Главная / Библиотека / Акафисты / Акафисты Святым / Алексию, пресвитеру Московскому (Мечёв)\n\nАлексию, пресвитеру Московскому (Мечёв)\n\nКондак 1\n\nИзбранный угодниче Христов и великий в скорбех помощниче, праведный отче Алексие! К тебе яко к теплому предстателю мы грешнии со дерзновением притекаем и умильно взываем: умоли о нас всесильнаго Бога, не попустити нам блуждати по распутиям греховным, но просветити и наша сердца духом твоея любве, да зовем ти:\n\nРадуйся, праведный старче Алексие, утешителю благостный.\n\nИкос 1\n\nАнгелов Творец яви в рождении твоем молитвенное заступление святителя Филарета, егда, не могущу матери разродитися тобою, родитель твой притече к нему, и того молитвою явлен был еси в мир сей во время совершения Божественныя Евхаристии, показуя тем, яко будеши великий служитель таинств церковных. Сего ради взываем ти:\n\nРадуйся, святителем Филаретом благословенный и воспитанный;\n\nPадуйся, от пелен того подвижническому житию научивыйся.\n\nРадуйся, отрасль родителей пречестных, плод благий принесшая;\n\nPадуйся, яко издетска гласом своим Бога прославлял еси.\n\nРадуйся, благоговение и любовь ко службам Божиим от отца унаследовавый;\n\nPадуйся, от матери твоея странноприимство и попечение о ближних восприявый.\n\nРадуйся, ушеса своя к пению церковному от рождения приклонивый;\n\nPадуйся, во еже не видети суеты, очеса своя в горняя вперивый.\n\nРадуйся, праведный старче Алексие, утешителю благостный.\n\nКондак 2\n\nВидя Человеколюбец Господь широту сердца твоего, готоваго послужити ближним своим, яви в благословении матери твоея волю Свою, да будеши не врач телес, но пастырь Церкви Христовы, врачуяй души притекающих к тебе, темже вси людие, видяще образ добраго пастырствования твоего, воззовут Богу: Аллилуиа.\n\nИкос 2\n\nРазумом Божественным просвещен, узрел еси путь спасения во отсечении воли своей, егда поставлен был еси причетником во храм Богоматере, с велием терпением восприял еси суровство начальствующаго и тако возрастил еси в сердце твоем плод Христова смирения. Многолетнее твое терпение славяще, возглашаем ти тако:\n\nРадуйся, послушниче усердный;\n\nPадуйся, яко Богу работал еси неленостно.\n\nРадуйся, укорения и поругания, яко Божие изволение, восприявый;\n\nPадуйся, осуждати и укоряти других всегда избегавый.\n\nРадуйся, поучавый обличающих нас яко благодетелей почитати;\n\nPадуйся, призывавый ради блага ближних своих себе утесняти.\n\nРадуйся, благим супружеством своим и нам образ честнаго брака явивый;\n\nPадуйся, в супружнице твоей добраго помощника на пути Христовом обретый.\n\nРадуйся, праведный старче Алексие, утешителю благостный.\n\nКондак 3\n\nСила Вышняго обрете в тебе сосуд честен и по посвящении во иерея продолжаше вести тя чрез горнило испытаний. Служил бо еси не в веси дальней, якоже хотяше, но во граде Москве, в церкви малаго прихода, идеже осемь лет богомольцев не имев, николиже возроптал еси. Ныне же предстоиши со дерзновением Престолу Божию, поя песнь: Аллилуиа.\n\nИкос 3\n\nИмея тщание к совершению служб церковных, на кийждо день служение Божественныя Литургии учинил еси и к покрову Богоматери и заступничеству святителя Николая прибегая, весь путь жития твоего молитвою озарил еси. Сего ради воспеваем тя сице:\n\nРадуйся, служителю олтаря ревностный;\n\nPадуйся, яко бодрствовал еси в молитвенном подвизе непрестанно.\n\nРадуйся, в Бозе все упование твое полагавый;\n\nPадуйся, в долгих испытаниих непоколебим пребывый.\n\nРадуйся, яко крест на перси прияв, сраспинал еси Христу плоть свою со страстьми и похотьми;\n\nPадуйся, яко получив епитрахиль на выю свою, Дары Духа Святаго неоскудно источал еси.\n\nРадуйся, яко поясом препоясав чресла своя, заутро на нивы делания Господня изшел еси;\n\nPадуйся, яко взявся за рало Христово, не направлял еси вспять стопы твоя.\n\nРадуйся, праведный старче Алексие, утешителю благостный.\n\nКондак 4\n\nБурю моря житейскаго, сластолюбием, злобою и гордынею волнуемаго, всем житием твоим научал еси преплывати в кораблеце покаяния, да и мы, являя живую веру и трепетную любовь ко Господу, сподобимся воспевати Ему и на небесех песнь хвалебную: Аллилуиа.\n\nИкос 4\n\nСлыша о богоугоднем житии твоем, начата прибегати к тебе ищущии спасения, обретая в тебе чадолюбиваго отца и утешителя, ты же неленостно поучал еси я покаянию и служению ближним самоотреченному. Темже и нас, якоже и чад твоих, научи истинному деланию на пажитех душ наших, да славим тя, благодаряще:\n\nРадуйся, в век оскудения благочестия несокрушимым сосудом веры явивыйся;\n\nPадуйся, неленостным проповеданием в обмирщенная сердца семена благих деяний сеявый.\n\nРадуйся, глашатаю любве Божия всем скорбящим и отчаявшимся;\n\nPадуйся, ожесточенных злобою любовию своею к покаянию обращал еси.\n\nРадуйся, научивый в живущих с нами образ Божий почитати;\n\nPадуйся, призывавый почивших неустанно поминати.\n\nРадуйся, не отревая немощных, им по силе их делание полагавый;\n\nPадуйся, в постоянстве малого делания залог духовнаго возрастания указавый.\n\nРадуйся, праведный старче Алексие, утешителю благостный.\n\nКондак 5\n\nЗвезда еси, на небесех святости возсиявшая, светиши светло, в сонме праведных и исповедников российских землю нашу просвещая, темже, зряще тя, праведный отче Алексие, прославляем прославльшаго тя Господа, зовуще Ему: Аллилуиа.\n\nИкос 5\n\nВидя обильным любовию сердцем своим окрест тебе в нищете живущия, подавал еси им, елико имеяше, уповая, яко не оставит Господь и дом твой. Даждь и нам стяжати сердце милосердное и научи ны невозбранно внимати воле Божией, да восхваляюще глаголем ти сицевая:\n\nРадуйся, Христа бо возлюбив, не прилеплялся еси к сокровищам земным;\n\nPадуйся, яко великий купец, небесное богатство стяжал еси.\n\nРадуйся, милосердием души наша обогащати научаяй;\n\nPадуйся, некрадомое богатство душам верных испрошаяй.\n\nРадуйся, светом трисолнечным сердца человеческая просвещаяй;\n\nPадуйся, выну о пользе душевной пекийся.\n\nРадуйся, рачителю целомудрия;\n\nPадуйся, хранителю чистоты.\n\nРадуйся, праведный старче Алексие, утешителю благостный.\n\nКондак 6\n\nПроповедал еси пастве своей покаяние и вкушение безсмертныя Трапезы Агнчи, да не взалчут более страстей, но восприимут мир и любовь Христову и поучаются любити ближних своих с самоотвержением и утеснением себе, да благо им будет, и да взывают радостно: Аллилуиа.\n\nИкос 6\n\nВозсиял еси в первопрестольнем граде Москве глашатаем жизни неветшающия, древним отцем, в пустынех подвизавшимся, равный; людем, в суете пребывающим и различными злоучении прельщаемым, открывал еси любовь, милосердие и правду Божию. Таковому о тебе произволению Божию дивящеся, вопием ти:\n\nРадуйся, неустанный проповедниче любве к Богу и ближним;\n\nPадуйся, яко вслед за апостолом наставлял еси друг друга тяготы носити.\n\nРадуйся, во граде яко в пустыни живый;\n\nPадуйся, пустыню града богатством слез твоих оросивый.\n\nРадуйся, яко пожил еси в мире премирно;\n\nPадуйся, яко и на земли выну предстоял еси Христу.\n\nРадуйся, ожесточенная сердца теплотою твоея любве возделавый;\n\nPадуйся, и ныне помогаеши страждущим душевный покой обретати.\n\nРадуйся, праведный старче Алексие, утешителю благостный.\n\nКондак 7\n\nХотя Человеколюбец Господь поставити тя в трудную годину утешителем скорбящих и страждущих, посла тебе скорбь великую в тяжкой болезни и смерти супружницы твоея, да ничто уже земное не связует сердце твое, но да приложиши к ревности ревность и приимеши благодать на благодать, научая пети всех: Аллилуиа.\n\nИкос 7\n\nНовый путь духоноснаго старчествования на стогнах града Москвы яви тебе Господь в словесех праведного Иоанна, пресвитера Кронштадтскаго, указуя, да восприимеши всю скорбь человеческую, яко свою, молитвою и теплотою любве сию врачуя. Темже и наша скорби отыми от нас, да радующеся, взываем ти:\n\nРадуйся, благодать кронштадтскаго светильника обильно восприемый;\n\nPадуйся, яко врач искусный душ человеческих явивыйся.\n\nРадуйся, вставший на страже скорбных сердец человеческих;\n\nPадуйся, от обращавшихся к тебе именование добраго пастыря стяжавый.\n\nРадуйся, заблудших овец к Пастыреначальнику приводивый;\n\nPадуйся, от волков хищных тех неврежденно сохранивый.\n\nРадуйся, яко широтою любве твоея всех объял еси;\n\nPадуйся, яко надежду на Бога полагати научал еси.\n\nРадуйся, праведный старче Алексие, утешителю благостный.\n\nКондак 8\n\nСтранноприимная деяния совершати тщашеся, учинил еси при храме приют чадом, не имущим родителей, назидая их словом и житием своим, да возрастая в благом попечении и любве, благодарственно воспевают Богу: Аллилуиа.\n\nИкос 8\n\nВесь еси, праведный отче Алексие, николиже суетою связанный, посреде людей пребывая, выну Богу предстоял и работал еси. И нас, в суету погруженных, научи твоему в мире премирному житию, да усердно тебе воспоим:\n\nРадуйся, детскую младость души твоея сохранивый;\n\nPадуйся, тою младая сердца к Богу приводивый.\n\nРадуйся, явивыйся сиротствущим чадолюбивая мати;\n\nPадуйся, порождаяй души чад своих духовных для вечнаго живота.\n\nРадуйся, преизряднейший пастырю;\n\nPадуйся, яко от скверн мира сего ограждатися чад своих научал еси.\n\nРадуйся, чтущим тя верный пред Богом ходатаю;\n\nPадуйся, призывающим тя непреложное упование.\n\nРадуйся, праведный старче Алексие, утешителю благостный.\n\nКондак 9\n\nВсем, притекающим к тебе в скорби, наставник изрядный явился еси, отче Алексие, подвизая людей к покаянию и самоукорению, терпению же в скорбех неистощимому, да за сие благодаряще, Богу поют: Аллилуиа.\n\nИкос 9\n\nВитийствующий язык умолча, зря, како ты, старче Алексие, служение свое в простоте совершая и мудрость века сего посрамляя, всяку гордыню человеческую, яко прах от лица ветра, возметал еси. Сего ради похваляем тя сице:\n\nРадуйся, яко не хитросплетением словес, но силою правды Божия души призывал еси;\n\nPадуйся, яко вознесенную гордыню века сего смирением сокрушал еси.\n\nРадуйся, словесы своими не крепость человеческую, но силу Божию являвый;\n\nPадуйся, яко нестареющую мудрость евангельскую живу и действенну показавый.\n\nРадуйся, исполненный ревности по Бозе Вседержителе;\n\nPадуйся, ревнителю уставов церковных.\n\nРадуйся, искусный властителю совести человеческия;\n\nPадуйся, всем бе вся, да спасеши души, Богом тебе врученныя.\n\nРадуйся, праведный старче Алексие, утешителю благостный.\n\nКондак 10\n\nСпасения от временных тягот поучал еси в переселении во слывшия хлебородными земли не искати, егда глад, мор и междуусобныя брани постигоша страну нашу. Заповедал еси жительства своего не оставляти и восприяти трудности яко наказание Божие, за умножение беззакония попущенное, Богу взывая: Аллилуиа.\n\nИкос 10\n\nСтена непоколебимая упования на Господа явился еси, отче Алексие, яко скала крепкая сокрушая треволнение житейскае, малодушие и уныние в душах людей, к тебе прибегающих и с любовию зовущих ти:\n\nРадуйся, адаманте веры несокрушимый;\n\nPадуйся, узревший с богомольцы храма пред годиною бедствии, како лияше слезы Богоматерь на чудотворней иконе Ея Феодоровской.\n\nРадуйся, разделивый с народом российским скорби, Богом низпосланные;\n\nPадуйся, глад и хлад приявый яко наказание Божие.\n\nРадуйся, злато, в горниле скорбей очищенное;\n\nPадуйся, надеждею на милосердие Божие страждущия души врачевавый.\n\nРадуйся, помощниче скорый;\n\nPадуйся, призывающим тя в скорбных обстояниих щит и ограждение.\n\nРадуйся, праведный старче Алексие, утешителю благостный.\n\nКондак 11\n\nПение всеумиленное приносим ти, отче досточудне, прославляя блаженную кончину и погребение твое, молитвами первосвятителя и исповедника Тихона, Патриарха Всероссийскаго, напутствованное. Веруем, яко предстоиши в свете невечернем Престолу Пресвятыя Троицы, выну поя: Аллилуиа.\n\nИкос 11\n\nСветозарным светильником явился еси, даров Божиих исполнен и умножаяй таланты, яже даде тебе всех Бог, в житии бо твоем являл еси дары прозрения и исцеления, подвизая нас глаголати тебе похвалы сия:\n\nРадуйся, яко от детских лет был еси Господу верен;\n\nPадуйся, многих дарований от Него сподобивыйся.\n\nРадуйся, луче благодати, в мире явленная;\n\nPадуйся, ризами света Христова одеянный.\n\nРадуйся, помогий обрести сына отчаявшейся матери из града Тобольска, юже к тебе преподобный Серафим направи;\n\nPадуйся, яко и ныне в трудных обстояниях о нас к Богу ходатайствуеши.\n\nРадуйся, прозорливостию и чудотвореньми люди в вере стояти утвердивый;\n\nPадуйся, отеческим попечением и молитвою не имевшия веры души к Богу обративый.\n\nРадуйся, праведный старче Алексие, утешителю благостный.\n\nКондак 12\n\nБлагодати исполнен, яко сосуд Духа Святаго избранный, породил еси духом многая чада твоя, да зряще житие их, окрест живущии уразумеют, яко любовь в Бозе к ближнему залог мира и благоденствия есть, и тако благодарственно воззовут Богу: Аллилуиа.\n\nИкос 12\n\nПоюще житие твое и прославление, веруем, яко многомощно есть пред Престолом Владычним твое за ны ходатайство, мощи же твои сокровище многоценное имуще, к ним припадаем, яко к сосуду благодати неистощимому, и согласно ублажаем тя:\n\nРадуйся, гражданине Иерусалима небеснаго;\n\nPадуйся, благий наставниче, возрастивый в чадех своих преславных отцев.\n\nРадуйся, яко был еси на земли храм живый, Господу посвященный;\n\nPадуйся, яко предстоиши днесь Престолу Вседержителя.\n\nРадуйся, старцев оптинских собеседниче;\n\nPадуйся, кронштадтского светильника сомолитвенниче.\n\nРадуйся, яко община твоя образ бысть купножительства христианскаго;\n\nPадуйся, яко чада твоя свидетельством кровей своих Христа исповедаша.\n\nРадуйся, праведный старче Алексие, утешителю благостный.\n\nКондак 13\n\nО предивный пастырю и теплый о нас к Богу молитвенниче, праведный отче Алексие! Не отрини нас немощных, совершающих похвальное пение сие, и научи волю Божию невозбранно творити, да сподобимся и в будущем веце благодарственно воспевати Творцу и Богу нашему: Аллилуиа.\n\nЭтот кондак читается трижды, затем икос 1-й и кондак 1-й\n\nМолитва святому праведному Алексию, пресвитеру Московскому\n\nК тебе, о праведный отче Алексие, мы, грешнии и недостойнии, притекаем и со умилением взываем ти: призри ныне милостивно с высоты святыя своея на Отечество наше и нас, тя прославляющих. Приявший в житии своем тяготы людей и сердцем милующим понесый скорби их, приими в молитвенное твое предстательство и нас, грехи многими обремененных и суетою мира сего утружденных. В тебе, о дивный старче, прославися Господь, явив тя таинником милости Божией. Тя призываем неотступно: буди врач душам и телесем нашим, унывающим — утешитель, малодушным дерзновение низпосли, помраченных злобою всепрощению научи, воздержанию способствуй. Воспламени, благий делателю винограда Христова, хладная сердца наша ревностию служения твоего, научи молитве непрестанной и деятельной любве с утеснением себе ради блага ближних наших. Укрепи молитвами твоими чада Церкви нашея, да поживем в любве и мире, а вне ограды церковныя пребывающии да уразумеют Христову истину и вкупе с нами прославят Животворящую и Нераздельную Троицу и твое милостивное предстательство во веки веков. Аминь.\n\nМолитва иная\n\nО всечестный и преблаженный отче наш Алексие, дивный старче Московский и всея Церкви Российския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, милующим сердцем болезнуя о всех, просящих твоея помощи. Приими малое сие моление наше, и яко в земном житии твоем отирал еси всяку слезу, облегчал еси всяку скорбь, так и ныне, милосердый молитвенниче и ходатаю наш, возьми тяготы, болезни и скорби наша, исполни страждущая сердца радостию, умоли человеколюбца Бога о прощении безчисленных прегрешений наших, да очистив душу покаянием, к деланию доброму приступим. Ей, старче благий, буди и нам пастырю добрый, наставляя на стезю спасения, да молитвами твоими безпорочно прейдем путь жития нашего и обрящем Отечество Небесное, идеже ты со ангелы и всеми святыми предстоиши Престолу Святыя Троицы, славяще Безначального Отца со Единородным Его Сыном и Пресвятым, и Благим, и Животворящим Его Духом во веки веков. Аминь.\n\nМолитва священномученику Сергию Мечёву\n\nО всечестный и преславный священномучениче Сергие, святости отеческия наследниче, веру православную во страданиях и до смерти исповедавше, богословия истиннаго действенный поборник и учитель явился еси. Темже велие дерзновение ко Господу имея, испроси и нам подати благодать и крепость во испытаниях, разумети премудрость велию писаний святоотеческих и божественныя службы премирность. Аминь.\n\nМолитва общая святому праведному Алексию и священномученику Сергию Мечёвым\n\nО всечестнии и преславнии пастыри наша, праведный Алексие, старче Московский, и священномучениче Сергие! К вам, о чадолюбивыя предстатели и заступницы наша, со умилением припадаем и, величая труды, болезни и страдания ваша, молим: призрите на ны, унывающия, немощныя, и всесильными молитвами вашими вся злая от нас отвратите. Сподобите и нас подражати вере, терпению и любве вашея; испросите, о всеблаженнии, у Всещедраго Бога оживотворити благодатию души наша, да со упованием непреложным на милость Его течем на предлежащий подвиг спасения души и да сподобимся унаследовати Царствие Небесное и тамо вкупе в радости безконечней воспевати в Троице славимаго Бога во веки веков. Аминь.