освяти́вшия. В ни́хже и священному́ченик Константи́н, гра́да Богоро́дска благо́е украше́ние, богому́дрыми словесы́ пле́велы раско́ла искорени́в, о́браз благоче́стия и правосла́внаго испове́дания в сердца́х ве́рных насади́. Те́мже, па́мять его́ соверша́юще, Бо́га, ди́внаго во святы́х Свои́х, достодо́лжно просла́вим.\n\nСла́ва, и ны́не, пра́здника.\n\nПо 2-м стихосло́вии седа́лен, глас 4:\n\nН аставле́ния твоя́, Константи́не богому́дре, всех послу́шающих тебе́ духо́вне напита́ша, ты бо, го́рняя, а не земна́я всегда́ му́дрствовати поуча́я, ра́лом слове́с твои́х окамене́вшая сердца́ люде́й возде́лал еси́ и, ева́нгельское се́мя в них насади́в, многопло́дна сотвори́л еси́. Помози́ и нам, свя́тче Бо́жий, те́сным и у́зким путе́м Ца́рства Небе́снаго дости́гнути.\n\nСла́ва, и ны́не, пра́здника.\n\nВелича́ние:\n\nВ елича́ем тя,/ священному́чениче Константи́не,/ и чтим честна́я страда́ния твоя́,/ я́же за Христа́// претерпе́л еси́.\n\nПсало́м избра́нный:\n\nБ ог нам прибе́жище и си́ла.\n\nГ о́споди, воздви́гни си́лу Твою́ и прииди́, во е́же спасти́ нас.\n\nГ лаго́лах о свиде́ниих Твои́х пред цари́, и не стыдя́хся.\n\nВ си язы́цы обыдо́ша мя, и и́менем Госпо́дним противля́хся им.\n\nТ ебе́ ра́ди умерщвля́емся весь день, вмени́хомся я́ко о́вцы заколе́ния.\n\nК ре́пость моя́ и пе́ние мое́ Госпо́дь, и бысть мне во спасе́ние.\n\nПо полиеле́и седа́лен, глас 8:\n\nС ве́том Христо́вым просвеща́емь, раско́лы и е́реси искореня́л еси́, свя́те Константи́не. Мы же, па́стырския твоя́ труды́ почита́юще и му́жеству в страда́ниих дивя́щеся, усе́рдно про́сим: помози́ нам Правосла́вную ве́ру свя́то храни́ти и, взе́мше крест свой, во след Христа́ ше́ствовати.\n\nСла́ва, и ны́не, пра́здника.\n\nСтепе́нна, 1-й антифо́н 4-го гла́са. Проки́мен, глас 4: П роидо́хом сквозе́ огнь и во́ду,// и изве́л еси́ ны в поко́й. Стих: Р азже́гл ны еси́, я́коже разжиза́ется сребро́. В ся́кое дыха́ние: Ева́нгелие от Матфе́я, зача́ло 36.\n\nПо 50-м псалме́ стихи́ра, глас 6:\n\nГ ра́да Богоро́дска украше́ние,/ Це́ркве Ру́сския све́тлую похвалу́,/ Правосла́вия тве́рдаго побо́рника,/ благоче́стия и́стиннаго ревни́теля,/ раско́лов и ересе́й искорени́теля,/ днесь восхва́лим, ве́рнии,/ Константи́на, священному́ченика добропобе́днаго// и те́плаго о нас пред Бо́гом моли́твенника.\n\nКано́н священному́ченика, глас 4, его́же краегране́сие: П охваля́ю победоно́снаго Константи́на.\n\nПеснь 1\n\nИрмо́с: М о́ря чермну́ю пучи́ну/ невла́жными стопа́ми,/ дре́вний пеше́ствовав Изра́иль/ крестообра́зныма Моисе́овыма рука́ма,// Амали́кову си́лу в пусты́ни победи́л есть.\n\nП росвети́ се́рдце мое́, Влады́ко Го́споди, и пода́ждь свы́ше светоза́рную благода́ть, воспе́ти похва́льная пе́ния Твоему́ уго́днику, зло́бу безбо́жных гони́телей победи́вшему.\n\nО т ю́ности Христа́ всем се́рдцем возлюби́в, Константи́не блаже́нне, во дни гоне́ний па́стырь до́брый и му́ченик непобеди́мый яви́лся еси́.\n\nХ рам души́ твоея́ в чистоте́ соблю́л еси́ и мно́гия доброде́тели стяжа́л еси́, священному́чениче Константи́не, те́мже и Госпо́дь дарова́ ти си́лу пребы́ти непоколеби́му и Ца́рствия Небе́снаго дости́гнути.\n\nБогоро́дичен: В олна́ми страсте́й ду́шу мою́ бори́мую чисто́тою по́мыслов умири́, Пресвята́я Де́во, Ты бо еси́ Засту́пница усе́рдная ро́да христиа́нскаго.\n\nПеснь 3\n\nИрмо́с: В есе́лится о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.\n\nА посто́льским стопа́м после́дуя и благода́тию Ду́ха Свята́го просвеща́емь, о́тче Константи́не, мно́жество суему́дренных во огра́ду святы́я Це́ркве приве́л еси́ и о́вцы ста́да Христо́ва соде́лал еси́.\n\nЛ ик све́тлый соста́вльше, воспои́м па́мять свята́го Константи́на, той бо, сла́вою небе́сною облиста́емь, вку́пе с новому́ченики Це́ркве Ру́сския мо́лится о спасе́нии душ на́ших.\n\nЯ́ ко крин се́льный и цвет благоуха́нный, процве́л еси́ по́двиги твои́ми, блаже́нне Константи́не, и крове́й твои́х излия́ньми плоды́ мно́гия Бо́гови прине́сл еси́.\n\nБогоро́дичен: Ю́ же А́нгели светоно́сно воспева́ют и земноро́днии досто́йно ублажа́ют, Бо́жию Ма́терь вси почти́м и чи́стое житие́ Той принесе́м.\n\nСеда́лен, глас 3:\n\nВ озсия́л еси́, я́ко звезда́ лучеза́рная, достохва́льне, тьму неве́рия разгоня́я и ересе́й лука́вое мудрова́ние посрамля́я, мучи́мыя стра́стию пиа́нства на путь спаси́тельный возвраща́я и заблу́ждшия лю́ди к покая́нию призыва́я. Те́мже, прославля́юще доброде́тели и по́двиги твоя́, уми́льно вопие́м: досточу́дне о́тче Константи́не, укрепи́ нас во и́стинней ве́ре и на путь благоче́стия наста́ви моли́твами твои́ми.\n\nСла́ва, и ны́не, пра́здника.\n\nПеснь 4\n\nИрмо́с: В ознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.\n\nП е́ние похва́льное благогове́йно прино́сим ти, свя́те Константи́не, Бо́га же, да́вшаго ти кре́пость во страда́нии, прославля́ем, взыва́юще: сла́ва си́ле Твое́й, Го́споди.\n\nО чи́стив ум твой и боже́ственными по́мыслы озари́вся, свя́те, я́ко па́стырь до́брый, ду́шу твою́ за о́вцы полага́л еси́, моли́твенно Бо́гу взыва́я: сла́ва си́ле Твое́й, Го́споди.\n\nБ огоро́дскую па́ству вода́ми жи́зни ве́чныя напои́л еси́, богоно́сче Константи́не, и, я́ко де́латель до́брый, в вертогра́де Христо́ве усе́рдно потруди́лся еси́, при́сно воспева́я: сла́ва си́ле Твое́й, Го́споди.\n\nБогоро́дичен: Е ва́нгельских уче́ний росо́ю боже́ственною окропи́ изсо́хшая сердца́ на́ша, Пречи́стая Де́во, да воспое́м Тя, я́ко Исто́чника Жи́зни нам ро́ждшую.\n\nПеснь 5\n\nИрмо́с: Т ы, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.\n\nД у́ха Пресвята́го оби́тель чу́дная быв, преблаже́нне Константи́не, лю́ди, злому́дрием омраче́нныя и го́рдостию ослепле́нныя, к све́ту и́стиннаго богове́дения приве́л еси́.\n\nО зари́ и на́ша ду́ши, помраче́нныя грехо́м, и к све́ту богоразу́мия наста́ви, па́стырю до́брый, да путе́м за́поведей Госпо́дних непоро́чно ходи́ти бу́дем.\n\nН а ка́мени ве́ры утвержда́яся, досточу́дне Константи́не, столп непоколеби́мь в годи́ну гоне́ний яви́лся еси́, злове́рие нечести́вых му́жески посека́я.\n\nБогоро́дичен: О диги́трие Блага́я, на путь спасе́ния напра́ви нас моли́твами Твои́ми и от скорбе́й, находя́щих на ны, изба́ви.\n\nПеснь 6\n\nИрмо́с: П ожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости из ребр Твои́х// исте́кшею Кро́вию.\n\nС ве́тлый пра́здник па́мяти твоея́, блаже́нне Константи́не, ве́рныя лю́ди воеди́но собра́, е́же просла́вити твоя́ до́блественныя по́двиги и за Христа́ страда́ния, и́миже мрак безбо́жия разгоня́ется.\n\nН еи́стовою зло́бою гони́телей, еще́ жив сый, неми́лостивно в земли́ погребе́н был еси́, страстоте́рпче, оба́че, я́ко клас зре́лый, в раи́ сла́дости бога́тно процве́л еси́.\n\nА по́столом, му́чеником и проро́ком в ре́вности о сла́ве Бо́жией подо́бяся, отве́рзл еси́ уста́ во обличе́ние беззако́нных, свяще́нне Константи́не, и, му́ки за Христа́ прие́м, ли́ку святы́х сочета́лся еси́.\n\nБогоро́дичен: Г о́ру Тя, благода́тию Бо́жиею приосене́нную, проро́к прозорли́во разуме́, Пречи́стая Де́во, от Тебе́ бо отсече́ся Ка́мень Жи́зни, Христо́с Бог наш во спасе́ние на́ше и обновле́ние.\n\nКонда́к, глас 5:\n\nР е́вностию о ве́ре Христо́ве от ю́ности возгоре́вся,/ богому́дре о́тче Константи́не,/ за́поведем ева́нгельским после́довал еси́/ и свети́льник ве́ры заблу́ждшим яви́лся еси́./ Те́мже, страда́нием за Христа́ жизнь твою́ увенча́в,/ Бо́га в по́двизе просла́вил еси́,// Его́же моли́ спасти́ся душа́м на́шим.\n\nИ́кос:\n\nГ ла́су Боже́ственнаго Учи́теля повину́яся, я́ко прему́др лове́ц яви́лся еси́, свя́те Константи́не, и, мре́жею слове́с ду́ши заблу́ждшия из глубины́ грехо́вныя извлача́я, на путь спасе́ния наста́вил еси́. Сего́ ра́ди похва́льная воспису́ем ти си́це: Ра́дуйся, и́стиннаго па́стырства све́тлое сия́ние; ра́дуйся, честна́го му́ченичества до́брая похвало́. Ра́дуйся, мед слове́с ева́нгельских вкуси́вый; ра́дуйся, си́ми глад духо́вный утоли́вый. Ра́дуйся, за́поведей Бо́жиих ре́вностный исполни́телю; ра́дуйся, неве́рия и раско́ла му́дрый обличи́телю. Ра́дуйся, Константи́не досточу́дный, те́плый о нас пред Бо́гом моли́твенниче.\n\nПеснь 7\n\nИрмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:// благослове́н еси́ в хра́ме сла́вы Твоея́, Го́споди.\n\nО гне́м Боже́ственныя любве́, му́чениче Христо́в Константи́не, лед неве́рия растопи́л еси́ и чисто́тою испове́дания твоего́ возгре́л еси́ ве́рных сердца́ воспева́ти Бо́гу: благослове́н еси́ в хра́ме сла́вы Твоея́, Го́споди.\n\nК ро́тце страда́ния терпя́, свя́те Константи́не, незло́бием еди́наго от мучи́телей ко Христу́ обрати́л еси́, еще́ же и самови́дца кончи́ны твоея́ му́ченичеству сочета́л еси́. Ны́не же ку́пно с ни́ми взыва́еши: благослове́н еси́ в хра́ме сла́вы Твоея́, Го́споди.\n\nО, неизглаго́ланнаго долготерпе́ния! Константи́н блаже́нный лю́те умерщвля́ется и земле́ю покрыва́ется. Оба́че А́нгели ду́шу его́ святу́ю к Престо́лу Бо́жию возно́сят, иде́же небожи́тели вопию́т: благослове́н еси́ в хра́ме сла́вы Твоея́, Го́споди.\n\nБогоро́дичен: Н аде́жда и Покро́в еси́ на Тя упова́ющим, Богоро́дице Де́во. Моли́твами Твои́ми на враги́ ви́димыя и неви́димыя укрепи́ ны и Сы́ну Твоему́ пе́ти досто́йно сподо́би: благослове́н еси́ в хра́ме сла́вы Твоея́, Го́споди.\n\nПеснь 8\n\nИрмо́с: Р у́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.\n\nС траж ве́ры правосла́вныя непоколеби́мь яви́лся еси́, священному́чениче, пе́рвее у́бо мно́гая лжемудрова́ния изоблича́я, второ́е же ве́рность Христу́ пред мучи́тели показу́я, те́мже Влады́це взыва́еши: благослови́те, вся дела́ Госпо́дня, Го́спода.\n\nТ емни́чное заключе́ние и истяза́ния беззако́нных мучи́телей не возмого́ша поколеба́ти тве́рдость ве́ры твоея́, свя́те Константи́не, ты бо, му́жески вся претерпе́в, ра́йския оби́тели дости́гл еси́, иде́же ны́не све́тло воспева́еши: благослови́те, вся дела́ Госпо́дня, Го́спода.\n\nА́ ще и убие́н был еси́, му́чениче сла́вне, оба́че ны́не во оби́телех Царя́ Небе́снаго жи́зни ве́чныя наслажда́ешися и с ли́ки святы́х новому́чеников и испове́дников побе́дне взыва́еши: благослови́те, вся дела́ Госпо́дня, Го́спода.\n\nБогоро́дичен: Н асле́дия Небе́снаго не даждь нам лиши́тися, Пресвята́я Де́во, но моли́твами Твои́ми сподо́би нас со святы́м Константи́ном воспева́ти: благослови́те, вся дела́ Госпо́дня, Го́спода.\n\nПеснь 9\n\nИрмо́с: К а́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́.// Тем веселя́щеся, Тя, Богоро́дице, велича́ем.\n\nТ е́ло твое́, свя́те Константи́не, Бог нетле́нием просла́ви и, я́ко многоце́нное сокро́вище нам яви́в, благоволи́ положи́ти во утвержде́ние олтаре́й хра́мов земли́ Моско́вския. Мы же, Исто́чника безсме́ртия вкуша́юще, прича́стницы жи́зни ве́чныя быва́ем.\n\nИ спове́дника тве́рда, му́ченика сла́вна и па́стыря до́бра имену́ем тя, Константи́не блаже́нне, и, по́двиги твои́ми назида́еми, усе́рдно про́сим: не лиши́ нас и ны́не твоего́ оте́ческаго попече́ния.\n\nН е мо́жет язы́к челове́ческий воспе́ти по достоя́нию по́двиги ва́ша, му́ченицы Христо́вы, мы же, любо́вию дви́жими, прино́сим похвалы́ сия́ и мо́лим: при́сно хода́тайствуйте о спасе́нии душ на́ших.\n\nБогоро́дичен: А́ гница нескве́рная, А́гнца Бо́жия ве́рным ро́ждши, Пречи́стая Де́во, спаси́ любо́вию пою́щия Тя и заступле́ния Твоего́ усе́рдно прося́щия.\n\nСвети́лен:\n\nД несь, ве́рнии, вку́пе собра́вшеся, све́тлость настоя́щаго пра́здника возвести́м и священному́ченика Константи́на пе́сньми просла́вим, его́же Христо́с сы́на Све́та показа́ и даро́в Ду́ха Свята́го испо́лни.\n\nСла́ва, и ны́не, пра́здника.\n\nНа хвали́тех стихи́ры, глас 8.\n\nПодо́бен: О, пресла́внаго чудесе́:\n\nО, пресла́внаго чудесе́!/ Константи́н, пресви́тер Богоро́дский,/ лю́тыми страда́ньми и муче́нием/ пропове́дник всео́бщаго Воскресе́ния явля́ется/ и в земли́, еще́ жив сый, погреба́ется,/ оба́че нетле́нием телесе́ от Бо́га прославля́ется,/ и в Небе́снем Ца́рствии со все́ми святы́ми/ и́стее Па́схи Христо́вы причаща́ется// и мо́лится о душа́х на́ших.\n\nО, пресла́внаго чудесе́!/ Путь те́сный в широту́ ра́йскую приво́дит/ и муче́ние Христа́ ра́ди/ несказа́ннаго блаже́нства сподобля́ет./ На тебе́ же, добропобе́дне Константи́не,/ сия́ пресла́вно испо́лнишася./ Помози́ и нам, страстоте́рпче,/ ве́рность Бо́гу да́же до сме́рти сохрани́ти// и Ца́рствия Небе́снаго дости́гнути.\n\nО, пресла́внаго чудесе́!/ Константи́н, добропобе́дный му́ченик,/ свяще́нную оде́жду обагри́в своею́ кро́вию,/ страда́ньми Небе́сных селе́ний дости́гл есть,/ иде́же ны́не престо́лу А́гнца Бо́жия предстои́т/ и со А́нгелы побе́дно взыва́ет:/ благослове́ние, и сла́ва, и прему́дрость,/ и хвала́, и честь, и си́ла, и кре́пость Бо́гу на́шему// во ве́ки веко́в. Ами́нь.\n\nСла́ва, глас 6:\n\nМ у́жественне крест твой на ра́мо взем/ и доброде́тельми вооружи́вся,/ безбо́жныя наве́ты гони́телей си́лою Бо́жиею победи́л еси́/ и му́ченическими страда́ньми боже́ственнаго приста́нища дости́гл еси́,/ иде́же от Влады́ки Христа́ услы́шал еси́:/ благи́й ра́бе и ве́рный,/ вни́ди в ра́дость Го́спода твоего́./ Того́ моли́, Константи́не блаже́нне,/ грехо́в оставле́ние и исправле́ние жития́ нам пода́ти,// чту́щим любо́вию святу́ю па́мять твою́.\n\nИ ны́не, пра́здника.\n\nНА ЛИТУРГИ́И\n\nБлаже́нна от кано́на пра́здника, песнь 3-я, и свята́го, песнь 6-я. Проки́мен, глас 7: Ч естна́ пред Го́сподем// смерть преподо́бных Его́. Стих: Ч то воздам Господеви о всех, яже воздаде ми? Апостол к Ри́мляном, зача́ло 99 (8, 28-39). Аллилу́ия, глас 2: С вяще́нницы Твои́ облеку́тся в пра́вду, и преподо́бнии Твои́ возра́дуются. Стих: Б ог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106, (21, 12-19). Прича́стен пра́здника, и свята́го: В па́мять ве́чную бу́дет пра́ведник, от слу́ха зла не убои́тся.\n\nМоли́тва\n\nО избра́нный уго́дниче Христо́в, о́тче богому́дре Константи́не, Це́ркве Ру́сския сто́лпе непоколеби́мый, земли́ Богоро́дския похвало́, па́ствы твоея́ предста́телю и наста́вниче! Ты, от ю́ности в благове́стии сло́ва Бо́жия подвиза́яся, мно́гия ду́ши от заблужде́ния и раско́ла во огра́ду Це́ркве возврати́л еси́. Егда́ же призва́ тя Госпо́дь на служе́ние па́стырское, до́брый де́латель вертогра́да Бо́жия яви́лся еси́: сопа́стыри в благоче́стии укрепля́я, ю́ныя в ве́ре и доброде́лании наставля́я, му́чимыя стра́стию пиа́нства от пути́ поги́бельнаго отвра́щая и о всех лю́дех пред Престо́лом Бо́жиим те́плыя моли́твы вознося́. Во вре́мя же гоне́ния безбо́жнаго о́браз му́жественнаго и кро́ткаго стоя́ния за ве́ру яви́л еси́ и, еще́ жив сый, в зе́млю погребе́н был еси́ и, лю́тую смерть прие́м, в пе́рвых новому́ченицех просия́л еси́. Ны́не же мы недосто́йнии, к честне́й и многоцеле́бней ра́це святы́х моще́й твои́х благогове́йно припа́дающе, с любо́вию вопие́м ти: помози́ па́стырем пра́вило ве́ры благоче́стне содержа́ти, боля́щия и немощны́я уврачу́й, печа́льныя уте́ши, гони́мыя защити́, ю́ныя наста́ви, всем же благосе́рдый оте́ц и те́плый моли́твенник яви́ся. О свя́тче Бо́жий! Умоли́ Го́спода Бо́га, да соблюда́ется в ве́ре правосла́вней оте́чество на́ше и в нем досто́йно и пра́ведно прославля́ется и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. А ми́нь.\n\nЦерковный календарь\n\nсегодня\n\n3 ноября\n\n21 октября по старому стилю\n\nМосковская Патриархия\n\nИздательство\nМосковской Патриархии\nРусской Православной\nЦеркви\n\nНовые богослужебные книги\nИздательства МП РПЦ\n\nТекст опубликован в книгах\n\nТекст еще не опубликован\n\nПОСЛЕДНИЕ ДОБАВЛЕНИЯ\n\n12 октября, 2026\nСлужба священномученику Сергию Мечеву, пресвитеру\n\n24 сентября, 2026\nАкафист преподобному Макарию архимандриту, миссионеру Алтайскому\n\n14 сентября, 2026\nАкафист святителю Зиновию исповеднику, митрополиту Тетрицкаройскому\n\n5 сентября, 2026\nСлужба преподобномученику Моисею (Кожину), Соловецкому\n\nВХОД НА САЙТ\n\nРегистрация\n\nЗабыли пароль?\n\nТексты\n\nДокументы\n\nГлавная\n\nО проекте\n\nОбратная связь\n\nЭлектронная почта: nbt@rop.ru тел: +7 (499) 703-0214\n\n© Религиозная организация Издательство Московской Патриархии Русской Православной Церкви 2026\n\n-